Amos 1 - Zokam International Version

¹ Tekoa a tuucingte lakah khat Amos kammal - Judah kumpi-in Uzziah a om hun, Jehoash a tapa Jeroboam, Israel kumpi a hih hun, zinlin ma kum nih hun lai-a Israel thu tawh kisai a muhna ahi hi.

² Amah in: "Zion panin TOPA hawk a, Jerusalem panin kekte a kia hi; tuucingte lonona mun teng keucip b a, Carmel dawn teng keugaw ta hi," a ci hi.

Israel Gamvengte Tungah Thukhenna

³ Hih in TOPA gen ahi hi: "Damascus-te mawhna thumte thamlo lite hangin ka thangpaihna ka ip kik kei ding hi. Bang hang hiam cih leh sik-ha a nei angawina-in Gilead gawi uh hi.

⁴ Hazael innkuante tungah mei ka sawl dinga tua in Ben-Hadad mun muanhuai a hultum ding hi.

⁵ Damascus kongpi ka sukham ding hi; Aven c Kuam a d kumpipa le Beth-Eden gam-ukte sik ciangkhut ka susia ding hi. Aram mite ahileh Kir ah sal a suak ding uh hi," TOPA in a ci hi.

⁶ "Hih in TOPA gen ahi hi: "Gaza-te mawhna thumte thamlo lite hangin ka thangpaihna ka dok kik kei ding hi. Bang hang hiam cih leh tuanu in mipi bup manin amaute Edom-te a zuak hi.

⁷ Gaza kulhte mei-in ka hal dinga, a mun muanhuaite uh a hultum ding hi.

⁸ Ashdod kumpipa e le Ashkelon a ukna sik ciangkhut tawipa ka susia ding hi. Philistia-te a sih khit siang dong Ekron tungah ka hehna khut ka nga ding hi," Thupipen TOPA in cikhia hi.

⁹ Hih in TOPA gen ahi hi: "Tyre-te mawhna thumte thamlo lite hangin ka thangpaihna ka dok kik kei ding hi. Bang hang hiam cih leh amah in Edom ah mipi bup zuakin sanggama kimat dinga a thuciamna uh a zui kei hi.

¹⁰ Tyre kulhte ah mei ka sawl dinga a mun muanhuaite a hultum ding hi.

¹¹ Hih in TOPA gen ahi hi: "Edom-te mawhna thumte thamlo lite hangin ka thangpaihna ka dok kik kei ding hi. Bang hang hiam cih leh amah in a sanggampa namsau tawh delh a, a khuatuahhuai a mite a husamsak hi; bang hang hiam cih leh ama hehna dam thei lo a, ama hehna mei a mit kei hi.

¹² Teman ah mei ka sawl dinga, Bozrah mun muanhuaite a hultum ding hi," a ci hi.

¹³ Hih in TOPA gen ahi hi: "Ammon-te mawhna thumte thamlo lite hangin ka thangpaihna ka dok kik kei ding hi. Bang hang hiam cih leh a gamgite uh a khansak theih nadingun Gilead numei gaaite a kuikham uh hi.

¹⁴ Rabbah kulhte mei-in ka hal dinga, gal kido ni-a gal huging le huihpi nun ni-a huihpi hual ging lakah tuanu mun muanhuaite a hultum ding hi.

¹⁵ Tuanu’ kumpipa b a uliante tawh salin kikaikhawm ding hi," TOPA in a ci hi.