Isaiah 1 - Zokam International Version

¹ Judah kumpi Uzziah, Jotham, Ahaz le Hezekiah-te hun sunga Judah le Jerusalem tawh kisai Amoz tapa Isaiah in a mangmuhna ahi hi.

A Lehdo Minam

² Vante aw, za un! Leitung aw, ngai in! TOPA in gen khin zo hi. "Tate ka khoi a, khang lian khin uh hi, ahi hangin amaute in kei hong lehdo uh hi.

³ Bawngtal in a pu thei hi, laa in a neipa’ gan ankuang thei a ahi hangin Israel in thei loin ka mite in a theitel kei uh hi.

⁴ Ah! Amawhdim minam khialhna netcip mite a gilote suante siatna-a ka piaksa tate ahi uh hi. Amaute in TOPA taisan uh a; Israel Siangtho Pa simmawhin amah nungngatsan uh hi.

⁵ Bang hangin note hong kisat beh lailai ding ahi hiam? Bang hangin lehdo lailai na hi uh hiam? Na lutang buppi liam khin a, na lungsim buppi gimlua khin hi.

⁶ Na khepek nuai-a kipan na sipzang dong a damna mun om lo a - liamna sidup le meima naiphual bek omin kihah lo, kitun loin sathau lah a kinuh kei hi.

⁷ Na gam uh kilawi ta a, na khuapite uh mei-in kihaltum hi. Gamdang mite in na muhtang un na gam uh hong sut uh a, khualmite in susia khin ta uh hi.

⁸ Zion Tanu, lenggui lo-a bukkhel bang, tangmai huan a hampheng bang le a ki-umcih khuapi bangin kinusia ta hi.

⁹ Thahatpen TOPA in eite tawmno khat hong sit lo hileh Sodom tawh kibang khinin Gomorrah tawh i kibang khin ding hi.

¹⁰ Sodom gam-ukte aw, TOPA kammal za un; Gomorrah mite aw, i Pasian thukham ngai un!

¹¹ TOPA in, "Tua zahta-a tam na biakpiakna uh - kei adingin banga kimang ahi hiam?" ci hi. "Tuutalte le ganhing vakthaute’ thaute tawh meihal biaknate ka kham lua ta hi. Bawngtalte, tuunote le keelte sisan tawh ka lungkim kei hi.

¹² Kei tawh kimu dinga nong pai ciangun ka inntualte hih banga tuancil dingin kua in hong sawl hiam?

¹³ A khiatna nei lo biaknate hong kengkeng nawn kei un! na gimnamtui uh ka kih hi. Kha det nite, Sabbath-te le kikhopna thupite - na gitloh kikhopnate uh ka thuakzo nawn kei hi.

¹⁴ Na Khadet pawite uh le na pawi tuamtuamte uh ka hinna-in ka mudah hi. Tuate kei adingin vangik suak a; tuate pua-in ka gim hi.

¹⁵ Na khut uh zakin thu na nget uh ciangin ka mai kong selsan hi; thu tampi na nget uh hangin ka ngai tuan kei ding hi. Na khutte uh sisan tawh kidim hi;

¹⁶ sil unla no le no kisiangsak un! Na gamtatsiate uh ka muhna ah sem nawn kei un! Na bawlbawl uh khialhnate tawpsan unla,

¹⁷ thumaan sin un! Thutang zong un, a kinengniamte a hanthawn un. Pa nei lote hu unla, meigongte thu gensak un.

¹⁸ "Tu-in hong pai un, kikumkhawm dih ni," TOPA in ci hi. "Na mawhnate uh ausan bangin a san hangin vuk bangin a pak ding hi; kheisan bangin a san hangin tuumul bangin ngo ding hi.

¹⁹ Note in utin thu na man uh leh na gamsungua piang a hoih pen na ne ding uh a;

²⁰ ahi hangin hong langpanga nong lehdo uh leh namsau in hong nawmvalh ding hi," Ahang in, TOPA kam in a gensa ahi hi.

²¹ En dih un, bangci banga a muanhuaisa khuapi numei kizuak suak zawzen ahi hiam! Khatvei lai-in thutang tawh kidim hi; ama sungah thumaanna teng a, tu-in lah tualthatte bekbek teng ta!

²² Na ngunte sumngo-ek suaka, na zucil pente tui kihelin peeng ta hi.

²³ Na gam-ukte a lehdote suakin gutate tawh kipawl uh hi; amaute in golhsum iplah uh a, a mawk piak dingte nungzuih uh hi. Amaute in pa nei lote panpih lo uh a, meigongte thu a sang kei uh hi.

²⁴ Tua ahi ciangin Topa, Thahatpen TOPA , Israel-te Thahatpen Pa in: "Ah, ka galte panin ka honkhia dinga kei mahmah in ka galte phu ka la ding hi.

²⁵ Note langkhatah ka khut liik-in na saam-ek teng uh ka siaksiang mang dinga, na siantholohnate uh ka hemkhia mang ding hi.

²⁶ Hunlui lai bangin na thukhente uh omsakin na thudotte uh a tunglai ka bangsak ding hi. Tua teng khit ciangin nang Thumaanna Khuapi, A Muanhuai Khuapi hong kici ding hi," cikhia hi.

²⁷ Thutangin Zion kitankhia dinga, ama sunga kisikkik mite thumaanin kitankhia ding uh hi.

²⁸ Ahi hangin a lehdote le mawh neite kisia khawm ding uh a, TOPA a taisante a mangthang ding uh hi.

²⁹ "Nuam na sak mahmah uh tawsaw kung siangthote hangin na maizum ding uh hi; na deihtel uh huante hangin na zahlak ding uh hi.

³⁰ Note tui a om lo huan bangin, a tehpulhsa tawsaw na bang ding uh hi.

³¹ Mi thahatpa lee suak dinga ama nasep mei-ek suakin a nihin kangtum khawm dinga tua mei kuamah in a phelh zo kei ding hi," a ci hi.