Isaiah 12 - Zokam International Version

Pahtawina Late

¹ Tua ni ciangin, "TOPA aw, nang kong pahtawi ding hi. Kei tungah na heh ngei zongin na hehna dam ta a, kei nong hehnem zo hi.

² Pasian lah ka hotkhiatna hi taktak a; amah muangin ka kihta kei ding hi. TOPA, TOPA ka thahatna le ka la ahi hi; amah ka hotkhiatna suak ta hi," na ci ding uh hi.

³ Hotkhiatna tuikhuk panin lung nuamin tui na khai ding uh hi.

⁴ Tua ni ciangin note in: "TOPA tungah lungdamna ko-in a min lo un; ama sepsate minamte lakah kitheisak unla a min a kitawisangna tangko un.

⁵ TOPA in a minthang nate sem khin ahi manin amah la sak un; leitung khempeuh ah hih thu kitheisak un.

⁶ Note lakah Israel-te Siangtho Pa lian ahi manin, Zion mite aw, ngaihtakin awng unla lungdamna la sa un," na ci ding uh hi.