Hosea 13 - Zokam International Version

Israel Tunga TOPA Hehna

¹ Ephraim a pau ciangin mite ling uh hi; Israel ah amah kitawisang hi. Ahi hangin amah in Baal a biakna hangin khiala a si hi.

² Tu-in amaute in mawhna a bawl thuahthuah uh hi; amau ngun panin amau mah in milimte bawl uh a, piltakin limsuaite zem uh hi; tuate khempeuh khutsiamte bawl ahi hi. Tua pen hih mite tungah, "Amaute in mihing biakna-in pia uh a, bawngno limte a nam c uh hi," ci-in kigen hi.

³ Tua ahi ciangin amaute zingsang meiilum bang ding uh a, a mangthang zingsang dainom bangin, ancilna pana ansi kizap leng bang ding uh a, tawhlet pana meikhu suakkhia a bang ding uh hi.

⁴ "Ahi hangin Egypt panin hong paikhiatpih dTOPA note Pasian ka hi hi. Note in keimah longal Pasian dang na nei kei ding uh a, kei mah longal Honpa dang na nei kei ding uh hi.

⁵ Kei mah in sehnel-gam nisa hong katna ah nang kong kem hi.

⁶ Amaute ka vak ciangin gilvah uh hi; amaute a gilvah uh ciangin kiphasak uh hi; tua ciangin kei hong mangngilh uh hi.

⁷ Tua ahi ciangin amaute tungah humpinelkai bang le gialbem bangin ka pai dinga, lam gei-ah ka pang ding hi.

⁸ A no kilaksak vompi bangin amaute ka sim dinga, ka balkham ding hi. Humpinelkai bangin amaute ka valh dinga; gamsa gilo khat in amaute a balnen ding hi.

⁹ "Israel aw, nang hong huhpa keima langah pang na hi manin nang hong kisusia hi.

¹⁰ Nang hong hon thei dingin na kumpipa koi-ah om ahi hiam? Na khuapi khempeuh ua ukpite, "Kumpi khat le thukhente kei hong pia in," na cihte uh koi-ah om ahi hiam?

¹¹ Tua ciangin ka heh suakin kumpi khat kong pia-a, thangpaisa-in amah ka lakhiamang hi.

¹² Ephraim khialhna kikhol khawma, ama mawhnate kiciamteh hi.

¹³ Ama tungah numei nausuah nat bangin tunga, ahi hangin amah pilna a nei lo naupang khat ahi hi; a hunin a tut ciangin naubu kihong napi a paikhia kei hi.

¹⁴ "Hankhuk e vangliatna panin amaute tatna sum ka pia ding hi; sihna panin amaute ka tankhia ding hi. Sihna aw, na gimna koi-ah om hiam? Hankhuk f aw, na siatsakna koi-ah om hiam?

¹⁵ "Ama sanggamte lakah a khanpha pen zawzen zongin ka khuatuah kei ding hi. TOPA kiang panin nisuahna huih khat hong pai-in, sehnel-gam panin mut ding hi; a tuinak kangin a tuikhuk keucip ding hi. Ama vankholna inn kiluhin a goute khempeuh kisutmang ding hi.

¹⁶ Samaria mite in Pasian langah lehdo uh ahi manin amau khialhna thuak ding uh hi. Amaute namsau in puk ding uh hi; a ta ngekte uh leilak kidenna-in, a numei gaite uh kikuikham ding hi" ci hi.