San Mateo 26 - Zoque Copainalá New Testament

Quipsaŋgospo'ʌyaju wa'y ñuquiaju Jesús

¹ Cha'maŋjeju'ca Jesujsis mumu yʌ'šejta'mbʌ tiyʌ, nʌjayutʌj, tʌj te' quiʌ'aŋmayeta'm.

² Mustambamis que metza jamacʌsi maŋba cho'tzu te' pascua-sʌŋ. Pijche'cʌj maŋba tzi'oquia'yaju ʌj, te' Pʌ'nis 'Yune, wa'yʌj ma'mʌyaju cruzcʌsi.

³ Pijche'cande' te' sacerdote-cowi'nata'm y te' aŋgui'mguy-tyayuta'm y te' judio'sta'm chamupʌndʌcway tu'mʌyaju te' más mʌja'ŋbʌ sacerdote's 'yaŋgo'oyj. Y te' sacerdote's ñʌy Caifaste' inʌc.

⁴ Y aŋdzamyaju ñe'co'mota'm wa'y 'yaŋgoma'cʌyaju te' Jesús, y te'šej wa'y ñuquiaju, y wa'y yajca'yaju.

⁵ Y nʌmyajpa inʌc: Ja'n 'yoye sʌŋ-jamo'oyj wa'ytyʌ nujcu uy maŋu šo'nwitu'yaju pʌnda'm.

Tumʌ yomo's jyajsu Jesús

⁶ Y Betania-cumgu'yojmo inʌc ijtu te' Jesús te' yatziputzi'ʌyupʌ Simo'ŋis tyʌjcaŋʌ.

⁷ Tey quiʌ'minu Jesús tumʌ yomo's. Ñʌminu tumʌ alabastropʌ cojtoquiuy ijtuwo'mo omoma jajsoquiuy wʌwʌ coyowapʌ. Y te' yomo's minu 'yumbʌ'jayu te' Jesujsis quiopajcʌsi te' mesa'ŋi pocsumʌy.

⁸ Y tʌs, te' quiʌ'aŋmaye's, ŋguenutʌs te'šej y nʌqui'šca'utʌs, y nʌmutʌj: ¿Tiyajca' yʌ'šej 'yumbʌ'tochʌcpa?

⁹ Porque yʌ'wʌ muspa inʌc mya'ʌyaju wʌwʌ tumingʌsi wa'y chi'yatʌju te' pobreta'm.

¹⁰ Cʌmato'ŋʌyutʌj Jesujsis, y nʌjayutʌj: ¿Tiyajca' ndochʌctamba yʌ' yomo? Oyepʌ tiyʌ'ʌjyʌ' tzʌcjayu.

¹¹ Te' pobreta'm mumu jama ijtyajpa miji'ŋda'm. Pero ʌj, ja'nʌj mumu jama maŋu ijtu miji'ŋda'm.

¹² Porque 'yumbʌ'ušej ʌs ŋgüerpocʌsi, ñimejcʌwya'a te' ñipyajpa'camʌj.

¹³ Wiyuŋše'ʌsmij ndzamjaytyamba, que mumujutʌta'm chamgopuŋyajpa te' evangelio najsacopajcʌsi, te'šejtijque' maŋba chamyajque'tu yʌ' yomo's chʌjcupʌ tiyʌ wa'y jyamwʌtzʌquiaju ñe'cʌ.

Judajsis ñu'ma'ʌyu Jesús

¹⁴ Pijche'ca tumʌ tʌs macwʌstʌjca'pyʌ ndʌwʌ'ojmoc ñʌjayajpapʌ Judas Iscariote, maŋu ijtyajumʌy te' sacerdote-cowi'nata'm.

¹⁵ Maŋu ñʌjayaju: ¿Jujche'ŋamʌj ŋgoyojtamba wa'yʌs ndzi'oquia'u Jesús mijcʌsita'm? Y ñe'cʌ'sta'm quioyojyaju ips-co-mac tumin.

¹⁶ Pijche'ca chʌcme'tzcʌ'yu Judajsis jutz wa'y chi'oquia'u ñe'cʌcʌsita'm.

Te' masanbʌ ujcaŋbajcuy

¹⁷ Y te' winbʌ jama te' sʌ'ŋoyj nwi'cpatʌs inʌc pan ja'ndiyʌpʌ's lyevadura. Pijche'c tʌj, te' Jesujsis quiʌ'aŋmayeta'm, minutʌj ijtumʌy ñe'cʌ, y nʌjayutʌs: ¿Juta' sunba wa'ytyʌs nimejcʌyu te' pascua-ñchowambe wa'ytyʌ ŋgʌ'stamu?

