Isaiah 16 - Zokam International Version

¹ Sela pan sehnel-gam kantanin Zion Tanu vuma om gam-ukte tungah siah dingin tuunote khak un.

² A bu pana kiphawngkhia a leng kawikawi vasa bangin Moab numeite Arnon ngahmunte ah a om uh hi.

³ "Kote thu hong hilh unla thu hong khensatpih un. Sun in na liim zan bangsak in Delhkhiatte sel-in galtaite hek kei un.

⁴ A kidelhkhia Moab-te no tawh omkhawmsak unla; amaute a susia dingte panin liah un." Mi nuainetpa om nawn loin, kisiatna a bei ding hi; leitungpanin a tatsiapa a bei ding hi.

⁵ Itna tawh kumpi tokhom kikipsak dinga; muanhuaina tawh a tungah mi khat tu-in - David innkuan c pan hi dinga - thutang zonga thukhenpa thumaan manlanga a zangpa hi ding hi.

⁶ Moab-te kiphatsakna - ki-uangsaka kisaktheihna le kiliatsakna - ama kihisakna le a kimisakna i za khin hi, ahi hangin ama kisialhpihte a hawmpi ahi hi.

⁷ Tua ahi manin Moab-te kap vangvang uh a, amaute in Moab a kahhuan vangvang uh hi. Kir Hareseth mite d adingin taamlo-in dah un.

⁸ Heshbon lote lah tulta a, Sibmah lengguite zong teekta hi. Minamte’ gamukte in hun khat lai-a sehnel-gam lamah Jazer dong bana a zaam lenggui hoihpente tuancil khin uh hi. Amaute mengkhia a tuipi dongah zaamkhia hi.

⁹ Tua ahi ciangin Sibmah lengguite adingin Jazer kah bangin ka kap hi. Heshbon aw, Elealeh aw, khitui-in hong buakkawt veng aw! na singgah minte tung le na anlakphate tungah lungdamin a kiko na khawl khin hi.

¹⁰ Na singno lei pana nuamna le lungnopna beimangta hi; lenggui lo ah kuamah lasa in kiko nawn lo a; kuamah kikosak nawn lo ka hi manin lengtui sukna-ah kuamah in zu a sukkhia nawn kei hi.

¹¹ Harp bangin ka lungsimin Moab ka taamlawh a, keima sungah Kir Hareseth ka taamlawh hi.

¹² Munsang tungah Moab a kilat ciangin hawmsuak bek a, a biakbukno ah thungen dingin a pai ciangin a lawhsam hi.

¹³ Hih in Moab tawh kisai TOPA genkhiatsa kammal ahi hi.

¹⁴ Ahi hangin tu-in TOPA in: "Kiciamna in a letcip nasempa in a sim banga kisim kum thum sungin Moab’ thupina le a mi tampite kisimmawh dinga, a omlai sunte tawm mahmahin a thanem ding uh hi," a ci hi.