2 Samuel 4 - Zokam International Version

Ish-Bosheth Kithat

¹ Saul tapa Ish-Bosheth in Hebron a Abner sihna a zak ciangin a lungneu a, Israel khempeuh a patau uh hi.

² Tu-in Saul tapa in galkapte makai mi nih a nei hi. Khatpa min Baanah hi-a a khatpa min Recab ahi hi; amaute Beeroth mi Rimmon’ tapate hi uh a, Benjamin’ beh pan ahi uh hi - Beeroth pen Benjamin khenkhatin kisim hi,

³ bang hang hiam cih leh Beeroth mite Gittaim ah tai uh a, tuni dongin pemta in a teng uh hi.

⁴ (Saul tapa Jonathan in tapa khat nei-a a khe langnih in a bai hi. Jezreel pana Saul le Jonathan thu a kizak in amah kum nga a pha hi. Amah a cingnu in manin taipih a nawhtat lua ahi manin amah kiatsuah-a tua hanga bai ahi hi. Ama min Mephibosheth ahi hi.)

⁵ Tu-in Ish-Bosheth inn a hawh dingin Beeroth Rimmon’ tapate Recab le Baanah kuankhia uh a, sun nisat laitaka sun khawl hunin tualai a tung uh hi.

⁶ Amaute mangbuh la ding kineihin inn sungtawng ah lut uh a, a gilpi ah a dawt uh hi. Tua ciangin Recab le a sanggampa Baanah a gelsim uh hi.

⁷ Amah a lupna inndei sungah a lup laitakin amaute inn sungah a lut uh hi. Amaute in amah dawtin a thah khit uh ciangin a lu a tankhia uh hi. Amaute in a lu la uh a Arabah lam tawnin zan khuavakin a pai uh hi.

⁸ Amaute in Ish-Bosheth lutang Hebron a om David puak uh a, kumpipa kiangah, "Hih lai-ah nang thah hong sawm na galpa, Saul’ tapa Ish-Bosheth lutang a om hi. Tuni-in TOPA in Saul le ama suante tungah ka topa kumpipa phu a la khin hi," a ci uh hi.

⁹ David in Beeroth mi Rimmon’ tapate Recab le a sanggampa Baanah kiangah, "Ka lungkhamna khempeuh pana hong hukhia TOPA nuntakna lo a kong geninah,

¹⁰ mi khat in thu hoih hong puak bangin, ‘Saul si ta hi,’ ci-a hong gen ciangin amah manin Ziklag ah ka that hi. Tua in ama hong puak thuthak pahtakmana ka piak ahi hi.

¹¹ Migilote in a mawhpeng mi khat a inn sunga a lupna tungah that ahileh - ama sisan no tungah hong siikin leitang pan hong nak mansakzaw ngel lo ding ka hi hiam!" ci-in a dawng hi.

¹² Tua ciangin David in a mite tungah thu pia a, amaute a that uh hi. Amaute in a khutte uh le a khete uh attanin a luangte Hebron a bual kiangah a khai uh hi. Ahi hangin Ish-Bosheth’ lutang la uh a, Hebron a Abner’ hanah a vui uh hi.