San Mateo 7 - Zoque Copainalá New Testament

Uy cʌme'tztame ndʌwʌ

¹ Uy cʌme'tztame ya'iwʌ, uytya'mij Diojsis maŋu ŋguiʌme'tztaŋgue'tu.

² Porque ŋgʌme'tztambašejmis, te'šejtijmij maŋba ŋguiʌme'tztaŋgue'tu Diojsis. Y tiyʌ mis muctamba ne'cʌ, te'wʌtijmij maŋba myucjatʌjtaŋgue'tu.

³ ¿Tiyajca'nde' ŋguenme'tzjapya te' putzij te' ijtupʌ mis atzi's wyitʌ'mojmo, y ja'nmis ŋgue'nʌy te' sa'csʌj te' ijtupʌ misne' nwitʌ'mojmo?

⁴ ¿Tiyʌcotoya nʌjapya mis atzi: Atzi, jo'ca, maŋba'ʌs nyajʌcʌ'jayu te' putzij ijtupʌ mis nwitʌ'mojmo? Y ja'nmis ŋgue'nʌy que sa'csʌjte' ijtu mis nwitʌ'mojmo.

⁵ Mij, chʌquichʌquipʌ 'yatzitijmijyʌ'. Yajʌcʌ'ʌ winac te' sa'csʌj ijtupʌ mis nwitʌ'mojmo, pijche'c mis maŋba ŋguenu oye wa'mis nyajʌcʌ'jayu mis atzi's wyitʌ'mojmo ijtupʌ putzij.

⁶ Te' tuwišejta'mbʌ pʌn uy jaque-nʌtzamdame ʌs masanbʌ ndzame, umij ñiwitu'ʌyaju, porque cʌ'soyeta'mde'. Te' yoyašejta'mbʌ pʌn uy jaque-tzi'jaytyame mista'm ndzoco'yojmo ijtupʌ ʌs ndzame, uy maŋu myaŋdochʌcjayaju.

Wa'ctamʌ, me'tztamʌ y wejwindzoŋdamʌ Dios

⁷ Wa'ctamʌ, y ñchi'ʌtʌjtambamij. Me'tztamʌ, y mba'ttambamis. Wejwindzo'ŋoytyamʌ, y 'yaŋdzowatʌjtambamij.

⁸ Porque iwʌ's wya'cpa tiyʌ'iwʌ, pyʌjcʌchoŋba. Y iwʌ's mye'tzpa, pya'tpa. Y iwʌ's wyejwindzo'ŋopya, 'yaŋdzoŋyajpa.

⁹ Mista'm jeque, ¿juca mis une's nʌ wya'cu pan, maŋbasʌ'ŋmis ndzi'tamu tza'?

¹⁰ ¿Y juca nʌ wya'cu coquej, maŋbasʌ'ŋmis ndzi'tamu tzan?

¹¹ Mijta'm, yatzita'mbʌ mbyʌnmijyʌ'. Y juca muspamis ndzi'tamu oyeta'mbʌ tiyʌ mista'm une, ¿cuantimastya'a tzajpojmo ijtupʌ mis Ndata Diojsis maŋba chi'u oyeta'mbʌ tiyʌ juca nwa'cjaytyambamis?

¹² Te'šej jeque, jutz mis sundamba wa'y chʌquiaju pʌ'nis mijcotoyata'm, te'šej tzʌctaŋgue'ta mis, ñe'cʌcotoyata'm. Yʌ'šej chamba te' aŋgui'mgu'yis y te' tza'maŋwa'oyajpapʌ's.

Te' capyʌ tʌjcʌquiuy

¹³ Tʌjcʌytyamʌ te' penapittʌ tʌjcʌpyamʌy, porque pe'tziwʌte' te' tʌjcʌquiuy y woŋgonayupʌte' te' tuŋ wa'mij ñu'ctamu tocoquiu'yojmo, y wʌwʌ pʌn tu'ŋajpa te'wo'mo.

¹⁴ Porque capyʌte' te' tʌjcʌquiuy y chics te' tuŋ wa'mis mba'ttamu iscuy-quenguy, y metza tuca'y te' pya'tyajpapʌ's.

