Isaiah 19 - Zokam International Version

Egypt’ Thu Genkholhna

¹ Egypt tawh kisai thusuak: En in, Egypt lam manawhin a manlang meii tungah TOPA hong tuang hi. Ama mai-ah Egypt milimte ling uh a, Egypt-te lungsim a beimang hi.

² "Egypt-te do dingin Egypt-te mah kilok ding uh a - a sanggampa in a sanggampa do-in, a vengpa in a vengpa do dinga; khuapi in khuapi do-in, kumpi-gam in kumpi-gam mah a do ding hi.

³ Egypt-te a lungsim uh bei dinga, amaute ngimna a mawkna ka suaksak ding hi; amaute in milimte le misite’ kha, vankahte le aisante thu a dong ding uh hi.

⁴ A kheltat topa khut sungah Egypt mite ka pia dinga, a kihtakhuai kumpi khat in amaute a uk ding hi," Topa, Thahatpen TOPA in cikhia hi.

⁵ Guntuite kang dinga, gun nuai hulin a keugaw ding hi.

⁶ Hawkguamte namsia dinga Egypt gama luite kiamkiamin a keucip ding hi. Pumpengte le phaite vulgawpin gunpiau a om,

⁷ Nile gun dunga singnote zong a vulgawp ding hi. Nile gun dunga lo kipawi peuhmah keugaw dinga, huih in lenmangin a om nawn kei ding hi.

⁸ Ngasa bengte thumin taamlo ding uh a, Nile sunga ngathang siahte khempeuh, tuitunga lenkhakte a thanem khin ding uh hi.

⁹ Anthul khauhual nasemte lungkia ding uh a, saihadial puan hoih gante a lametna uh a bei ding hi.

¹⁰ Puan tawh kisai nasem peuhmah lungneu ding uh a, sum thalawh khempeuh a lungsim uh a na ding hi.

¹¹ Zion uliante bangmah man loin hai uh a, Pharaoh thulak mipilte in a kimanna om lo thu a lak uh hi. Bangci in Pharoah tungah, "Kei mipil khat ka hi a, tanglai kumpite nungzui khat ka hi hi," ci thei na hi hiam?

¹² Tu-in na mipilte koi-ah om uh hiam? Thahatpen TOPA in Egypt tunga a tunsak dinga a ngimna kilaksak dih in.

¹³ Zoan uliante mihai suakta uh hi. Memphis a makaite kikhem hi; Egypt innkiu suangte in a mite uh lam khialhpih khin uh hi.

¹⁴ TOPA in amaute tungah lung-apna kha buak a; zukhampa a luak lakah a hoi daidai bangin amaute in a sepnasa khempeuh ah Egypt a hoisak daidai uh hi.

¹⁵ Egypt in a lu ahikeh a mei, nisuh hiang ahikeh pumpeng - bangmah a cih thei kei hi.

¹⁶ Tua ni ciangin Egypt mite numei tawh a kibang ding uh hi. Thahatpen TOPA in amaute langah a khut viikin a laptohna hangin lau-in a ling ding uh hi.

¹⁷ Tuateh Judah gam in Egypt mite lausak dinga, amaute langa Thahatpen TOPA geelna hangin Judah mi a kici peuhmah a kihta ding uh hi.

¹⁸ Tua ni ciangin Egypt khuapi ngate in Canaan kam zang ding uh a, Thahatpen TOPA tung kiciamin thu a ciam ding uh hi. Tuate lakah khat Kisiatna Khuapi b kici ding hi.

¹⁹ Tua ni ciangin Egypt laizang ah TOPA tungah biakna-tau khat om dinga a gamgi ah TOPA tunga suangphuh khat a kiphut ding hi.

²⁰ Tua in Egypt gam sungah Thahatpen TOPA tunga lim le teci hi ding hi. Amaute a nengniamte hangin TOPA tungah a kiko uh ciangin amah in amaute honpa khat puakin hu dinga, amaute a suaktasak ding hi.

²¹ Tua ciangin Egypt mite tungah TOPA kilak dinga tua ni ciangin amaute in TOPA a telcian ta ding uh hi. Amaute in biakpiakna le an-a biakna in bia ding uh a; TOPA tungah kiciamin a kiciamna uh a tangtun ding uh hi.

²² TOPA in pulpi tawh Egypt vat dinga, amaute vatin a vatna a damsak ding hi. Amaute TOPA lam ah kihei ding uh a, amah in a thumna uh dawngin a damsak ding hi.

²³ Tua ni ciangin Egypt pan Assyria paina lampi khat a om ding hi. Assyria-te Egypt ah pai-in, Egypt-te Assyria ah a pai ding uh hi. Egypt-te le Assyria-te in a bia khawm ding uh hi.

²⁴ Tua ni ciangin leitung ah Egypt-te tawh kibangin Israel-te le Assyria-te zomin a thumna leitung thupha khat ahi ding hi.

²⁵ Thahatpen TOPA in amaute thupha pia dinga, "Ka mi Egypt-te, ka khutsuak Assyria-te ka innluah Israel-te in thupha ngah ta hen," a ci ding hi.