Isaiah 26 - Zokam International Version

Pahtawina La

¹ Tua ni ciangin Judah gamah hi la a kisa ding hi: Khuapi muanhuai khat i nei hi; Pasian in kulhte le a kanhte dingin hotkhiatna a bawl hi.

² A thumaan minamte - upna a nei den minam lut nadingin kongte hong un.

³ Lungsim kippa in nang hong muang ahi manin lung nuamtakin kem ta in.

⁴ A tawntungin TOPA muangun, ahang in TOPA, tua TOPA tawntung Suangpi ahi hi.

⁵ Amah in a sangna-a tengte niamkhiat a, khuapi sangpi a khiasuk hi; leidongin tamsak a, dengkhamin leivui a suah hi.

⁶ A kinengniamte’ khete, mizawngte khekhapte ahi - khete in a tuancil ding hi.

⁷ A thumaante lampi tamkim a; Thutang Pa aw, a thumaante lampi na nelsak hi.

⁸ Hihi, TOPA aw, na thukham b zui-a kalsuan dingin nang kong ngak uh hi: kote lungsim deihna in a tawntunga nangma min phawkna ahi hi.

⁹ Zan ciangin nang kong ngaihsunsun a, zingsang ciangin ka kha in nang hong ngai hi. Leitung ah na thukhenna hong tun ciangin leitung mite in thumaan a thei pan uh hi.

¹⁰ A tatsiate tungah hehpihna a kilah hangin, thumaan a thei thei kei uh hi; thutanna gamah tatsia dingin a kuan laitakun TOPA thupina a thusim tuan kei uh hi.

¹¹ TOPA aw, na khut sangpi in na viktoh hangin amaute in a mu kei uh hi. Na mite adingin na deihluatna musak inla amaute maizumsak in; na galte a kangtum dingin meikuangsa koih khol in.

¹² TOPA aw, ko adingin lemna na kipsak zo hi; ka sepzawhte khempeuh uh ko adingin nangma sepsa ahi hi.

¹³ TOPA kote Pasian aw, nang lo pasian dangte in hong uk uh hangin kote in nangma min bek ka pahtawi uh hi.

¹⁴ Tu-in amaute si uh a, a nungta nawn kei uh hi; a paisa khate a tho nawn kei uh hi. Amaute dan na thuaksak a, na siasak mang hi; amaute kiciamtehna khempeuh na phiatmang hi.

¹⁵ Minam khat nong liansak hi, TOPA aw; ko minam nong liansak hi. Nangmah bek in minthanna na ngah hi; gamgite khempeuh nangma sotsa ahi hi.

¹⁶ TOPA aw, amaute lungdongin nangmah hong zuan uh hi; amaute na sek ciangin thu ngenin a phun thei mialmial bek uh hi. c

¹⁷ Numei gai lai nausuak kuan na sa-in kizia a, a kah bangin kote zong nangma mai-ah kong kiko uh hi, TOPA aw.

¹⁸ Ko zong nau ka paii uh a, na sa-in ka kizia uh hi; ahi hangin huih bek ka suakkhia uh hi. Kote in leitungah hotkhiatna ka puak kei uh hi; leitunga mite tungah bangmah ka semkhia kei uh hi.

¹⁹ Ahi hangin na misi te uh nungta dinga, a pumpite uh a tho ding hi. No leivui laka tengte aw, khanglo unla nuamin kiko un. Na daitui uh zingsang daitui tawh kibang hi; leitung in a misite a hingkhia ding hi.

²⁰ Ka mite aw, pai un, na inndei sunguah lut unla kong kikhaknelh un; ama thangpaihna a bei matengin tawlkhat sung bu phot un.

²¹ En un, leitung mite amau mawhna dan thuaksak dingin a tenna pan TOPA hong paikhia hi. Leitung in ama tunga sisan luannate sin lo dinga; ama thahsate a selcip nawn kei ding hi.