¹⁸ Y ñe'cʌ's nʌjayutʌj: Maŋdamʌ te' cumgu'yojmo pit ʌ'wʌpʌ pʌ'naŋʌ, y nʌjaytyamʌ: Tʌs Ngowi'na nʌmu: Nʌwa' tyo'mʌyu te' aŋsʌŋ wa'yʌj ŋga'u. Mis ndʌjcojmo'ʌs maŋba ŋgotzʌjcu te' pascua te' ʌs ŋgʌ'aŋmayeji'ŋda'm.

¹⁹ Y te' cʌ'aŋmaye'sta'm chʌquiaju 'yaŋgui'myajušej Jesujsis. Y te'šej ñimejcʌyaju tey te' pascua-sʌŋgotoya.

²⁰ Y tzu'yanʌmu'ca maŋutʌj ndumʌpocsu mesa'ojmo Jesusji'ŋ, macwʌstʌjca'pyʌni.

²¹ Y nʌ'candʌj ŋgu'tu nʌjayutʌj Jesujsis: Wiyuŋše'ʌsmij ndzamjaytyamba que tuma'ŋbʌn mi'ojmocta'mbʌ'sʌj maŋba tzi'oquia'u.

²² Y maya'aŋdʌj triste'aju. Y tumdumʌtʌs ŋgʌ'aŋwa'cʌ'yu: ¿Señor, ja'nsʌ'ŋde' ʌs?

²³ Pijche'ca ñe'cʌ aŋdzoŋu y nʌmu: Iwʌ's tyumʌto'spa te' pan ʌji'ŋ tumʌpʌ plato'mo, te'wʌ'sʌjte' maŋba tzi'oquia'u.

²⁴ Wiyuŋšej, ʌj te' Pʌ'nis 'Yune, maŋba'mʌj nduŋgʌpʌjcu, ja'yʌyajuše'ʌj Totojaye'ojmo. Pero ay te' pʌn maŋbapʌ'sʌj tzi'oquia'u, ʌj te' Pʌ'nis 'Yune. Más inʌc oye te' pʌngotoya juca inʌc japyʌ'na.

²⁵ Pijche'ca aŋdzoŋu Judas, te' chi'oquia'papʌ's, y nʌmu: ¿Maestro, ja'nsʌ'ŋde' ʌs? Jesujsis ñʌjayu: Jʌ'ʌ miste', ne'cʌtijmis nʌ ndzamu.

²⁶ Y te'yandʌj nʌ ŋgu'tu'c, pyʌjcu Jesujsis te' pan y ñicomasa'nʌyu, y wyenu y tzi'utʌj, tʌj te' quiʌ'aŋmaye, y nʌmu: Pʌctamʌ y wi'ctamʌ, yʌ'wʌ ʌsyʌ' ŋgüerpo.

²⁷ Y pyʌjcu te' vaso, y ñʌjayu Dios yʌscotoya. Y tzi'que'tutʌj, y nʌmu: To'ŋne'ŋbʌ'tamʌ.

²⁸ Porque yʌ' vino ʌsyʌ' nʌ'pin maŋba 'yumbʌ'jayajupʌ. Y maŋba pyaquitzi'u te' jomepʌ trato, y maŋba yajcotocoyjayu wʌwʌ pʌ'nista'm quiowa.

²⁹ Y nʌjaytyamba'ʌsmij que desde yʌtij ja'na'mʌs ndo'ŋgue'temaj te' uva-tʌ'mis ñʌ' hasta ʌ' jamo'oyj ndo'ŋwʌtzʌcpa'camʌs jomewʌ miji'ŋda'm aŋgui'mbamʌy ʌs Ndata Dios.

Chamutya'a Jesujsis que Pedro maŋba ñʌmu que ja'n quio'ispʌqui

³⁰ Y nwanu'candʌs tumʌ te' himno tzu'cumutʌj, y maŋutʌj te' Olivo-tʌc pu'mnacʌsi.

³¹ Pijche'ca Jesujsis nʌjayutʌj: Mumu mijta'm maŋbamij ñchʌcna'tzʌtʌjtamu y maŋbamisʌj mbochactamu yʌ' tzu'oyj. Porque yʌ'šej ja'yʌyu Totojaye'ojmo: Maŋba'ʌs ndzajcu wa'y yajca'yaju te' coque'nopyawʌ. Pijche'ca maŋba pyuŋdijtitnayaju te' ñchowambeta'm.

