Amos 8 - Zokam International Version

Singgah Min Seng Khat

¹ Thupipen TOPA in kei hong lah hih ahi hi: singgah min seng khat ahi hi.

² Amah in, "Amos aw, bang na mu hiam?" ci-in hong dong hi. Ken, "Singgah min seng khat," ci-in ka dawng hi. Tua ciangin TOPA in kei kiangah, "Ka mi Israel-te adingin ahun min ta hi; amaute ka hawi nawn peuhmah kei ding hi..

³ "Tua ni ciangin biakinnpi sunga la kisa khempeuh thumna e suak ding hi. Misi luang tam na lawmlawm e - mun khempeuh lah a dim a! Dai dide tah!" TOPA in a ci hi.

⁴ A cimawhte tuancil a, gam sunga mizawngte sumang a,

⁵ no, "Ante zuak theih nadingin Kha Thak cik ciangin cing dinga, mangbuh i zuak theih nadingin Sabbath cik ciangin bei ding hiam? - tehnate neusakin, aman tampi-in deka, tawikhaina maan lo zangin, mite khema,

⁶ mizawngte ngun tawh lei-in, a cimawhte khedap kaih bu khatin lei-a, mangbuh le mangbuh sii zuakkhawm nuam si hang," a cite aw, za un.

⁷ Jacob Kiphatsakna lo-in TOPA kiciama, "A hihsate uh khat beek ka mangngilh ngei kei ding hi.

⁸ "Hih thu hangin lei kiling loin a sungate thum lo ding uh ahi hiam? Nile bangin gam buppi a khang ding hi; khangto dinga Egypt gun bangin a kiamsuk kik ding hi.

⁹ Thupipen TOPA in, "Tua ni ciangin sun laitakin ni ka tumsak dinga, ni tan phat laitakin leitung ka mialsak ding hi.

¹⁰ Na biakna pawite uh thumna ka suaksak dinga, na la saksakte uh kahna ka suaksak ding hi. Na vekun puan hampi silh kong suaksak dinga na lu uh na mettol ding uh hi. Tua hun ciangin tapa khat neihsun hanga thum kong bangsak dinga, a tawpna ah khaatna ni a bang ding hi.

¹¹ "Leitungah kialpi kong tunsak ciangin - an duh, tui duh dangtak-a kialna hi loin TOPA kammalte zaknopna kialpi hi ding hi. Tua hun hong tung ta hi." Thupipen TOPA in cikhia hi.

¹² Mite, tuipi khat pan tuipi khat, leilu-lam pan nisuahna lamah hoikawmsa in vak kawikawi-in TOPA kammal kan ding uh a, ahi zongin a mu kei ding uh hi.

¹³ Tua ni ciangin, "A ithuai nungakte le tangval thahatte dangtakin a bah ding uh hi.

¹⁴ Samaria maizumna a tawh a kiciamte ahikeh, ‘Dan aw, na pasian nuntakna lo in,’ ahikeh Beersheba pasian b nuntakna lo-in ci-a kiciamte - amaute a tho kik nawn lo dingin a puk ding uh hi," a ci hi.