1 Samuel 13 - Zokam International Version

Samuel in Saul Tai

¹ Saul kumpi a suahin kum sawmthum e pha a, Israel-te kum sawmli f le kum nih sung a uk hi.

² Saul a in Israel panin mi tul thum teel a: Micmash le Bethel mualtung gamah amah tawh tulnih omkhawm in, Benjamin-a Gibeah ah Jonathan tawh tulkhat a omsak hi. Tua loteng amau inn ciatah a ciahsak hi.

³ Jonathan in Geba a Philistia-te galvilna sim-a tua thu Philistia-te in a za uh hi. Tua ciangin Saul in gamsung khempeuhah pengkul mutsakin, "Hebrew-te zasak un," a ci hi.

⁴ Tua ciangin Israel khempeuh in: "Saul in Philistia-te galvilna sim-a tu-in Philistia-te langah Israel om ta hi," cih thuthak a za uh hi. Tuateh Gilgal a om Saul pawm dingin mite a kisam uh hi.

⁵ Israel sim dingin Philistia-te sakolleng tul thum b sakolleng hawl tul guk le tuipi gei-a sehnel zaha tam galkap tawh a kithawi uh hi. Amaute kuan to uh a, Beth Aven nisuahna lama Micmash ah giahphual a sat uh hi.

⁶ Israel mite in amau dinmun lauhuai-in amau galkapte a kinehcih lam a muh uh ciangin suanghawm le sawlkawm suangtum lak dum sung le tuikhuk sungah a bu uh hi.

⁷ Hebrew-te pawlkhat Jordan gal nangawn ah kahin Gad le Gilead gamah a pai uh hi. Gilgal ah Saul omlai-a ama ompih galkapte lau-in a ling uh hi.

⁸ Amah in Samuel ciangtansa ni sagih sung ngaka; ahi hangin Gilgal ah Samuel a pai kei hi; tuateh Saul mite kithehthang dingin a kithawi uh hi.

⁹ Tua ciangin "Meihal biakna le kilawmtakna biaknate c kei hong puak un," a ci hi. Tuateh Saul in meihal biakna a pia hi.

¹⁰ Biakna a man khit lianin Samuel tunga, a muak dingin Saul a paikhia hi.

¹¹ Samuel in, "Bang hih na hi hiam?" ci-in a dong hi. Saul in, "Philistia-te Micmash ah kikhawm uh a, mite kithehthangin nang lah na cih hunin nong tun loh ciangin,

¹² ‘Tu-in Philistia-te kei hong sim dingin Gilgal ah hong kuansuk dinga ke’n lah TOPA angvanna ka ngen nai kei hi,’ ci-in ka ngaihsun hi. Tua ciangin meihal biakna pia loin ka om thei kei hi," ci-in a dawng hi.

¹³ Samuel in, "Na haitat khin hi; TOPA na Pasian hong thupiak na zui kei hi; zui lecin Israel tungah na kumpi-gam a kip tawntung ding hi.

¹⁴ Ahi hangin tu-in na kumpi-gam a kip den kei ding hi; TOPA thupiak zui lo na hi manin TOPA in ama lungsim a tuak mi khat zongkhia-in ama mite makai dingin a seh khin hi," a ci hi.

¹⁵ Tua ciangin Samuel in Gilgal d nusia in Benjamin-a Gibeah ah a pai to hi; tuateh Saul in a ompih mite a sim hi. Amaute zaguk khawng a pha lai bek uh hi.

Israel in Galhiam Neilo

¹⁶ Philistia-te in Micmash ah giahphual a sat laitakun, Saul le a tapa Jonathan le amau ompihte Benjamin-a Gibeah e ah a om uh hi.

¹⁷ Philistia-te giahphual panin galguk pawl thumin a kuankhia uh hi. Pawlkhat Shual gamnawl Ophrah lamah kuan uh a,

¹⁸ pawlkhat in Beth Haron manawhin a thumnate in sehnel-gam maingata om Zeboim Kuam kimuhsukna gamgi lamah a pai uh hi.

¹⁹ Philistia-te in, "Hebrew-te namsau le teipi seeksak kei un!" ci uh ahi manin Israel gambup ah sikseek khat beek a kimu kei hi.

²⁰ Tua ciangin Israel khempeuh Philistia-te kiangah tuzumte, tupeekte, heite le phiaukawite f sekhiam dingin a paisuk uh hi.

²¹ Tuzum le tupeek sekhiam man shekel g sehthum suah sehnih hi-a, longkhawl le hei sekhiam man le ganciang zumsak kik man shekel h sehthum suah seh khat ahi hi.

²² Tua hi-a, gal kido ni-in Saul le Jonathan ompih galkapte in a khut sunguah namsau le teipi a nei kei uh hi; Saul le a tapa Jonathan bekin tuate a nei uh hi.

Jonathan in Philistia-te Sim

²³ Tu-in Philistia-te pawl tawmno khat Micmash ciangka ah a pai uh hi.