³² Pero winsa'u'camʌj ʌsmij maŋba nwi'najaytyamu wa'yʌj maŋu Galilea-najsojmo.

³³ Y yʌ'šej aŋdzoŋu Pedro: Wempe mumu chʌcna'chatʌ y mbyochaquiajpamij, pero ʌs ja'ne.

³⁴ Y ñʌjayu Jesujsis: Wiyuŋše'ʌsmij ndzamjapya, antes que wejpa gallo, tuca'y ñacamij maŋba ñʌmu yʌ' tzu'oyj que ja'nmisʌj ŋgo'ispʌqui.

³⁵ Y ñʌjayu Pedro's: Wempe'ʌj yajca'ya miji'ŋ, ja'nʌj maŋu nʌmu que ja'ʌsmij ŋgo'ispʌqui. Y te'šejtijtʌj nʌmgue'tu muma'ŋgʌ'y.

Getsemani'ojmo 'yoto'ŋʌyu Dios te' Jesujsis

³⁶ Pijche'ctʌj nʌnu'cu Jesujsis te' luga'royj ñʌjayajpamʌy Getsemaní. Y nʌjayutʌj, tʌj te' quiʌ'aŋmayeta'm: Pocstamʌ yʌy maŋba'cše'ŋo'yʌs oto'ŋʌyu Dios ʌmʌ.

³⁷ Y pyʌjcu Jesujsis te' Pedro y te' metza Zebedeo's 'yuneta'm y ma'ŋa'ŋʌyaju. Y ñitzʌjcu wa'y tyuyu'yoyu y wa'y jene tyoyapʌjcu choco'yojmo.

³⁸ Pijche'ca Jesujsis ñʌjayu te' tuca'ytya'mbʌ: Jene triste ʌs ndzocoy jujcha' maŋba quia'upʌ. Tzʌ'ytyamʌ yʌy y nʌ'oto'ŋʌytyamʌ'ʌj Dios.

³⁹ Y ma'ŋa'ŋʌyu uša'ŋ y mucscʌne'cu wyinnacapit. 'Yoto'ŋʌyu Tyata Dios y nʌmu: Tatay, yʌ' toya maŋbapʌ'ʌs nʌcʌtʌjcupʌ, juca oye wa'yʌs jana nʌcʌtʌjcu, yajʌcʌ'ja. Pero uy tzʌqui ʌs sunbašej, sino que mis sunbašej.

⁴⁰ Y witu'u ijtyajumʌy te' quiʌ'aŋmaye, y ʌŋu'c pya'tyaju. Y ñʌjayu te' Pedro: ¿Y jamusʌmisʌj nʌ'oto'ŋʌytyamʌ Dios yajtya' tumʌ hora?

⁴¹ Uy ʌŋdame, sino que oto'ŋʌytyamʌ Dios umij nwyʌytyamu oc'isoye's. Wiyuŋšej mista'm ndzoco'yismij sunba ŋguiotzoŋdamu, pero mista'm ŋgüerpo mochipʌte'.

⁴² Maŋgue'tu myetza naco'mo y 'yoto'ŋʌyu Dios, y yʌ'šej ñʌjayu: Tatay, juca ja'n 'yoye wa'mis nyajʌcʌ'jayu yʌ' ʌs maŋba nʌcʌtʌjcupʌ toya, juca pyʌcpa wa'yʌs nʌcʌtʌjcu, tzʌcʌ mis sunbašej.

⁴³ Y witu'que'tu, y ʌŋu'ctij pya'tyajque'tu, porque jene nʌ inʌc 'yʌŋdyo'yaju.

⁴⁴ Y chaquiaju, y maŋwʌtzʌjque'tu. Y te'šejtij 'yoto'ŋʌquie'tu Dios tyuca'y ñaco'mo.

⁴⁵ Pijche'ca quiʌ'miñajque'tu Jesujsis te' quiʌ'aŋmayeta'm, y ñʌjayaju: Ʌŋdama'a, y sapʌctamʌ. Yʌtij nu'cwa'nde' hora wa'yʌj tzi'oquia'yaju ʌj, te' Pʌ'nis 'Yune, cowatzʌquita'mbʌ's quiʌ'ojmo.

⁴⁶ Tzu'cumdamʌ, ma'nta'm. Quendamʌ yʌ'ya nʌ ñu'cu te' minbapʌ'sʌj tzi'oquia'u.

