San Mateo 9 - Zoque Copainalá New Testament

Jesujsis yajtzojcu wocšijpʌ

¹ Pijche'ca tʌjcʌyu Jesús te' barco'ojmo y jajcu ocwinduc. Y nu'cu ñe' quiumgu'yojmo.

² Y tey ñʌminjayaju wocšijpʌ pʌn cape-ʌŋguquiʌsi. Quienu Jesujsis jutz wʌ'aŋja'moyajpa, ñʌjayu te' wocšijpʌ: Nʌ'oma' tʌwʌy, nyajcotocoyjapya'ʌs mis ŋgowa.

³ Pijche'c ijtyaju inʌc aŋgui'mguy-tyayu, y metza tuca'y ñe'co'mota'm nʌmyaju choco'yojmo: Yʌ'wʌ's 'yotowewʌ'ajapya Dios.

⁴ Pero ñʌctʌ'yjayaju Jesujsis te' ñe'ta'm quipsoquiuy, y nʌmu: ¿Tiya'sʌ'ŋde' yacha'cuy ŋguipstamba ndzoco'yojmo?

⁵ ¿Tiya'sʌ'ŋde' más fácil wa'ytyʌ ndzʌjcu wa'ytyʌ nʌmu: Nyajcotocoyjapya'ʌs mis ŋgowa, o wa'ytyʌ nʌmu: Tenaqui'mʌ y ca'ŋʌ?

⁶ Te'še'ʌj nʌmu wa'mis mustamu que ʌj, te' Pʌ'nis 'Yune's, ijtu'ʌs aŋgui'mʌtʌjcuy najsacopajcʌsi wa'yʌs nyajcotocoyu cowa. Pijche'ca ñʌjayu Jesujsis te' wocšijpʌ: Tenaqui'mʌ, pʌcʌ mis ŋgape-ʌŋguy y mawʌ ndʌjcaŋʌ.

⁷ Pijche'ctij tenaqui'mu, y maŋu tyʌjcaŋʌ.

⁸ Y quieñaju te' wʌwʌta'mbʌ pʌ'nis y ñʌmaya'yaju. Y myʌja'ŋwʌcotzamyaju Dios, te' chi'upʌ's yʌ'šejpʌ aŋgui'mʌtʌjcuy te' pʌn.

Jesujsis 'yaŋbʌjcu Mateo

⁹ Tzu'cumu tey Jesús, y quenu'ʌj pocsumʌ'yʌj mesa'ŋi che'quiajpamʌy inʌc te' cocoyo'oquiuy. Ʌjte' te' ñʌjayajpapʌ Mateo. Y Jesujsis nʌjayu'ʌj: Co'ŋa'ʌj. Y tzu'cumu'ʌj y maŋu'ʌs ŋgo'ŋu.

¹⁰ Ʌsa ndʌjcaŋʌ pocsu'c Jesús mesa'ŋi, yʌ'šej tujcu: Miñaju wʌwʌta'mbʌ tze'copyawʌ y eyata'mbʌ cowatzʌqui, y pocšajque'tu te' mesa'ojmo Jesusji'ŋ y te' quiʌ'aŋmayeji'ŋda'm.

¹¹ Y quieñaju'ca yʌ'šej fariseo'sta'm ñʌjayaju te' quiʌ'aŋmayeta'm: ¿Tiyajcu'ya cu'tpa mista'm Maestro tze'coyajpawʌji'ŋ y eyata'mbʌ cowatzʌquiji'ŋ?

¹² Y myatoŋu'ca Jesujsis, ñʌjayaju: Ca'eta'mbʌ'ste' šuñajpa tzo'yʌ'opyawʌ, y ja'nde' te' cosa'sata'mbʌ's.

¹³ Ma aŋmaytyamʌ jutz sunba ñʌmu yʌ'šej: Sunba'ʌs wa'mij ñdyo'ya'ŋʌ'oytyamu, y ja'n copʌn-yajca'oquiupyʌ cʌna'tzʌ'oquiuy. Jaminʌ'ʌs me'cha justota'mbʌ sino que te' cowatzʌquita'mbʌ wa'y quipswitu'yaju.

