Hosea 8 - Zokam International Version

Israel in Pingpei At ding

¹ "Na pengkul na muk tawh tuah in! Mite in ka thukhun palsatin, ka thukham lehdo khin uh ahi manin TOPA innkuante tungah muvanlai khat a om hi.

² Israel in kei tungah, ‘Kote Pasian aw, nang kong thei ta hi!’ ci-in hong kiko hi.

³ Ahi hangin Israel in a hoih nial khin zo hi; galte khat in amah a nungdelh ding hi.

⁴ Kei thukimna loin kumpite koih uh a, kei kipsak lohin gam ukte a teel uh hi. Amaute mah a siat nadingun amaute mah in ngun le kham tawh milimte a bawl uh hi.

⁵ Samaria aw, na bawngno lim paikhia in! Tuate langah ka hehna kuang hi. Amaute bangtan vei siantho thei lo lai ding hiam?

⁶ Amaute Israel pan ahi uh hi! Hih bawngno - khutsiampa bawl ahi hi; Pasian ahi kei hi. Tua Samaria bawngno kisunen ding hi.

⁷ "Amaute in huih vawh uh a, pingpei a at uh hi. Ankung in vui nei lo-a, tua in annel a piangsak kei ding hi. A tang gahsak ta leh gamdangte in valhtum ding uh hi.

⁸ Israel kivalhtum hi; tu-in amah kimanna a nei lo na khat bangin minamte lakah a om hi.

⁹ Ahang in a tangtat gamsung laa bangin amaute Assyria ah paito uh hi. Ephraim amah leh amah a lawmpate tungah a kizuak khin hi.

¹⁰ Minamte lakah amau le amau a kizuak khit uh hangin tu-in amaute ka kaikhawm kik ding hi. A thahat kumpipa netniamna nuai-ah amaute a thakiam uh kipan ta ding hi.

¹¹ "Ephraim in mawhna hanga biakna dingin biakna-tau tampi a dawh hangin hihte mawhna bawlna tau a suak hi.

¹² Amau adingin ka thukham nate tampi gelh ta leng, a tuamdang na khatin a sim uh hi.

¹³ Amaute in kei tungah hong kipia biaknate hong pia-in a sa ne uh a, ahi hangin tuate ah TOPA a lungkim kei hi. Tu-in amah in amau gitlohnate ciamteh dinga, a mawhnate uh dan pia ding hi. Amaute Egypt ah kileh kik ding uh hi.

¹⁴ Israel in amah a Bawlpa mangngilh hi; kumpi-inn a lam hi. Judah in khuapi neu tampi kulhin a um hi. Ahi hangin a khuapite uh tungah mei ka sawl dinga, a kulh muanhuaite uh tua in a kang tum ding hi," a ci hi.