1 Timothy 5 - Zokam International Version

Meigongte, Upate le Silate tawh Kisai Hilhna

¹ A upazawpa tungah kamkhauh zangin tai kei inla, na pa bangin thudam tawh hansuah in. A khangnozawte na sang gampa bangin na bawl in;

² a upazaw numeite, nute bang le a khangnozaw numeite siangthotakin sanggamnute bangin na bawl in.

³ A tasam takpi meigongnu limtakin na phawk in.

⁴ Ahi hangin meigongnu khat in tu le ta a neih leh amaute in a nu a pa, a pi a pu-te a thukkikna un, a biakna uh sepkhiat ding a masa penin sinin a innkuan sung uh kem uh hen; ahang in, hih in Pasian a lungkimsak hi.

⁵ Amah bek a kinusia a tasam takpi meigongnu in a lametna Pasian tungah nga-a, Pasian huh ding sun le zanin a ngen niloh hi.

⁶ Ahi hangin ama noptatna-a nungta meigongnu, a nuntak lai nangawnin a si ahi hi.

⁷ Kuamah a kimawhsak theih loh nadingin hih lamlahna mite tungah zong theisak in.

⁸ Mi khatpeuh in ama tanaute a diakdiak in a innkuanpih taktakte kisapna a huh kei leh upna a nial hi-a a um lo mi sangin a siazaw ahi hi.

⁹ Meigongnu khatpeuh a khan kum sawmguk a val khita, a pasal tunga a muanhuai a ahi kei ngal leh meigongte lakah na ciamteh kei in.

¹⁰ Ahi zongin a gamtat hoihin, a tate khansuah zo a, zindo a siam, misiangte khe a silsak, gim ngahte huh tawntunga, gamtat hoih namkimte ah kipia zo mahmah in a kipahtak leh meigong lakah ciamteh in.

¹¹ A khangno zaw meigong numeite ahileh tuate minlakah na hel kei in. Ahang in, a pumpi lunggulh nate in Christ tunga a ki-apna uh a zawh ciangin pasal a deih uh hi.

¹² Amaute in a kamciam masa uh a palsat manun amau le amau thukhenna a kitun uh hi.

¹³ Tua banah thadahna zongsang uh a, inn simah a banvak uh hi. A thadah bek uh hi loin mi gensiat hatin, na khempeuh ah kum zo uh a, amau gen loh ding pipi a gen uh hi.

¹⁴ Tua ahi ciangin a khangno lai meigong numeite in, pasal nei in, ta nei in, a inn sung uh kem uh henla, gensiat nading hun hoih galpa pia kei le uh, cih ka thuhilhna ahi hi.

¹⁵ Pawlkhatte Satan nung a zui dingin lam a pial khin takpi ta uh hi.

¹⁶ Thu um numei khat ama innkuan sungah meigong numei a nei a om leh amau hangin pawlpi vangiksak loin amah in amaute huh ta hen. Tua hileh a kitasam takpi meigongte pawlpi in huh thei ding hi.

¹⁷ Pawlpi sung hoihtaka a makaih upate, a diakdiak in thuhilh le laihilh na a semte a zahnih in pahtawi ding kilawm hi.

¹⁸ Ahang in, Laisiangtho in: "Bawngtal in buh a cil laitakin a muk hencip kei in," b ci a, tua ciangin, "Nasempa in a thaman a ngah ding kilawm hi," c ci hi.

¹⁹ Upa khat a kimawhsakna teci nih ahikeh thum a om kei leh thu-in na sang kei in.

²⁰ Midangte vauhilhna a suah theih nadingin a mawhte mipite lakah na tai in.

²¹ Hih kong lamlahnate kuamah deidan lo, kuamah angvan tuan het loin na zat dingin Pasian le Christ Jesu le a kiteltuam vansawltakte mitmuhin nang kong suan hi.

²² Mi tungah khutngak ding man langlua kei inla, midang mawhna ah va kikum kei in. Nang le nang a siangtho-in kikem in.

²³ Na gilpi le na cinat pahpahna hangin tuisik bek na dawndawn tawp inla, lenggahzu tawmtawm na zang in.

²⁴ Mi pawlkhatte mawhna a kilang sise hi-a, amau ma ah thukhenna mun a na tung zo hi; adangte mawhnate in amaute a sulzuih hi.

²⁵ Tua mah bangin gamtatna hoihte kilang sise a, a kilang sise lote zong a kiselcip thei kei hi.