Isaiah 10 - Zokam International Version

¹ Mizawngte thuneihna heikhiatsak nading, a kinengniam ka mite neihsa suh theih nading, meigongte mat theih nading le pa nei lote na suh theih nadingin

² a ukcip nading thukip bawla, thutang lo thukham a bawlte in gimna thuak ta hen.

³ Gamlapi pan gimna hong pai ciang, thukhenna ni ciangin bang na cih ding hiam? Hong huh dingin kua bel ding na hi hiam? Na hauhna koi-ah nusia ding na hi hiam?

⁴ Thongkiate lakah toncip ding ahikeh a kithatte lakah puk ding longal bangmah dang a om kei hi. Hizahta hi khin napi a hehna dai tuan loin a khut liikto lailai hi.

Assyria tunga Pasian Thukhenna

⁵ "A khut uh ka hehna cianggolh le ka thangpaihna khetbuk-a ka zat Assyria-te tungah gimna tung ta hen!

⁶ Pasian neilo minamte amah ka dosak dinga, kei hong hehsak mite neihsa sutin laksakin kongzing buan bangin amaute ka cilsak ding hi.

⁷ Ahi hangin hih pen ama sawm hi loin, ama ngaihsut ahi kei hi. Ama tupna ahileh susia ding, minamte tampi beisak ding ahi hi.

⁸ Amah in, ‘Ka galkap mang khempeuh kumpi hilo hiam?’ ci hi.

⁹ Calno zong Carchemish bang ta hi lo hiam? Hamath le Arpad kibang ta a, Samaria le Damascus kibang ta hi lo hiam?

¹⁰ Ka khut in milim kumpi gamte a mat bangin a milim suih hoih Jerusalem le Samaria manin -

¹¹ Samaria le a suih milimte ka hih bangin Jerusalem le a suih milimte hih lo ding ka hi hiam?’ ci hi," a ci hi.

¹² Topa in Zion Vum le Jerusalem langkhatah a sep ding khempeuh a zawh ciangin, "Assyria kumpipa a lungsim kiphatsak-luatna le a kihihsak mithek hangin gimna a thuaksak ding hi.

¹³ Ahang in, amah in: "‘Keimah in theihtelna ka neih manin ka pilna le ka khut thahatna tawh ka hih zo hi. Minamte gamgite ka suankhia a, a goute uh ka laksak hi; a thahatpa khat bangin a kumpite uh ka thuzawh b gawp hi.

¹⁴ Vasa bu lak bangin minamte’ hauhna ka laksak a, mite in a pi loihsa vasa tui a khop bangin gamte khempeuh ka khawm a, khat beek in a kha zap loin a ham dingin khat beek a kamka kei hi,’ ci hi," a ci hi.

¹⁵ Azangpa tungah hei kiliansak ding ahi hiam, ahikeh a zangpa tungah sing-attem kisathei ding ahi hiam? Ciangkhut in a khunpa a vei loh bangin khetbuk in sing ahi lo khat a vik kei ding hi.

¹⁶ Tua ahi ciangin Topa, Thahatpen TOPA in ama galhang tha hoihte tungah thabei natna a tungsak ding hi; ama thupina nuai-ah mei kuanglai bangin a kuang den ding hi.

¹⁷ Israel-te Khuavak, mei suak dinga, amaute’ Siangtho Pa meikuang a suak ding hi; ni khat sungin kuang dinga a lingte le a thanglingte kangtum ding hi.

¹⁸ Mi cinapa a gawngtaam bangin a tulak le a lo lei hoih thupina a kisia kiuhkeuh ding hi.

¹⁹ Tuateh a om lai tulak singkungte tawm lua mahmah dinga naupang khat gelh khit zawh zahin a tawm ding hi.

A Baanglai Israel-te

²⁰ Tua ni ciangin a baanglai Israel-te, a suakta Jacob innkuante amau a sattukte tungah kinga nawn loin Israel-te Siangtho Pa, TOPA tungah a kinga taktak ding uh hi.

²¹ A baanglaite kileh kik in a A Thahat Pasian kiangah Jacob a baanglaite a kileh kik ding uh hi.

²² Israel aw, na mite tuipi gei-a sehnel a bang zongin a baanglaite bek hong kileh kik ding uh hi. A husia leh a thumaan siatna a tun nadingin kikhensat khin zo hi.

²³ Leitung buppi tunga tung ding a kikhentatsa siatna Topa, Thahatpen TOPA in a semkhia ding hi.

²⁴ Tua ahi ciangin hih in Topa, Thahatpen TOPA gen: "Zion a teng ka mite aw, Egypt-te hong hih bangin cianggolhin hong sat a, no langa khetbuk a liik Assyria-te kihta kei un.

²⁵ No tunga ka hehna a sawt loin bei pah dinga, ka thangpaihna amaute siatna lamah kihei ding hi," a ci hi.

²⁶ Thahatpen TOPA in Oreb suangtumpi a, Midiante a sattuk bangin amaute khauteepin vat dinga, Egypt a a hih bangin tui tung tengah a ciangkhut a viik ding hi.

²⁷ Tua ni ciangin amaute vangik na liangko panun hong kisankhia-in na ngawng panun b hakkol hong kisankhia ta ding hi; note thau lua ta ding na hi manun hakkolte a kisutan ding hi.

²⁸ Amaute Aiath ah lut uh a; Migron kantanin Michmash ah a van uh a khol uh hi.

²⁹ Amaute in mualciang kantanin, "Geba ah zanin giahphual sat ni," a ci uh hi. Ramah a kiling hi; Saul tenna Gibeah-a tai uh hi.

³⁰ Gallim Tanu aw, awng khia in! Laishah aw, ngai in! Anathoth hehpihhuai si cia!

³¹ Madmenah taikek ta; Gebim mite bubu lai uh hi.

³² Tuni mahmah in Nob ah khawl uh hi; amaute in Zion Tanu mual le Jerusalem mualneute a khuttum uh a liiksan ding uh hi.

³³ En un, Topa, Thahatpen TOPA in a vanglianpi tawh a hiangte a heuhkhia ding hi. Singkung sangpite puk ding uh a, a sangtuamte a kiniamsak ding hi.

³⁴ Amah in tulak singte hei-in phuk dinga Thahat-Pa mai-ah Lebanon a puk ding hi.