Isaiah 20 - Zokam International Version

Egypt le Cush’ Langah Genkholhna

¹ Assyria kumpipa Sargon in a galkap mang lianpenpa sawlin Ashdod sima a lak kumin -

² TOPA in Amoz tapa Isaiah tungtawnin thu gen hi. Ama kiangah, "Na ippi puan suahkhia inla na khedap kaih zong suah in," a ci hi. Amah in a cih bangin hih a, a guaktangin a kheguakin a pai kawikawi hi.

³ Tua ciangin TOPA in, "Egypt le Cush c tungah lim le a siahil ahi dingin ka nasempa Isaiah a guaktangin a khe guakin kum thum sung a pai bang tektekin

⁴ Egypt galmatte le Cush koltangte a moi a hamin - Egypt maizum nadingin guaktang le kheguakin tawbo dawksa in Assyria kumpipa in a paipih mang ding hi.

⁵ Cush a muangte le Egypt a kisaktheihpihte lau-in a maizum ding uh hi.

⁶ Tua ni ciangin tui gei-a tengte in, "Ei muan mite, Assyria kumpipa pana hong huh ding hong hukhia ding ci-a i belhte bang suak ta uh hiam, en dih un! Bang ci suahtak thei nawn ding i hi hiam?’ ci ding uh hi," a ci hi.