¿Tiyʌcotoya ja'n 'yayunatzʌquiay?

¹⁴ Pijche'ca quiʌ'miñaju Jesús te' Jua'ŋis quiʌ'aŋmaye's y quiʌ'aŋwa'quiaju: ¿Tiyajca'sʌ'ŋ te' fariseota'm y tʌj ayunatzʌcpatʌj sone naca, y mis ŋgʌ'aŋmayeta'm ja'n 'yayunatzʌquiay?

¹⁵ Jesujsis quiʌ'aŋwa'quiaju: ¿Pyʌcpasʌ'ŋ wa'y triste'ajyaju te' 'yaŋbʌquiatʌjupʌ co'tʌjcajcu'yojmo temyaj ijtu'c ñe'cʌji'ŋda'm te' nʌ quio'tʌjcajupʌ pʌn? Pero te' maŋba miñajupʌ jamo'oyj maŋba jyʌcʌ'u te' nʌ quio'tʌjcajupʌ pʌn, pijche'c maŋba 'yayunatzʌquiaju.

¹⁶ Ja'n pyʌqui wa'ytyʌ ŋgojtu pajna'cuy jomepamapʌ peca-pamacʌsi, porque te' jomepʌ pajna'cu'yis chitzpa te' pecawʌ y más mʌja'pa te' chitzi.

¹⁷ Ni ja'n pyʌqui wa'ytyʌ ŋgojtu pecapʌ nacapojcojmo nʌ šejtzo'tzcʌ'yupʌ vino wa'ytyʌ ŋgoquenu. Juca te'šejtʌ ndzʌcpa maŋba chijtzu te' nacapoc, umbʌ'pa te' vino y tocopya te' nacapoc. Pero más oye wa'ytyʌ ŋgojtu te' nʌ šejtzo'tzcʌ'yupʌ vino jomepʌ nacapojcojmo. Y te'šej myejtzji'ŋ ja'n tyocoyay.

Jairo's 'yune, y te' yomo pyi'quisjayupʌ's Jesujsis pyama

¹⁸ Yʌ'šejta'mbʌ tiyʌ nʌ ñʌtzamyaju'c Jesujsis te' pʌnda'm, minu tumʌ cowi'na y cutcʌne'cu wyi'naŋdʌjqui y ñʌjayu: Na' yʌmajmaj nʌ quia'u ʌs yomo-une. Señor minʌ, ma cotja ŋgʌ' ñe'cʌcʌsi y maŋba wyinsa'u.

¹⁹ Tzu'cumu Jesús y quiʌ'maŋu, y maŋyajque'tu te' quiʌ'aŋmayeta'm.

²⁰ Y ijtu inʌc tumʌ yomo macwʌstʌjca'y ame'a inʌc na'chaŋ quienmenepapʌ's pyoyaj-ca'cuy. Yʌ'wʌ's quiʌnu'cʌyu Jesús 'yucaŋgʌ'mʌc y pyi'quisjayu pyama's 'yacapoya.

²¹ Porque nʌmu ñe' choco'yojmo: Juca na' mbi'quisjapya'ʌs te' pyama, tzocpa'ʌj.

²² Pijche'cande' Jesús quenwitu'u y ñique'nʌyu'ca ñʌjayu: Nʌ'oma tʌwʌy, mis nwʌ'aŋjamgupyit ñchojcumij. Y pijche'ctij tzojcu te' yomo.

²³ Y tʌjcʌyu Jesús te' cowi'na's tyʌjcojmo. Y tey quienu nʌ pyi'quiaju jʌšuscuy, y wʌwʌ nʌ 'ya'wiyajupʌ.

²⁴ Y ñʌjayaju Jesujsis: Jʌcʌ'tamʌ. Te' yomo-une jaquia'ʌpʌte', ʌŋupʌtijte'. Pijche'ca quiʌsijcʌyaju.