Chi'oquia'u Jesús te' Judajsis

⁴⁷ Y yʌ'šejmaj nʌ ñʌmu'c Jesús, nu'cu Judas, tumʌ te' macwʌstʌjca'pyo'moc. Y miñajque'tu ñe'cʌji'ŋ wʌwʌ pʌn ñʌmiñajupʌ's 'yespada y cuytya'm, quiʌ'wejyajupʌ te' sacerdote-cowi'na'sta'm y te' judio'sta'm chamupʌndʌcwa'yis.

⁴⁸ Y te' Judajsis chamjayaju'ctya'nde' inʌc te'ta'mbʌ jutz inʌc maŋba chi'oquia'u. Yʌ'šej ñʌjayaju'c: Jutiwʌ'ʌs su'cpa, te'wʌte', nuctamʌ.

⁴⁹ Y jʌnʌjtij quiʌnu'cʌyu Jesús, y ñʌjayu: Ša'satij, Maestro. Y šu'cu.

⁵⁰ Y Jesujsis ñʌjayu: Tʌwʌy, ¿tiya' ŋgʌ'minu? Pijche'ca ca'ŋnu'quiaju te' pʌnda'm, y ñuquiaju Jesús wa'y ñʌmaŋyaju.

⁵¹ Teytyʌj inʌc ijtu Jesusji'ŋ, y tumʌ tʌs ndʌwʌ's ñʌpujtu 'yespada, chetzjayu te' mʌja'ŋbʌ sacerdote's quioyosa, y te'šej yajʌcʌ'jayu tyatzʌc.

⁵² Pijche'ca Jesujsis ñʌjayu: Cota te' mis espada ñaco'mo, porque mumu'iwʌ espadapit quijpa, espadapit maŋba quia'u.

⁵³ ¿Ngomʌ'pyaja que ja'ʌs musi nwa'cjayu yʌtij ʌs Ndata Dios wa'yʌj cʌ'wejayu aŋba'te mil angelesta'm wa'yʌj cotzoŋyaju?

⁵⁴ Juca yʌ'še'ʌs nwa'cpa, ¿jutza' inʌc maŋba tyujcu te' chambašej te' Totojaye's que te'šejte' pyʌcpa wa'y tyujcu?

⁵⁵ Pijche'ctij ñʌjayaju Jesujsis te' pʌnda'm: ¿Tiyajca'yʌ' nʌmindamba espada y cuy wa'misʌj nuctamu jujcha' nu'mbawʌ? Tumdumʌ jama inʌjcʌj pocspa miji'ŋda'm te' templo'ojmo, y aŋma'yopya inʌjcʌj, y jañuctamʌmisʌj.

⁵⁶ Pero mumu yʌ'wʌ nʌ quiʌtʌjcu wa'ytye' tyujcu chambašej Totojaye's, ja'yʌyajušej te' tza'maŋwa'oye'sta'm. Pijche'ctij jujche'ŋdʌj ñe' quiʌ'aŋmaye, ndzajcutʌs ñaytyumʌ Jesús, y poyutʌj.

Jesús te' aŋgui'myajpapʌ's wyi'naŋdʌjqui

⁵⁷ Te' ñuquiajupʌ's Jesús ñʌmaŋyaju te' mʌja'ŋbʌ sacerdote Caifajsis wyi'naŋdʌjqui. Teymʌ inʌc tu'mʌyaju te' aŋgui'mguy-tyayuta'm y te' tzamupʌndʌcwaytya'm.

⁵⁸ Pero ya'amyʌctij inʌc nʌ quio'ŋu Jesús te' Pedro's, hasta que nu'cu te' mʌja'ŋbʌ sacerdote's 'yaŋgo'oyj. Tʌjcʌyu jojmo, y maŋu pyocsu te' coyosaji'ŋda'm wa'y quienu tiyʌ inʌc chʌcjayajpa Jesús.

⁵⁹ Y te' sacerdote-cowi'na'sta'm y tzamupʌndʌcwa'yista'm, y mumu te' aŋgui'myajpawʌ's mye'chajpa inʌc jutz wa'y ñisujtzʌyaju Jesús porque nʌ inʌc wya'quiaju wa'y yajca'yaju.

⁶⁰ Pero nijutzpʌ quiowa japya'tjaya, ñempe nu'quiaju wʌwʌ ñisujtzʌyajupʌ's. Pero jʌsa'ca nu'quiaju metza minu ñisujtzʌyajupʌ's

⁶¹ y nʌmyaju: Yʌ'wʌ yʌ'šej nʌmu: Muspa'ʌs nju'mbʌ'u yʌ' Diojsis tyemplo, y tuca'y jamapit nyajtzu'cumwʌtzʌcpa'ʌs.

