2 Samuel 8 - Zokam International Version

David Gualzawhnate

¹ Hih hun khit ciangin David in Philistia-te zo-a, amaute nuaisiah-in Philistia-te ukna panin Metheg Ammah a la hi.

² David in Moab-te zong a zo hi. Amah in amaute leitual ah lumsak a, khauzang khatin a teh hi. A tehna khauzang tan nih sima om peuhmah thatin a tan thumna-a omte a hawi hi. Tua ciangin Moab-te David nasem suak uh a, siah a puak uh hi.

³ Tua tham loin David in Euphrates Gun dung teng uk kik dinga kuan Zobah’ tapa Hadadezer a do hi.

⁴ David in a sakolleng tulkhat, sakolleng hawl a tul sagih le khe galkap tul sawmnih a matsak hi. Amah in lengkai sakol za khat longal a zagui a attat khin hi.

⁵ Zobah kumpipa Hadadezer huh dingin Damascus a Aram-te a kuan uh ciangin David in amaute tul sawmnih le tulnih a vatlum hi.

⁶ Amah in Damascus a Aram kumpi gamah khuapi cingte koih a, Aram-te amau nasem suakin siah a puak uh hi. David a paina peuhpeuh ah TOPA in a gualzosak hi.

⁷ David in kham-a kibawl Hadadezer uliante’ lumte laksak a Jerusalem ah a pua hi.

⁸ Hadadezer neihsa khuapi Tebah b le Berothai-te panin kumpi David in sumngo tampitak a la hi.

⁹ David in Hadadezer galkap buppi zo khin hi ci-in Hamath kumpipa Tou c in a zak ciangin,

¹⁰ Tou tawh a kido ngei Hadadezer tawh Kumpi David kido-a a zawhna hangin amah hopih ding le a lungdampih dingin Tou in a tapa Joram d a paisak hi. Joram in ngun le kham le sumngo-a kibawl vanzatte a puak hi.

¹¹ Kumpi David in a zawhsa minamte khempeuh ngun le khamte mah bangin hih vanzatte TOPA tungah ap hi; a zawhsa minamte: -

¹² Edom e le Moab, Ammon-te le Philistia-te le Amalek-te ahi hi. Amah in Zobah kumpipa Rehob’ tapa Hadadezer aa a laksak vante zong a ap hi.

¹³ David in Ci Kuam ah Edom-te f tulsawm le tulgiat that khin-a a ciah ciangin a minthang hi.

¹⁴ Amah in Edom buppi ah khua cingte koih a, Edom-te khempeuh David nasem a suak uh hi. David a paina peuhpeuh ah TOPA in a gualzosak hi.

David’ Uliante

¹⁵ David in Israel khempeuh uk a, a mite khempeuh tungah thutangin a thumaan hi.

¹⁶ Zeruiah’ tapa Joab in galkap khempeuh uk a; Ahilud’ tapa Jehoshaphat thu ciamteh hi-in;

¹⁷ Ahitub’ tapa Zadok le Abiathar’ tapa Ahimelech-te siampi hi uh a; Seraiah thuvanpi hi-in;

¹⁸ Jehoiada’ tapa Benaiah in Kereth-te le Peleth-te uk a; tuateh David’ tapate kumpi thudotpite g ahi uh hi.