1 Kumpite 16 - Zokam International Version

¹ Tua ciangin Baasha langah Hanani tapa Jehu tungah TOPA thu tunga:

² "Leivui panin nang kong laamto a, ka mi Israel makai kong suaksak hi, ahi hangin Jeroboam lampite na zui-a, ka mi Israel mawhna bawlsakin amaute mawhna hanga ka heh nadingin hong phin uh hi.

³ Tua ahi ciangin Baasha le a innkuante ka haltum dinga, na innkuante Nebat tapa Jeroboam innkuante ka bangsak ding hi.

⁴ Baasha tawh kisai-in khuapi sunga site uite in ne ding uh a, gam sunga site, huihlak vasate in kivakna-in a nei ding uh hi," a ci hi.

⁵ Baasha uk sunga thupiang dangte le ama matutsate Israel kumpite khangthu ciamtehna laibu sungah kigelh hi lo ahi hiam?

⁶ Baasha a pate tawh tawlnga ta a, Tirzah ah kivui hi. Tuateh a tapa Elah in luah a kumpi a suak hi.

⁷ Tua tham loin Baasha in Jeroboam innkuan tawh kibangin TOPA mit ah asia in gamta in,ama sepsa nate tawh amah phinin a hehsak na hang leh Jeroboam innkuan a suksiatna hangin Hanani tapa kamsangpa Jehu tungtawnin TOPA thu Baasha le a innkuante kiangah a tung hi.

Israel Kumpi Elah

⁸ Judah kumpi Asa a kum sawmnih le gukna kumin Baasha tapa Elah Israel kumpi suak-a Tirzah ah kum nih sung a mang hi.

⁹ Ama uliante khat, a sakollengte alang a ukpa Zimri in amah a sawmsim hi. Tua hun laitakin Tirzah ah Elah om a, Tirzah-a kumpi-inn ukpa Arza inn ah zu a kham hi.

¹⁰ Zimri a sungah tuma amah sattukin a that hi. Tua kum pen Judah kumpi Asa a kum sawmnih le sagih a cinna kum ahi hi. Tua ciangin ama mun luaha amah kumpi a suak hi.

¹¹ Amah a uk dinga a kipat kumpi tokhom ah a tut phetin Baasha innkuan buppi a thatpah hi. Amah in a kitanaupihte ahikeh a lawmte pasal khat zong a siit kei hi.

¹² Tuaci-in kamsangpa Jehu tungtawnin Baasha langah TOPA in a gensa thu bangin Zimri in Baasha innkuan buppi a sumaimang hi -

¹³ man a nei lo amau milimte tawh TOPA Israel Pasian phinin a hehsak nadingun Baasha le a tapa Elah bawlsa mawhnate le Israel mawhna a bawlsakna uh hang ahi hi.

¹⁴ Elah in a uk sungin a thupiang dangte le ama sep khempeuh Israel kumpite khangthu ciamtehna laibu sungah kigelh hi lo ahi hiam?

Israel Kumpi Zimri

¹⁵ Judah kumpipa Asa a kum sawmnih le sagihna kumin Zimri in Tirzah ah ni sagih sung a uk hi. Philistia-te khuapi khat ahi Gibbethon gei ah galkapte in giahphual a sat uh hi.

¹⁶ Zimri in kumpipa sawmsimin amah that hi, cih a zak uh ciangin tua giahphual mah ah galkap mangpa Omri, Israel uk kumpi dingin a tangko uh hi.

¹⁷ Tua ciangin Omri le a ompih Israel-te khempeuh Gibbethon panin nung kik uh a, Tirzah a umcih uh hi.

¹⁸ Zimri in khuapi a kilak khit lam a muh ciangin kumpi-inn sunga inn muanhuai sungah tumin a kimkot a kumpi-innte mei in a halin si hi,

¹⁹ bang hang hiam cih leh amah in TOPA mit-ah gamtatsia-in Jeroboam’ lampite zui-in mawhnate bawl a Israel zong a khialhsak hang ahi hi. Amah TOPA mitah gamtatsia a, a bawlsa mawhnate le Jeroboam in a bawlsa mawhnate le Israel a mawhsakna lampite a totna hangin amah a si ahi hi.

²⁰ Zimri uk sunga thupiang dangte le a lehdona-te Israel kumpite khangthu ciamtehna laibu sungah kigelh hi lo ahi hiam?

Israel Kumpi Omri

²¹ Tua ciangin Israel mite kikhenin khen nih suak uh hi; a lang in kumpi dingin Ginath tapa Tibni pawl uh a, a lang in Omri a pawl uh hi.

²² Ahi hangin Ginath tapa Tibni nungzuite sangin Omri nungzuite thahat zaw uh hi. Tua ciangin Tibni si ,a Omri kumpi a suak hi.

²³ Judah kumpipa Asa a kum sawmthum le khatna kumin Omri, Israel kumpi suak-a, kum sawm le nih sung ukin tua kumte sungah kum guk sung Tirzah ah a om hi.

²⁴ Amah in Shemer tung panin ngun talent nih a in Samaria mual lei a, mualtungah khuapi khat lamin a mual nei masapa min puasaka, a min Samaria a phuak hi.

²⁵ Ahi hangin Omri in ama ma-ate khempeuh sangin mawhzaw a TOPA mit ah a gitlohna a bawl hi.

²⁶ Amah in kimanna a nei lo amau milimte tawh TOPA Israel Pasian phinin a hehsak nadingin Nebat tapa Jeroboam mawhna le Israel a bawlsak mawhna lampite khempeuh a tawn hi.

²⁷ Omri uk sunga thupiang dangte le a septe le a matutsate Israel kumpite khangthu ciamtehna laibu sungah kigelh hi lo ahi hiam?

²⁸ Omri a pate tawh tawlnga ta a, Samaria ah kivui hi. Tuateh a tapa Ahab in luah a kumpi a suak hi.

Ahab, Israel Kumpi Suak

²⁹ Judah kumpipa Asa a kum sawmthum le giatna kumin Omri tapa Ahab, Israel kumpi suak-a, Samaria ah mangin kum sawmnih le nih sung Israel a uk hi.

³⁰ Omri tapa Ahab in ama ma-ate khempeuh sangin TOPA mit-ah a siazaw-in a gamta hi.

³¹ Amah in Nebat tapa Jeroboam bawlsa mawhnate a thupi sim loh bek hi loin Sidonte kumpipa Ethbaal tanu Jezebel nangawn tenpih a, Baal na semin a bia hi.

³² Amah in Samaria-a a lamsa Baal biakinn sungah Baal adingin biakna-tau khat a dawh hi.

³³ Ahab in Asherah khuam khat zong bawla, ama ma-a Israel kumpite khempeuh sangin TOPA Israel Pasian phinin a hehsak zaw hi.

³⁴ Ahab hun sungin Bethel-te Hiel in Jericho a lam kik hi. TOPA in Nun tapa Joshua tunga a genna tawh kizui-in amah in a tapa upa pen Abiram luang manin a bulpite phum a, a tapa a tum pen Segub luang manin a kongpite a tung hi.