Isaiah 61 - Zokam International Version

TOPA Angvan Kum

¹ Mizawngte tungah lungdamna thu hilh dingin TOPA in kei sathau hong nilh khin ahi manin Thupipen TOPA’ Kha kei tungah a om hi. Amah in lungsim kitamte khui kik ding, sal-a kimante suahtak nading le thong a kiate a khahkhiat nading tangko ding,

² TOPA angvan kum le eite Pasian phulak ni tangko-a, a thumte khempeuh hehnemin,

³ Zion-a om a dahte huhin - amau lutungah vut tangin kumpi lukhu a khusak ding, thumna tangin nuamna sathau, le lungkiatna kha tangin phatna puan a pia dingin kei hong sawl zo hi. ama thupina a kilat nadingin amaute, TOPA suansa thumaanna tehno kungte, kici ding hi.

⁴ Amaute in tanglai-a kisiasate bawlpha in, a maimangsate a ding kiksak ding uh hi; amaute in khuapi kisiate puah kikin, khang tampi a maimangsa khuapite a puahpha ding uh hi.

⁵ Pemtate in na tuuhonte uh cing ding uh a; gamdang mite in na lo uh le na lenggui lote uh a kho ding uh hi.

⁶ Tuateh note, TOPA’ siampite hong kici dinga, Pasian’ nasemte ci-in hong kilo ding hi. Minamte neihsa-in na kivak ding uh a, amaute hauhna na kisaktheihpih ding uh hi.

⁷ Ka mite in amau maizumna tangin a zahnih tang ding uh a, amaute mindaina tangin amau luahna nuam a sa ding uh hi; tua ciangin amau gamah a zah nih luah ding uh a, tawntung nopsakna amau aa hi ta ding hi.

⁸ Ahang in, keimah TOPA in thutang ka it a; mite neihsa suhna le khialhna ka mudah hi. Ka muanhuaina hangin amaute pahtakman ka pia dinga, amaute tawh tawntung thukhun ka bawl ding hi.

⁹ Minamte lakah amaute suan le khakte kitangtheih dinga, amau suante mite lakah a kitang theih ding hi. Amaute a mu peuhmah in TOPA thupha piaksa minam ahilam a tel ding uh hi," a ci hi.

¹⁰ TOPA sungah nuam ka sa mahmah a, ka Pasian sungah ka kha a kipak hi. Ahang in, zi neipa in siampipa bangin a lu a zep bang le, suangmanpha-in monu a kizep bangin amah in hotkhiatna puante kei hong silhsak khin a, thumaanna puantualpi-in kei hong zem khin hi.

¹¹ Ahang in, lei hoih in mengkhiasakin, huan in khaici a posak bangin Thupipen TOPA in minam khempeuh mai-ah thumaanna le phatna a phulkhiasak ding hi.