1 Khangthute 13 - Zokam International Version

Singkuangpi Puak Kik

¹ David in ama uliante a tultul le a zaza a ukte thu a kikuppih ciat hi.

² Tua ciangin a kikhawm Israel mi buppi tungah "Note in hoih nasak uh-a TOPA eite Pasian deihna ahileh, Israel gamhuam sunga om lai i sanggamte le amau khuapite le a lonona munte uh-a a ompih uh siampite le Levi-te tawh hong pai-a eite hong pawl nadingun a gamlapi-a omte tungah thu i puak ding hi.

³ Saul in hong uk sung teng bangmah b i dot loh tua c i Pasian singkuangpi ei kiangah i pua kik ding hi," a ci hi.

⁴ Mi khempeuh adingin hoih leh kilawm ahi manin mihon buppi in tuaci hih ding a thukim uh hi.

⁵ Tua ciangin David in Egypt a Shihor Gunpi panin Lebo d Hamath dong Kiriath Jearim pana Pasian singkuangpi pua dingin Israel-te khempeuh a kikhawmsak hi.

⁶ David le amah tawh a omkhawm Israel-te khempeuh Judah a Baalah (Kiriath Jearim) ah a Min singkuangpi a kiminvawh - cherub-te kikal kumpi tokhom a tu - TOPA Pasian singkuangpi, puato dingin a kuan uh hi.

⁷ Uzzah le Ahio makai-in, amaute in Abinadab inn pan leng thak khat tungah Pasian singkuangpi a puato uh hi.

⁸ David le Israel-te khempeuh in Pasian mai-ah late, harp-te, lyre-te, khuangtate, daltuahte le pengkulte tawh a thaneih zah un a lawm uh hi.

⁹ Amaute Kidon ancilna phual a tun uh ciangin bawngtalte kimuktu ahi manin singkuangpi len dingin Uzzah in a khutin a zam hi.

¹⁰ Uzzah in a khutin singkuangpi lawngkha ahi manin TOPA hehna kuanga amah a vatpuk hi. Tua ciangin amah Pasian mai tua lai-ah a si hi.

¹¹ Tua ciangin Uzzah tungah TOPA thangpaihna puakkham ahi manin David heh a, tuni dong tua mun Perez Uzzah a kici hi.

¹² Tua ni-in David in Pasian kihta a, "Bangci bangin Pasian singkuangpi kei kiang tun thei ding ka hi hiam?" ci-in a dong hi.

¹³ Amah in ama ompih dingin David Khuapi ah a la kei hi. Tua tangin amah in Git-te Obed-Edom inn ah a koihkhia hi.

¹⁴ Kha thum sung Obed-Edom innkuan tawh Pasian singkuangpi omkhawm a, TOPA in ama innkuan sung le a neih khempeuh thupha a pia hi.