1 Kumpite 4 - Zokam International Version

Solomon’ Uliante le Ukpite

¹ Tua ahi ciangin Solomon in Israel khempeuh a uk hi.

² Tua hi-a hihte in ama ulianpite ahi hi: Zadok tapa Azariah-siampi;

³ Shisha tapate Elihoreph le Ahijah - thuvanpite; Ahihud tapa Jehoshaphat - thu ciamteh;

⁴ Jehoiada tapa Benaiah - galkap mangpipa, Zadok le Abiathar - siampite;

⁵ Nathan tapa Azariah - gamkhen uliante ukpipa; Nathan tapa Zabud - siampipa le kumpipa thukuppihpa;

⁶ Ahishar - kumpi inn ukpa; Abda tapa Adoniram - aana-a nasemte ukpa ahi hi.

⁷ Solomon in Israel gamsung bupah kumpipa le kumpi innkuante kivakna lamsang a sik ding gamkhen uk sawm le nih zong a nei hi. Khat in kum khatin kha khat ta a sik ciat ding uh hi.

⁸ Amaute min hihte ahi hi: Ephraim mualtung gamah- Ben-Hur;

⁹ Makaz, Shaalbim, Beth, Shemesh le Elon Bethhannan ah - Ben-Deker;

¹⁰ Arruboth (Socoh le Hepher leitang khempeuh ama aa) ah - Ben-Hesed;

¹¹ Naphoth Dor a ah- Ben-Abinadab (amah Solomon tanu Taphath tawh kiteng hi);

¹² Taanach le Megiddo le Jezre-el nuai Zarethan zoma om Beth Shan, Beth Shan panin Jokmeam kantanin Abel Meholah dongah-Ahilud tapa Baana;

¹³ Ramoth Gilead (Gilead sunga Manasseh tapa Jair khuasatnate le Bashan a Argob gamkhen tawh kulh zaipi le sumngo kongpi kalhnate a nei khuapi sawmguk te zong ama a hi) ah - Ben-Geber;

¹⁴ Mahanaim ah - Iddo tapa Ahinadab;

¹⁵ Naphtali ah - Ahimaaz (amah in Solomon tanu Basemath tenpih hi);

¹⁶ Asher le Aloth ah - Hushai tapa Baana;

¹⁷ Issachar ah - Paruah tapa Jehoshaphat;

¹⁸ Benjamin ah - Ela tapa Shimei;

¹⁹ Gilead (Amor-te kumpipa Sihon gam sung teng le Bashan kumpipa Og gam sung teng) ah - Uri tapa Geber ahi hi. Tua gamkhen ah amah bek ukpi ahi hi.

Nisima Solomon Annekte

²⁰ Judah le Israel mite tuipi gei-a sehnel zahin tam a; amaute in ne-in dawnin a lungdam uh hi.

²¹ Tua hi a Solomon in Gunpi b panin Philistia-te gam, Egypt gamgi ciang dong kumpi gamte khempeuh a uk hi. Hih gamte in siah puak uh a, Solomon a nuntak sung teng ama uk mite ahi uh hi.

²² Nisima Solomon inn-a kine annel limci Cor c sawmthum le an Cor d sawmguk,

²³ bawngbuka kivakthau sawm, lonona a kivakthau bawng sawmnih, tuu le keel zakhat le sazuktal, sanang, zukzil, sazukpi le vasa limcite zong ahi hi.

²⁴ Ahang in, amah in Gunpi nitumna-lam kumpi-gam khempeuh, Tiphsah pan Gaza dong uk-a, a kim a vel mun khempeuh ah kilemna a om hi.

²⁵ Solomon nuntak sung teng Dan panin Beersheba dong Judah le Israel lungmuangtakin teng uh a, a lenggui uh le a thei-kungte uh nuai-ah a teng ciat uh hi.

²⁶ Solomon in lengkai sakol buk tulli e le sakol f tul sawm le tul nih a nei hi.

²⁷ Gamkhen uliante in amau sik kha in Solomon le kumpi sabuai-a pai khempeuh annek ding a pia ciat uh hi. Amaute in bangmah a kisam a omsak kei uh hi.

²⁸ Amaute in a kilawm mun ah lengkai sakol le sakol dangte ading amau tanh zah ciat mangbuh-ham le buhtu zong a puak uh hi.

Solomon Pilna

²⁹ Pasian in Solomon tungah pilna le a lian mahmah thumuhna, le a zai mahmah theihtelna tuipi gei-a sehnel banga sim theih loh zah a pia hi.

³⁰ Nisuahna lama mite khempeuh pilna sangin Solomon pilna lianzaw a, Egypt pilna khempeuh sangin a lianzaw hi.

³¹ Amah midang khatpeuh sangin pilzaw a, Ezrah-te Ethan, Mahol tapate Heman, Calcol le Darda-te sangin a pilzaw hi. Tua hi-a ama minliatna a kima minamte khempeuh lakah a kizel hi.

³² Amah in paunak tul thum genkhia-a, a laphuah tul khat le nga pha hi.

³³ Amah in Lebanon a tamtakte a kipan kulh tunga po puknah dong singkungte hinzia a gen hi. Amah in gamsate le vasate, a bokvak ganhingte le ngasate thu zong a hilh hi.

³⁴ Ama pilna a za leitunga kumpite khempeuh in a sawl uh ahi minam khempeuh panin mite, Solomon pilna ngai dingin a kuan uh hi.