²⁵ Myacputpʌ'yatʌju'ca te' pʌnda'm, tʌjcʌyu y pyʌjcu te' yomo-une quiʌ'cʌsi, y tzu'cumu te' yomo-une.

²⁶ Y chamgopuŋyaju mumu tepyʌ najsojmo que Jesujsis yajwinsa'u te' yomo-une.

Jesujsis yajtzojcu metza to'tita'mbʌ

²⁷ Tzu'cumu Jesús tey, y maŋu. Nʌ inʌc quio'ŋyaju metza to'tita'mbʌ's, y weju'c ñʌjayaju: Davijtis 'Yune to'ya'ŋʌtʌj.

²⁸ Y nu'cu'ca tʌjcoyj quiʌ'miñaju te' to'tita'mbʌ's. Y Jesujsis quiʌ'aŋwa'cu: ¿Nwʌ'aŋjamdambaja que muspa'ʌs nyajsʌ'ŋjaytyamu mis nwitʌm? Y nʌmyaju: Nwʌ'aŋjambatʌs, Señor.

²⁹ Pijche'ca pyi'quisjayatʌju te' wyitʌm y ñʌjayaju: Nwʌ'aŋjamdamušejmis, yajtucʌ te'šej.

³⁰ Pijche'c sʌ'ŋyaju te' wyitʌm. Y Jesujsis chijpana-aŋgui'myaju y ñʌjayaju: Coquendamʌ cuenta, uy ya'iwʌ's myujsu.

³¹ Pero tzu'cumyaju tey, y maŋu chamgopuŋjayaju te' ñe' chamʌtʌjcuy mumu tepyʌ najsoyj.

Jesujsis ya'otoŋu umapʌ

³² Nʌ'cše'ŋoyj tyuŋgʌpʌjcu, ñʌnu'cjayaju Jesús umapʌ, yatzi-espiritu's ñʌc'ijtʌyupʌ.

³³ Y myacpujtu'ctij te' yatzi-espiritu tzamdzamnaquiʌ'yu te' umapʌ inʌc. Y ñʌmaya'yaju te' pʌ'nista'm, y nʌmyaju: Nuncamajtʌ jaŋguiendandʌ'ʌ yʌ'šejpʌ isaŋwʌ'ajcuy Israel-pʌ'nojmo.

³⁴ Pero te' fariseota'm nʌmgʌ'yaju: Yatzita'mbʌ espiritu's quiowi'napit myacputpa yatzita'mbʌ espíritu.

Tyo'ya'ŋʌyu Jesujsis te' wʌwʌta'mbʌ pʌn

³⁵ Y cumguñamaye y riberanamaye inʌc cʌtʌcpa Jesús. Y aŋma'yopya inʌc te' judio'sta'm wyindʌjcojmo, y chamgopuŋba inʌc te' evangelio chambapʌ's jutz aŋgui'mba Dios. Yajtzocpa inʌc ca'eta'mbʌ y jujche'ŋ toya'ojmota'mbʌ te' cumgu'yojmo.

³⁶ Quieñaju Jesujsis tey wʌwʌ pʌn yʌmʌc teymʌc titnayajupʌ. Tey inʌc ijtyaju jujcha' ñchowambe jyambʌ'yatʌjupʌ, ja'ndiyʌta'mbʌ's quioque'noye. Pijche'ca tyo'ya'ŋʌyaju.

³⁷ Pijche'ca nʌjayutʌj, tʌj te' quiʌ'aŋmayeta'm: Wiyuŋšej jene wʌwʌ ijtu cosecha pero uša'ŋde' yojšajpapʌ.

³⁸ Te'cotoya wa'ctamʌ te' cosecha-comicʌsi wa'y quiʌ'weju yojšajpawʌ ñe' quiosechacotoya, (pʌ'nʌste' nʌ ndzamyaju).