1 Khangthute 23 - Zokam International Version

Levi-te

¹ David tekin a kum tampi a phak ciangin, Israel tungah a tapa Solomon kumpi a suaksak hi.

² Amah in Israel makaite khempeuh siampite le Levi-te tawh a kikhawmsak hi.

³ Levi-te kum sawmthum pan a tungsiah kisim a, pasal tul sawmthum le tul giat a pha hi.

⁴ David in, "Hihte lak pan tul sawmnih le tul li in TOPA biakinnpi nasep uk dinga, tulgukte uliante le tukhente hi ding uh hi.

⁵ Tulli-te in kongpi cing ding uh a, tulli-te in tumtheihte tawh amah phat nadinga ka hihsate-in TOPA a phat ding uh hi," a ci hi.

⁶ David in Levi’ tapate: Gershon, Kohath le Merari-te tawh kithuah dingin Levi-te a pawlpawlin a khen hi.

Gershon-te

⁷ Gershon-te tawh kisaite: Ladan le Shimei.

⁸ Ladan tapate: Jehiel ta upa, Zetham le Joel - a vekin thum

⁹ Shimei tapate: Shelomoth, Haziel le Haran - a vek in thum. Hihte Ladan innkuan lutangte ahi hi.

¹⁰ Tuateh Shimei tapate: Jahath, Ziza, c Jeush le Beriah. Hihte Shimei tapate hi-a - a vekin li ahi hi.

¹¹ Jahath a ta masa hi-a, Ziza a nihna, Jeush le Beriah in tapa tampi a nei kei uh hi; tua hi-a innkuan khatin kisima nasep kipiakhawm hi.

Kohath-te

¹² Kohath tapate: Amram, Izhar, Hebron le Uzziel - a vekin li.

¹³ Amram tapate: Aaron le Moses. Aaron le ama suante a tawntungin a siangtho pen nate ap ding, TOPA mai-ah biakna pia ding, ama mai-ah biakna nasem ding le ama minin thupha a pia tawntung dingin a kituamseh ahi hi.

¹⁴ Pasian mipa Moses tapate, Levi behte lakah a kihel hi.

¹⁵ Moses tapate: Gershom le Eliezer.

¹⁶ Gershom suante: Shubael a upapen ahi hi.

¹⁷ Eliezer suante: Rehabiah a upapen ahi hi. Eliezer in tapa dang nei lo-a, ahi hangin Rehabiah tapate a tam mahmah uh hi.

¹⁸ Izhar tapate: Shelomith a upapen ahi hi.

¹⁹ Hebron tapate: Jeriah a khatna, Amariah a nihna, Jahaziel a thumna hi-in Jekmeam a lina ahi hi.

²⁰ Uzziel tapate: Micah a khatna hi-a Isshiah a nihna ahi hi.

Merari-te

²¹ Merari tapate: Mahli le Mushi. Mahli tapate: Eleazar le Kish.

²² Eleazar tapa nei loin si a; tanu bek a nei hi. Kish tapa amau sanggamte in amaute a tenpih uh hi.

²³ Mushi tapate: Mahli, Eder le Jerimoth - a vekin thum ahi hi.

²⁴ Hihte amau innkuan tawh kizui-in Levi suante hi a, - TOPA biakinnpi sunga nasem kum sawmnih pan a tungsiah a mimalin a mina mi phazah tawh kizui-in a kiciamteh innkuan lutangte ahi uh hi.

²⁵ Ahang in, David in, "TOPA, Israel Pasian in ama mite tawlngasaka, Jerusalem a teng dingin tungsak khin ahi nungsang

²⁶ Levi-te in biakbuk le a sunga vanzatte khatpeuh a puak ding uh kisam nawn lo hi," a ci hi.

²⁷ David lamlahna a nunungpen tawh kizui-in Levi-te kum sawmnih pan a tungsiah a kisim ahi hi.

²⁸ Levi-te nasep in TOPA biakinnpi sunga Aaron suante nasep huh ding hi a: huang sung, a panga inndeite le a siangtho nate khempeuh siantho-sakna ukin Pasian inn sunga nasep khatpeuh a sem ding uh hi.

²⁹ Amaute in sabuai tunga kikoih anlumte, an-a biakna ding annel, silngo sawhloh anpheng, a emzia le a helzia, a phazah le a phacia a uk ding uh hi.

³⁰ Zingsang simin TOPA tunga lungdam ko ding le amah phat dingin a ding ding uh hi. Nitak in zong tua mah bangin sem ding uh a,

³¹ Sabbath-te le Kha Thak pawi ni le a kiseh pawite ah TOPA tungah meihal biaknate ah zong tuamah bangin pia ding uh hi. Amaute in TOPA mai-ah a hunhunin a phazah a kisam bang le amau hih ding a kilahzia bangin a sem ding uh hi.

³² Tua ciangin Levi-te in Kikhopna Puanbuk le Mun Siangtho-te vanin, a sanggamte uh Aaron suante khutnuai-ah TOPA biakinnpi sunga nasep a sem ding uh hi.