Daniel 6 - Zokam International Version

Humpinelkai Kua sungah Daniel

¹ Darius in a kumpi-gam sung uk dingin gamkhen-uk 120 koiha

² amaute tungah a uksawn dingin mi thum koihin tuate lakah khatna Daniel dingin a lungkim hi. Kumpipa a sup loh nadingin gamkhen-ukte tungah tuate in thuneihna nei uh hi.

³ Tua thu vaihawmpite le gamkhen-ukte lakah Daniel kivatuam diaka, kumpipa in a gambup a uksak dingin a geel hi.

⁴ Hih thu hangin thuvai-hawmpite le gamkhen-ukte in Daniel mawhsak nadingin a kumpi nasepna ah encikin mawhzon uh hi; ahi hangin bangmah cih thei lo uh hi. Amah muanhuai-in ngentela na lopthop sep lo ahi manin nawngkaisak nading a mu zo kei uh hi.

⁵ A tawpna ah tua mite in, "Hih Daniel pen a Pasian thukham tawh kisai-in bang khatpeuh hih ding i hi kei ngal leh amah i mawhmat nading thu khatpeuh i mu zo kei ding hi," a ci uh hi.

⁶ Tua ciangin thuvai-hawmpite le gamkhen-ukte kipawlin kumpipa kiangah paikhawm uh a, "Kumpipa Darius aw, na khan sawt hen!

⁷ Kumpipa aw, nangmah in thukip khat bawlin, tu-a kipan ni sawmthum sungin nang longal mi khatpeuhin pasian khatpeuh ahikeh mi khatpeuh tungah thungen a om leh humpinelkai kua sungah kilawn ta hen, ci lecin a, tua thukiptakin kizui leh ci-in ko kumpipa thuvai-hawmpite, uliante, gamkhen-ukte, thudotte le ukpite khempeuh ka vekun ka thukim uh hi.

⁸ Kumpipa aw, tu-in tua thukip suaksak inla Media-te le Persia-te upadi a kikhel loh bangin a kikhel loh nadingin lai-in gelh in" a ci uh hi.

⁹ Tua ciangin Kumpipa Darius in thukip a gelh hi.

¹⁰ Daniel in tua thukip kihawmkhia khin zo hi, cih a theih ciangin Jerusalem lam nga-a kongvangneu kihong, ama omna inntung inndei ah a pai hi. A hih ngei bangin ni khatin thumvei khukdinin thu ngen-a a Pasian tungah lungdam a ko hi.

¹¹ Tua ciangin hih mite a honin va pai uh a Daniel in Pasian huh nading a nget laitak a tuak uh hi.

¹² Tua ciangin amaute kumpipa kiangah pai-in a thukip suahsak tawh kisai hopih uh a: "Tu-a kipan ni sawmthum sungin mi khatpeuh, nang tung longal pasian khatpeuh ahikeh mi khatpeuh tungah thungen a om leh, "Kumpipa aw, humpinelkai kua sungah kilawn ta hen, cih thukip hawmkhia khin hi lo na hi hiam?" a ci uh hi. Kumpipa in, "Thukip a kiplai hi - Media-te le Persia-te upadi tawh kizui-in a kikhel kik thei nawn lo ding ahi hi," ci-in a dawng hi.

¹³ Tua ciangin amaute in kumpipa kiangah, "Judah salte lakah Daniel kicipa khat in, kumpipa aw, nang le nangma gelhsa thukip a thusim kei hi. Ni khatin thumvei thu ngen lai hi," a ci uh hi.

¹⁴ Kumpipa in hih thu a zak ciangin a lungdong mahmah hi; Daniel hutkhiat sawma nitum dongin a hotkhiat theih nading a ngaihsun hi.

¹⁵ Tua ciangin mite a honin kumpipa kiangah pai uh a, "Kumpipa aw, Mediate le Persia-te upadi tawh kizui-in kumpipa in a suahkhiatsaksa thukip ahikeh thukhote a kikhek theih loh lam phawk in," a ci uh hi.

¹⁶ Tua ciangin kumpipa in thu pia a, amaute in Daniel paipihin humpinelkai kua sungah a lawn uh hi. Kumpipa in Daniel kiangah, "A tawntunga ama na na sep na Pasian in nang hong hukhia ta hen!" a ci hi.

¹⁷ Suangtumpi khat khukin humpi-nelkai kuavang a huk khit uh ciangin Daniel omzia a kikhel theih loh nadingin kumpipa in a seal khetna zungbuh-in ciamteh a, a uliante zungbuh-in zong a ciamteh uh hi.

¹⁸ Tua ciangin kumpipa a inn ah ciah a, bangmah ne loin, ama ading gualnopna bangmah a bawlsak kei hi. Tuaci-in a ihmu thei kei hi.

¹⁹ Khuavak phetin kumpipa tho a, humpinelkai kua ah a paipah vingveng hi.

²⁰ Tua kuavang gei a tun ciangin aw lingsa in, "A nungta Pasian nasempa Daniel aw, a tawntunga ama na na sep na Pasian in humpinelkaite panin hong hukhia hiam?" a ci hi.

²¹ Daniel in, "Kumpipa aw, na khan sawt hen!

²² Ka Pasian in a vansawltak hong sawlin amah in humpinelkaite kam a humsak hi. Ama muhna ah mawhpeng ka hi manin hong liamsuah kei uh hi. Tua tham loin kumpipa aw, na mai-ah bangmah ka khial kei hi," a ci hi.

²³ Kumpipa lungdam lua a, humpinelkai kua sung pan Daniel a kaihkhiat nadingun thu a pia hi. Humpinelkai kua sung pan Daniel a kikaihkhiat ciangin a Pasian a muan manin a ci tungah liamma khat beek a kimu kei hi.

²⁴ Kumpipa thupiakna bangin a maan lopi-a Daniel a hekte a zite le a tate teng uh tawh kipaipih in humpinelkai kua sungah kilawn khawm hi. Amaute humpinelkai kua taw zong tu man loin humpinelkaite in bawh uh a, a guhte khempeuh uh a balzan gawp uh hi.

²⁵ Tua ciangin Kumpipa Darius in gam sung buppi ah mite, minamte le pau nam tuamtuamte tungah lai paisak a: "No tungah daupaina lianpi tung ta hen!

²⁶ "Thukip khat kong piak inah: Ka kumpi-gam mun tuamtuama mite khempeuh in Daniel Pasian kihta in a zahtak pelmawh ding uh hi. "Ahang in, amah a nungta Pasian hi a, a om tawntung ahi hi; a kumpi-gam kisusia ngeilo dinga, ama ukna a bei ngei kei ding hi.

²⁷ Amah in hu-in honkhia hi; vante le leitungah lim le a lamdangte a bawl hi. Amah in humpinelkaite vangliat na panin Daniel a hukhia hi," ci-in a gelh hi.

²⁸ Tua ciangin Darius le Persia mi Cyrus a in kumpi a sep hun sungin Daniel a lamzang mahmah hi.