Chʌquicʌsimis maŋba ispʌquiaju

¹⁵ Coquendamʌ cuenta porque ijtyaju sujchajpapʌ tza'maŋwa'oye minbapʌ'smij mye'tzatʌjtamu. Maŋba ñu'quiaju yumijta'mbʌ ñchowambešej, pero wiyuŋšej choco'yojmo yatzi cʌ'soyeta'mde'.

¹⁶ Y chʌquicʌsimis maŋba ŋgue'nʌyaju. ¿Nducpasʌ'ŋdʌ uva te' apit-a'ŋucucʌsi, o te' higo te' canaŋ-apitcʌsi?

¹⁷ Te'šej jeque, oyepʌ cu'yis chʌcpa oyeta'mbʌ tʌm, y te' ja'n 'yoyepʌ cu'yis chʌcpa ja'n 'yoyeta'mbʌ tʌm.

¹⁸ Te'cotoya oyepʌ cu'yis ja'n chʌqui ja'n 'yoyeta'mbʌ tʌm, ni te' ja'n 'yoyepʌ cu'yis ja'n chʌqui oyeta'mbʌ tʌm.

¹⁹ Mumu cuy ja'n chʌquipʌ's oyeta'mbʌ tʌm, tyʌŋyajpa y quiojtyajpa jucʌtʌjcojmo.

²⁰ Te'cotoya chʌquicʌsimis maŋba ŋgue'nʌyaju juca sujchajpapʌ tza'maŋwa'oyeta'mde'.

Ja'ʌsmij ispʌctame

²¹ Wʌwʌta'mbʌ'sʌj nʌjayajpa: Señor, Señor. Pero ʌsmij nʌjaytyamba, ja'n mumu maŋu tyʌjcʌyaju aŋgui'mbamʌy tzajpojmopʌ Dios. Tʌjcʌyajpa te' chʌcjayajpapʌ's tzajpojmopʌ ʌs Ndata Diojsis šunbapʌ tiyʌ.

²² Sone pʌ'nisʌj maŋba nʌjayaju te' pijche'cpʌ jamo'oyj: Señor, Señor, mis nʌquiʌsitʌ tza'maŋwa'oyu. Y mis nʌquiʌsi macpujtyajutʌs yatzita'mbʌ espíritu. Y mis nʌquiʌsi ndzʌjcutʌs wʌwʌ isaŋwʌ'ajcuy.

²³ Pijche'cʌs maŋba nʌjayaju: Nijujche'cʌsmij ja'ispʌctamʌ. Jʌcʌ'tamʌ tey, nyacha'cuy chʌcpata'm.

Metzapʌ tzo'tzcuy

²⁴ Te'cotoya iwʌ's myatoŋjapya ʌs ndzamyajupʌ tiyʌ y quiojamba, mujsopyapʌ pʌnše'ʌs utzpa, jujcha' yajtzu'cumupʌ's tyʌc mʌja tza'cʌsi.

²⁵ Y quejcu te' tuj, pʌmya'u nʌ', y poyu sawa. Y pyʌmi'ojmo wiyu'ŋaju te' nʌ' te' tʌjcʌsi, y jayajcunʌ porque mʌja tza'cʌsi inʌc ijtu cho'tzcuy.

²⁶ Y iwʌ's myatoŋjapya ʌs ndzamyajupʌ tiyʌ y ja'n quiojame, ja'n myujsopyʌ pʌnše'ʌs utzpa, jujcha' yajtzu'cumupʌ's tyʌc wa'na'ojmo.

²⁷ Y quejcu te' tuj, pʌmya'u nʌ', y poyu sawa. Y pyʌmi'ojmo wiyu'ŋaju te' nʌ' te' tʌjcʌsi, y yajcunu, y maya'aŋ tocoyu.

²⁸ Y chamu'ca Jesujsis yʌ'šejta'mbʌ tiyʌ, ñʌmayajayajpa inʌc pʌ'nista'm te' ñe' 'yaŋma'yoquiuy,

²⁹ porque ñe'cʌ's 'yaŋmayajpa inʌc wʌpʌ aŋgui'mʌtʌjcupyit, y ja'nde' te' aŋgui'mguy-tyayu aŋma'yoyajpašej inʌc.