Isaiah 59 - Zokam International Version

Mawhna, Kipulakna le Tatkhiatna

¹ A honkhia zo lo dingin TOPA khut tom lua lo a, a za lo dingin a bengngong lo hi.

² Ahi hangin na khialhnate in na Pasian kiang panin hong khenkhia khin hi. Amah in hong zak loh nadingin na mawhnate in ama maitang a liah hi.

³ Ahang in, na khutte sisanin nin a, na khutmete khialhna-in a nin hi. Na kam un zuauthu gen a, na leii un gitlohna nate a gen ziahziah hi.

⁴ Kuamah in thutang zong lo a, kuamah in citakin a thu a sung kei hi. Amaute in kisel mawkmawkna muangin zuau a gen uh hi; haksatna paii-in gitlohna a suakkhia uh hi.

⁵ Thangtom tui op uh a, maimom khau a phan uh hi. Amaute tui a ne peuhpeuh si dinga, khat a kitap ciangin thangtom khat a keuh ding hi.

⁶ A maimom khau uh puan in kimang lo a; amau bawlsa tawh a kituam thei kei uh hi. A nasep uh gitloh nasep hi-a, a khutun gamhtatna bek a sem hi.

⁷ A khe uh mawhna bawl dingin manlang a, mawhpengte sisan luansak ding a kin uh hi. A ngaihsut uh gitloh ngaihsutna hi a; amau lampi ah kisiatna le siatna sul a pai hi.

⁸ Amaute in lemna lampi thei lo uh a; amau lampi-ah thutang a om kei hi. Amaute lamkawi-ah kihei khin uh a, amaute a zui peuhpeuh in lemna a thei kei hi.

⁹ Tua ahi ciangin eite thutang tawh i kigamla a, thumaanna in eite hong ban kei hi. Eite in khuavak i zon hangin khuamial bekbek ahi hi; A tanphatna i zon hangin a mial bikbek ah i pai hi.

¹⁰ Mittaw bangin kawm zui teng i zawtzawt a, mittang nei lo bangin lampi i zawt hi. Khua khalvak-a pai bangin suntangpi-in i muktu a; a thahatte lakah misi i bang hi.

¹¹ Eite khempeuh vom bangin i humham a; kawl vakhu bangin i thum ngutngut hi. Thutang i zon hangin khatbeek i mu kei a; i kihut nading a gamla mahmah hi.

¹² Ahang in, nangma muhna-ah ka mawhna uh tam a, ka mawhna un kote langah teci a pang hi. I mawhnate ei tungah omden a, i tatkhialhnate i thei hi;

¹³ Lehdona le kitheihmawhbawlna-in TOPA i langpan a, Pasian i nungngatsan hi. Netniamna le lehdona tawh kisatsuahin i lungsim ah zuauthu i paii hi.

¹⁴ Tua ciangin thutang kithalsawn kik a, thumaan a gamla hi; lampite ah thutak muktu a, thudik a tum thei kei hi.

¹⁵ Koimah ah thutak kimu lo a, gitlohna a pel peuhmah a kiman zawsop hi. TOPA in en a, thutang mu lo ahi manin a lungkim kei hi.

¹⁶ Amah in khat beek a om loh lam mu a, amau tanga ngetsak ding khat beek a muh loh ciangin lunghimawh a, ama khutin ama hotkhiatna semin, ama thumaanna in amah lenkip hi.

¹⁷ Amah in thumaanna awmdalin bulh a, a lu ah hotkhiatna sik lukhu a khu hi; amah in phulakna puan silh a, deihluatna-in kituama puantualpi-in a nei hi.

¹⁸ Amaute sepnasa tawh kizui-in, amah in thuk kik dinga, ama galte tungah thangpai-in a langte dan a thuaksak ding hi; tuikulh mite amau thuak ding bangin a thuk ding hi.

¹⁹ Nitumna lamah mite in TOPA min kihta ding uh a, nisuahkhiatna lamah ama minthanna a zahtak mahmah ding uh hi. Ahang in, TOPA huu in a mut tuikhang vat tawh kibang zui-in a amah hong pai ding hi.

²⁰ "A mawhna uh a kisik Jacob-te kiangah Zion ah Tanpa hong pai ding hi," TOPA in cikhia hi.

²¹ "Kei adingin ahi leh hih in amaute tawh ka thukhun ahi hi" TOPA in a ci hi. "Note sunga om ka Kha le note kam tunga ka guansa kammalte na kam uh tawh kikhenkhia lo dinga, na tate kam, a suan le khakte kam tawh tu le a tawntungin a kikhenkhia kei ding hi," TOPA in a ci hi.