Hebrews 2 - Zokam International Version

Thudon dinga Vauhilhna

¹ Tua ahi manin eite i tolhmang loh nadingin i zaksa thute limtakin i thudon semsem kul ding hi.

² Ahang in, vansawltakte gen thupuak kip zo a; tua thu zui loin a palsatte in gawtna diktak thuak tektek uh ahileh,

³ tua zahtaka thupi hotkhiatna thudon kei lehang bang i ci suahtak zawh ding hiam? Hih hotkhiatna a masa penin Topa in a genkhiat, ama gen a zate in ei tunga a kipsak ahi hi.

⁴ Pasian in zong limte, a lamdangte le nalamdang tuamtuamte le ama deih banga a hawm Khasiangtho letsongte tawh tua thu teci a pang hi.

A Sanggamte tawh kibangin Jesu Kibawl

⁵ Eite gen mailam huna hong om ding leitung pen vansawltakte nuai ah a koih kei hi.

⁶ Ahi hangin mi khat in teci a pannasa mun khat ah: "Nang ngaihsut tham dingin mihing bang hi-a, na thudon dingin mihing tapa bang ahi hiam?

⁷ Vansawltak sangin a niam zawzek b in na bawl a; minthanna le pahtawina khusak in,

⁸ ama khepek nuai-ah na khempeuh na koih hi," c ci hi. Na khempeuh ama nuai ah koih a, Pasian in ama nuai ah a koih loh bangmah a om kei hi. Tua hi napi tu tadihin na khempeuh ama nuai-a omin i mu kei hi.

⁹ Ahi hangin vansawltakte sangin a niam zawdeuh a kikoih phot Jesu in, Pasian hehpihna hangin mi khempeuh adinga sihna a ciap theih nadingin sihna a thuak manin tu-in minthanna le pahtawina a kikhusak eite in i mu hi.

¹⁰ Tapa tampi minthanna ngahsakna ah ama ading le ama tungtawna na khempeuh a omna pa Pasian in, amaute hotkhiatna a piangsak pa thuakna tungtawna, a bukimsak ding mah kilawm hi.

¹¹ Mite a siangthosak pa le a kisiang thosakte innkuan khat hi khawm hi. Tua ahi ciangin amaute sanggamte cih ding, Jesu a maizum kei hi.

¹² Amah in, "Ka sanggamte tungah na min ka pulak ding hi; mihonte kikhopna ah nang phatna la ka sa ding hi," d

¹³ Tua ciangin, "Amah ka muang ding hi," e ci kik hi. Amah in, "Pasian in kei hong piaksa tate tawh, hiah ka om hi," f ci leuleu hi.

¹⁴ Tate in si le sa nei ahi nungsang amah in zong a sihna tungtawn a, sihna vangliatna a nei dawimangpa, a suksiat theih nading

¹⁵ le a nuntak sung teng sih ding launa sila-a omte a suahtak theih nadingin amaute mihing hina hong tang hi.

¹⁶ Ahang in, a taktakin ama huh vansawltakte hi loin Abraham suan le khakte hizaw hi.

¹⁷ Hih thu hangin Pasian na a sepna sungah mi lainat siam le a muanhuai tulpi a suah nading le mite mawhnate thoihdamna a bawl theih nadingin g lam khempeuh ah a sanggamte mah bangin hong suah ding mah ahi hi.

¹⁸ Bang hang hiam cih leh zia-etna a thuakte a huh theih nadingin amah zong kizia-etin a thuak hi.