Ezra 1 - Zokam International Version

Cyrus in Saltangte Ciah Nading Huh

¹ Persia kumpipa Cyrus kumpi a suah zawh a kum khatna kumin, Jeremiah tunga TOPA thugen a tangtun nadingin TOPA in Persia kumpipa Cyrus lungsim ah suaksak a, a kumpi gamsung khempeuh ah tangkosak in lai-a gelhsa-in a koihsak hi:

² "Persia kumpipa Cyrus gen hih ahi hi: "‘TOPA vantung Pasian in leitunga kumpi-gam khempeuh kei hong pia a, Judah gam Jerusalem ah ama adingin biakinnpi khat lam dingin kei hong seh hi.

³ Note laka om ama mi peuhmah - a Pasian in ompih henla, Judah gama Jerusalem ah paito-in, TOPA, Israel Pasian - Jerusalem a om Pasian biakinnpi lam hen.

⁴ Tuateh a suakta lai-te in tuhuna a tenna munmun panun amah huh uh henla, ngun tawh, kham tawh, nate le ganhingte tawh, le utthu-a biaknate tawh Jerusalem a Pasian biakinnpi lampih uh hen,’ ci in," a ci hi.

⁵ Tua ciangin Judah le Benjamin innkuan makaite, siampite le Levi-te - Pasian in a lungsima a phawksak peuhmah - paito in Jerusalem a TOPA inn lam dingin a kithawi uh hi.

⁶ A vengte khempeuh un ngun le kham tawh kibawl vanzatte, nate le ganhing le utthu-a biaknate khempeuh banah letsong manphate tawh a huh uh hi.

⁷ Tua tham loin Nebuchadnezzar in Jerusalem panin puakhia-a ama pasian a biakinn a, a koih, TOPA biakinnpi tawh kisai vanzatte Kumpi Cyrus in a pusuahkhia hi.

⁸ Persia kumpipa Cyrus-in sumkempa Mithredath puaksak a Judah ukpa Sheshbazzar kiangah a simsak hi.

⁹ Tua nate hih teng ahi hi: kham kuang 30 ngun kuang 1,000 ngun kuangdai b 29

¹⁰ kham kuang-uk 30 ngun kuang-uk tuamtuam 410 vanzat dangte 1,000

¹¹ Ngun le kham vanzat khempeuh a vekin 5,400 ahi hi. Sheshbazzar in, saltangte Babylon pan Jerusalem ah a paitoh ciangin hihte khempeuh a puakto hi.