⁶² Pijche'ca tenaqui'mu te' mʌja'ŋbʌ sacerdote, y ñʌjayu Jesús: ¿Y nijutz ja'n 'yaŋdzowe? ¿Ja'nja nʌ matoŋu jujche'ŋda'mbʌ tiyʌcʌsimij nʌ ñicotza'mʌyaju?

⁶³ Pero Jesús nijutz ja'yaŋdzowa. Y te' mʌja'ŋbʌ sacerdote's ñʌjayu: Yʌtij aŋgui'mba'ʌsmij Diojsis ñʌquiʌsi wa'mistʌj ndzamjayu juca wiyuŋšej mijte' te' Cristo, te' Diojsis quiopiŋupʌ.

⁶⁴ Jesujsis 'yaŋdzoŋu: Pijtʌjyʌ', mis nʌ ndzamušej. Y nyajmustaŋgue'tpa'ʌsmij que jʌsa'ca maŋbamisʌj ŋguendamu ʌj, te' Pʌ'nis 'Yune, pocsu'camʌj te' mʌja'ŋbʌ Diojsis chʌ'na'ŋojmoc te' ñe'cʌ aŋgui'mbamʌy. Y maŋbamisʌj ŋguendaŋgue'tu nʌ'cʌj minu tzajpojmopʌ o'na'ojmo.

⁶⁵ Pijche'cande' te' mʌja'ŋbʌ sacerdote's, myatoŋu'ctij te'šej, chijtzu pyama y nʌmu: Nʌ 'yotowewʌ'ajayu Dios, porque Diosšej chʌcpa wyin. ¿Tiyajcandʌ me'tztaŋgue'tpamaj testigos? Yʌtij ne'cʌ mis matoŋdamwa'a jutz 'yotowewʌ'ajayu Dios.

⁶⁶ ¿Tiya' ndzamdamba? Y aŋdzoŋyaju: Ijtu quiowa y pyʌcpa wa'y yajca'yaju.

⁶⁷ Pijche'ca ñitzu'ʌyaju wyinnaco'mo, y chaŋyaju, y eyata'mbʌ's nʌ inʌc pyu'ŋyaju.

⁶⁸ Y ñʌjayajpa inʌc: Juca mijte' te' Cristo, tzamjatʌj ¿iwʌ'sasʌ'ŋmijte' nʌ mbyu'ŋu?

Pedro nʌmu que ja'n quio'ispʌqui Jesús

⁶⁹ Te'pa'ŋoyj tey inʌc pocsu Pedro aŋgo'oyj. Y tey quiʌnu'cʌyu tumʌ coyomo's, y ñʌjayu: Te'šejtijque' mij Galilea'ojmopʌ Jesusji'ŋmijyʌ' inʌc nʌ nwyijtu.

⁷⁰ Pero Pedro nʌmu mumu pʌ'nis wyi'naŋdʌjqui: Ja'ʌs ŋgo'ispʌqui. Ja'ʌs musi tiyʌ miste' nʌ ndzamu.

⁷¹ Maŋu Pedro te' puerta'ŋi. Y tey quiengue'tu eyapʌ coyomo's, y yʌ'wʌ's ñʌjayaju te' tey inʌc ijtyajupʌ: Te'šejtijque' yʌ' pʌn Nazarejtojmopʌ Jesusji'ŋ yʌ' inʌc nʌ nwyijtuwʌ.

⁷² Y pijche'c Pedro's myetza naco'mo chambʌcjayu Diojsis ñʌy wa'ytyij ñʌmu: Ja'ʌs ŋgo'ispʌqui te' pʌn.

⁷³ Y jʌsa'ca te' tey ijtyajupʌ's ca'ŋnu'quiaju Pedro'aŋi y ñʌjayaju: Wiyuŋšej mijte' ñe'ta'm tyʌwʌ porque mis ndzamdzamnaquiu'yis yajquejpa.

⁷⁴ Pijche'ca otowewʌ'ajcʌ'yu y hasta chambʌcjaquie'tu Diojsis ñʌy, y nʌmu: Ja'ʌs ŋgo'ispʌqui te' pʌn. Pijche'ctij weju te' gallo.

⁷⁵ Y jyamwʌtzʌcjayu Pedro's te' Jesujsis chame, te' ñʌjayu'c: Antes que wejpa te' gallo, maŋbamij ñʌmu tuca'y ñaca que ja'nmisʌj ŋgo'ispʌqui. Y ca'ŋbujtu Pedro fuera'ojmo, y sininba jʌyu.