Amos 6 - Zokam International Version

Minuamsate Tungah Gimna

¹ Zion a nuam a sa hithiatte, Samaria Vum a lungmuanga omte minamte ulianpente, Israel paikhiatnate, gimna nak thuak na nucia!

² Calneh ah pai-in va en dih un; tua pan Hamath ah va pai un tua khitteh Philistia-a Gath dong paisuk un. Tua kumpi-gamte sangin note hoihzaw na hi uh hiam? Amau leitang no aa sangin zazaw ahi hiam?

³ Gitlohna ni tawh kipelh na sawm uh a, lauhuaina mun kitun na suak zawsop uh hi.

⁴ Saiha lupna tungah lumin tutna zaal ah na kingam hithiat uh hi. Tuuno sa le keelno vakthau sa duh zawkzawk na ne uh hi.

⁵ David bangin na harp-te uh na ututun na tum uh a, tumtheihte na bawltawm uh hi.

⁶ Hai lianpipi dimin zu na dawn uh a, nilhthau hoihpente in na kizut uh hi. Tua hi napi Joseph-te siatna hangin na dah kei uh hi.

⁷ Tua ahi manin note sala kikai masate lakah na kihel ding uh hi. Na pawibawlna uh le na kingap hithiatna uh a bei ding hi.

Israel-te Kiphatsakna TOPA in Kih

⁸ Thupipen TOPA amahmah kiciam khin a - TOPA Thahatpen Pasian in genkhia hi: "Jacob kiphatsakna ka kih a, a kulh muanhuaite uh ka hua hi; khuapi le a sunga om na teng ka hukhia ding hi,"

⁹ Inn khat sungah mi sawm a hin lai leh amaute zong a si ding uh hi.

¹⁰ Siluang hal dingin a behte un a puakkhiat uh leh tua lai-ah a bu khatpeuh a om hiam?" ci-in dong ding uh a, "No tawh khatpeuh a om lai hiam? " a kicih a, "Om kei" a kicih leh tua ciangin amah in, "Pau kei ou! TOPA min lo kha nawn kei ni," ci ding hi.

¹¹ Ahang in, TOPA in thu pia khin a, amah in inn liante sukhamin inn neute a sunen ding hi.

¹² Sakolte suangkawl lakah tai ahi hiam? Kua in tuate lak bawng tawh kho ahi hiam? Ahi hangin note in thutang, gu na suaksak uh a, thumaan gah, thukhaa na suaksak uh hi.

¹³ Lo Debar a la zo in note na lungnuam uh a, "Eima thahatna tawh Karnaim b la hi lo i hi hiam?" na ci uh hi.

¹⁴ Ahang in, TOPA Thahatpen Pasian in, "Israel innkuante aw, note do dingin minam khat ka khangsak dinga, tua in Lebo c Hamath pan Arabah kuam dong lamdung tawnah hong nengcip ding hi," a ci hi.