Hosea 14 - Zokam International Version

Kisikna in Thupha Puak

¹ Israel aw, TOPA na Pasian lamah kihei in. Nang mawhnate in na pukna ahi hi.

² Kammalte keng inla TOPA kiangah kihei in. Ama kiangah: "Ka mawhna khempeuh uh hong maisak inla ka muk a gahte uh nang kong piak theih nadingun, nong hehpihna-in kote hong sang in.

³ Assyria in kote hong hon thei lo hi. gal sakol tungah ka tuang kei ding uh hi. Pa nei lote in nang tung pan khuatuahna mu uh ahi manin kote in ka khut uh tawh ka bawlte uh tungah ‘Kote pasiante’ ka ci nawn kei ding uh hi." ci un.

⁴ "Amaute tungah heh nawn lo ka hi manin amaute lampialna ka damsak dinga, man ngen loin ka it ding hi.

⁵ Israel-te tungah keimah daitui ka bang dinga, amah unok pak bangin a pak ding hi. Lebanon tamtak bangin a zung khasuk ding hi;

⁶ a hiang mengte a khangkhia ding hi. Ama thupina olive kung khat bang dinga, ama namtuina Lebanon tamtak kung khat a bang ding hi.

⁷ Ama liim ah mite teng kik ding uh a, ankung bangin amah khanpha ding hi. Lenggui khat bangin amah pak dinga, ama minliatna Lebanon pana zu tawh kibang ding hi.

⁸ Ephraim aw, milimte banga mang nawn ding ka b hi hiam? Amah ka dawng dinga, amah ka don ding hi. Keimah taksing hing ka bang hi; na gahphatna kei tung pan ahi hi."

⁹ A pil kua ahi hiam? Amah in hih nate thei ding hi. Thu theikak kua ahi hiam? Tuate a mah in theitel ding hi. TOPA lampite maan hi; thumaante in tuate tawn uh hi, ahi hangin a lehdote tuate ah a kimuktu uh hi.