Amos 7 - Zokam International Version

Kauphe, Mei le Khaukhai

¹ TOPA in kei hong lah hih ahi hi: Kumpipa tanh ding teng a kilak khit phet sel kik dinga a kipat laitakin kauphe honpi a omsak hi.

² Tuate in gamsung khempeuh a gaih siang khit ciangin,"Thupipen TOPA aw, a mawhna maisak hoh in! Jacob in bangci thuak zawh ding ahi hiam? Amah neu lua mahmah hi lo hiam?" ci-in ka awngkhia hi.

³ Tua ciangin TOPA in a hehna a khiam hi. TOPA in, "Hih thu a piang nawn kei ding hi," a ci hi.

⁴ Thupipen TOPA in kei tungah hong lah hih ahi hi: Thupipen TOPA mei tawh thukhen dingin kipan hi; tua mei in tui thukpite keusak a, leitung a hultum hi.

⁵ Tua ciangin Thupipen TOPA aw, khawl tapeuh in! Jacob in bangci thuakzawh ding hiam? Amah neu lua mahmah hi lo hiam?" ci-in ka awngkhia hi.

⁶ Tua ciangin TOPA in a hehna a khiam hi. Thupipen TOPA in, "Hih zong a piang nawn kei ding hi," ci hi.

⁷ Hih in ama hong lah ahi hi: Khaukhai maantakin kikhai-a a kiciang kulh gei-ah khaukhai tawi kawmin Topa a ding hi.

⁸ TOPA in kei kiangah, "Amos aw, bang na mu hiam?" ci-in hong dong hi. "Khaukhai khat ka mu hi," ci-in ka dawng hi. Tua ciangin Topa in, "En in, ka mi Israel-te lak khaukhai-in ka en hi; amaute ka hawi nawn kei ding hi.

⁹ "Isaac munsangte kisusia dinga, Israel munsiangthote a kisusia ding hi; Jeroboam innkuante do dingin ka namsau ka kuansak ding hi," a ci hi.

Amos le Amaziah

¹⁰ Tua ciangin Bethel a siampipa Amaziah in Israel kumpipa Jeroboam tungah thu puak a, "Amos in Israel-te laizang takah nang do hong sawm hi. Ama thugen gam sung tengin thuak zo lo hi.

¹¹ Tua hi-a Amos in thugen a: "Jeroboam namsau in si dinga, amau leitang panin Israel salin kikaikhia taktak ding hi,’ ci hi," a ci hi.

¹² Tua ciangin Amaziah in Amos tungah, "Nang thumupa paikhia! Na Judah gamah ciah kik in. Tua lai-ah na nuntak nading na sem inla kam va sang in.

¹³ Bethel ah kam sang nawn peuhmah kei in. Bang hang hiam cih leh hihtak kumpite munsiangtho hi-a, kumpi-gam biakinnpi ahi hi," a ci hi.

¹⁴ Amos in Amaziah kiangah, "Kei kamsang lah hi loin kamsangpa tapa zong ka hi kei hi, tuucing khat ka hi a, theiba huan kep tawh a thuah ka hi hi.

¹⁵ Ahi hangin TOPA in ka tuucinna panin hong lakhia a kei kiangah,"Pai inla ka mi Israel-te tungah thu va gen in," hong ci hi.

¹⁶ Tua ahi ciangin tu-in TOPA thugen za in. Nang in, ‘Israel-te langah thu gen nawn kei in, Isaac innkuante langkhat ah na thu hilhhilh tawp in,’ nong ci hi.

¹⁷ "Tua ahi ciangin TOPA thugen hih ahi hi: "‘Khuapi sungah na zi kizuak dinga, na tanute na tapate namsau-in a puk ding uh hi. Na leitang kitehin kihawmthang dinga, lawkite d gam ah nang na si ding hi. Tuateh Israel-te amau leitang pan salin a kikaikhia pelmawh ding hi,’ ci hi," a ci hi.