Tito 1 - Zoque Copainalá New Testament

Pablo's jyayjayušej te' Tito

¹ Ʌjte' te' Pablo, Diojsisʌjyʌ' quioyosa, y Jesucristo'sʌjyʌ' quiʌ'wej, wa'yʌs ŋgotzoŋu te' Diojsis quiopiwita'm wa'y tumʌtzocoy wyʌ'aŋja'moyaju. Te'šejtijque' wa'y myujšaju te' wiyuŋbʌ tiyʌ Dios-cʌna'tzʌ'oquiupyit.

² Nʌ'ʌs nyosjayu Dios porque njo'cpa'ʌs ja'n yayepʌ quenguy te' chamdzi'oquia'upʌ Diojsis maŋba'cmaj tyujcu yʌ' najsacopac. Y Dios yajujche'c ja'n šutzi.

³ Y nu'cu'cande' aŋsʌŋ minu yajmujšaju pʌnda'm ñe'cʌ's chamupʌ tiyʌ. Te'cotoya'ʌjyʌ' cʌ'weju tʌta'm yajcotzojcopyapʌ Diojsis y nitza'mʌyjayu'ʌj wa'yʌs ʌs ndzamgopuŋjayaju.

⁴ Nʌ'ʌsmij njayjayu mij Tito. Wiyuŋšej sunba'ʌsmij jujcha' ʌsne' une, y tumo'yjtyʌ nwʌ'aŋjamdamba Cristo. Sunba'ʌs wa'mij ñdyo'ya'ŋʌyu y wa'mij ñchi'u yajya'moquiuy y sʌ'mnaquiuy tʌ Ndata Diojsis y tʌ Ngomi Jesucristo's te' yajcotzocpapʌ'stʌ.

Yojsušej Tito te' Creta-najsojmo

⁵ Nimeque'ʌsmij ndzajcu tey Creta-najsoyj wa'mis nduŋdzi'u jayajtuŋgʌpʌcʌpʌ tiyʌmajtʌ, y wa'mis ŋgojtu ancianota'm tumdumʌ cumgu'yojmo, te' ndza'maŋwajayuše'ʌsmij.

⁶ Cota pʌnda'm ja'n yajtiyʌcʌsi quionoquiatʌpyʌ. Y juca ijtu yomo tumʌtij yajcojamʌ. Y juca ijtu 'yune, pero wyʌ'aŋjamyajpapʌ's Dios, ja'n ñuyuta'mbʌ, ja'n ñicotza'mʌyatʌpyʌ que chʌquiajpa ja'n 'yoyeta'mbʌ tiyʌ.

⁷ Porque juca iwʌ's sunba quio'aŋgui'moyu Diojsis wyʌ'aŋja'moye'ojmota'm, pyʌcpa wa'y tyu'ŋaju oye'c uy yajtiyʌcʌsi quionoquiaju, porque ñe'cʌte' te' Diojsis quio'aŋgui'moye. Ja'n pyʌqui wa'y myʌja'ŋdzʌjcu wyin, ja'n myawʌqui'šca'epʌ, ja'n ño'tepʌ, ja'n quipcuy šunipʌ, ja'n ñi'aŋsunipʌ's tyʌwʌ wa'y ñijujpu.

⁸ Pero pyʌcpa wa'y pyʌjcʌchoŋu oye cojejyajpapʌ, quiʌñʌñbapʌ's oyeta'mbʌ tiyʌ mumu pʌngotoyata'm, ja'n chʌjqui'šca'opyʌ, justopʌ, chʌcpapʌ's šunbašej Diojsis y jyʌ'ctzʌ'pyapʌ's wyin.

⁹ Pyʌcpa wa'y tyumʌtzocoy ñʌtu'ŋaju te' wiyuŋbʌ tzame aŋmayajušejtʌ. Te'šejpʌ aŋma'yoquiupyit wa'y mujsu 'yaŋnʌctza'mʌyajque'tu, y chamnʌctʌ'yaju te' ja'n suni pyʌjcʌchoŋjayajupʌ's Diojsis chame.

¹⁰ Coquena cuenta porque jene ijtyaju pʌn nimeque'ctij judiota'm ja'n wyʌ'aŋja'moyapyʌ oye, nuyuta'mbʌ, y jowi-tzamdzamnayajpapʌ y 'yaŋgoma'cʌyajpapʌ's pʌnda'm.

¹¹ Yʌ'šejta'mbʌ pyʌcpa wa'ytyʌ ŋguenu jutztʌ wa'y nyajmu'quiaju po'te, porque nʌ chʌcjopi'tyaju coŋnacʌ'ytya'm familia, y wa'ytyij ñʌpujtyaju tumin nʌ 'yaŋma'yoyaju ja'n 'yoyeta'mbʌ tiyʌpit.

¹² Tuma'ŋbʌn, Creta-pʌ'nista'mñe' cha'maŋwa'oye, nʌmu: Yʌ' Creta-pʌnda'm jene nu'ŋʌyajwa'a wa'y šujchaju, yoyajše'ʌs ŋgomʌ'yajpa y cu'tjepejepenayajpa y jaraganda'm.

¹³ Wiyuŋšejpʌ tiyʌ chamu te'wʌ's. Te'cotoya paquipaquic otoŋwinduquia wa'y sa'sa wyʌ'aŋjamyaju te' wiyuŋbʌ tiyʌ.

¹⁴ Uy myato'ŋoyjayaju judio'sta'm 'yunedzame, ni pʌ'nista'm 'yaŋgui'mguy te' chaquiajupʌ'sa wiyuŋbʌ tiyʌ.

¹⁵ Jujche'ŋ Diojsis yajcowajupʌ tzocoy, mumutiyʌ ñe'cʌcotoyata'm cowajwa'a. Pero jujche'ŋ Diojsis jayajcowayʌpʌ tzocoy, y ja'n wyʌ'aŋja'mopyʌ, ñe'cʌcotoyata'm ja'ndiyʌ cowajupʌ tiyʌ. Te'šejta'mbʌ's hasta yacha'cuy quipšajpa quipsoquiupyit y ñʌctʌ'yoquiupyit.

¹⁶ Nʌmyajpa que ispʌquiajpa Dios, pero te' chʌquipitta'm yajquejyajpa que ja'n ispʌquiay. Qui'nišajpa Diojsis porque ja'n myato'ŋoyjayay. Chʌjquišatʌju'c japyujtya oye wa'y chʌquiaju oyepʌ yoscuy.