San Mateo 24 - Zoque Copainalá New Testament

Nʌmu Jesús que maŋba jyu'mbʌ'yaju te' templo

¹ Tzu'cumu Jesús te' templo'ojmo, y nʌwa' inʌc myaŋu. Y tʌs, te' quiʌ'aŋmaye's, ŋgʌnu'cʌyutʌs wa'ytyʌs nyajquenu jutz sa'sa chʌquiaju te' templo.

² Pijche'ca Jesujsis aŋdzoŋutʌj: ¿Nʌja nʌmaya'tamu yʌ' templo? Wiyuŋše'ʌsmij ndzamjaytyamba que ja'n maŋu chʌ'yu yʌy necsco'mupʌ tza' cha'tʌwʌcʌsi. Mumu yʌ' maŋba jyu'mbʌ'yaju.

Quiotzambapʌ tiyʌ's yajpa'ca najsacopac

³ Y teymʌ pocscu'c Jesús Olivo-tʌc pu'mnacʌsi ŋgʌnu'cʌyutʌs, tʌs te' quiʌ'aŋmaye's, wa'ytyʌs nʌnu'mdzamu, y ŋgʌ'aŋwa'cutʌs: Tzamjaytyʌ'ʌtʌj, ¿jujche'casʌ'ŋde' maŋba tyujcu yʌ'šejta'mbʌ tiyʌ? y ¿tiyʌ'sasʌ'ŋ maŋba quiotzamu maŋba'camij minu, y maŋba'ca yaju yʌ' najsacopac?

⁴ Y aŋdzoŋu te' Jesús y nʌjayutʌj: Coquendamʌ cuenta umij 'yaŋgoma'cʌytyamu ya'iwʌ's.

⁵ Porque maŋba miñaju wʌwʌ pʌn ʌs nʌquiʌsi sujchajpawʌ, y maŋba ñʌmyaju: Ʌjte' te' Cristo. Y wʌwʌ pʌn maŋba 'yaŋgoma'cʌyaju.

⁶ Maŋbamis mustamu que nʌ quipʌnʌmu, y que nʌ chamyaju quipcuy emʌ. Pero uy na'tztame porque te'šejte' pyʌcpa wa'y tyujcu, pero ja'nmajte' maŋu yaju najsacopac.

⁷ Porque maŋba ñʌquijpu nacio'ŋis te' eyapʌ ñacion-dʌwʌ, y gobierno's te' eyapʌ gobierno-tʌwʌ. Y maŋba ijtu yatzi-ca'cuytya'm, yu' y mi'cscʌ' yʌmʌc teymʌc.

⁸ Yʌ'šejta'mbʌ tiyʌ tzo'tzcumyajte'. Maŋbamaj quieñaju maya'aŋda'mbʌ toya pʌ'nista'm.

⁹ Te'ta'mbʌ jamo'oyj maŋbamij ŋgui'nisʌtʌjtamu mumu pʌ'nis, y maŋbamij nyacsnutzʌcʌtʌjtamu y nyajca'ʌtʌjtamu porque ŋgo'ŋdambamisʌj.

¹⁰ Pijche'ctijque' soneta'mbʌ'sʌj maŋba wʌ'aŋja'maŋjejyaju. Y maŋba ñachi'oquia'ʌtʌjyaju y ñaqui'nisʌtʌjyaju.

¹¹ Y jene maŋba ijtu chʌquichʌquita'mbʌ tza'maŋwa'oye, y wʌwʌ pʌn maŋba 'yaŋgoma'cʌyaju.

¹² Y como jene maŋba ñʌcʌpo'yaju te' yacha'cuy, uša'ŋbʌndya'a maŋba ñašunʌtʌjyaju.

¹³ Pero iwʌ'sʌj co'ŋjojcʌtʌcpa hasta que ca'pa, yʌ'wʌte' cotzocpa.

¹⁴ Y naswindumʌ maŋba chamgopuŋyaju te' evangelio chambapʌ's jutz aŋgui'mba Dios, wa'y myujšaju mumu najsacopajcʌsita'mbʌ pʌ'nis. Pijche'cte' maŋba yaju najsacopac.

¹⁵ Te' tza'maŋwa'opyapʌ Danie'lis jya'yʌyu que maŋba myaŋgocʌtʌquiaju te' masanbʌ lugar, y chʌctocoyaju. Iwʌ's tyu'nba yʌ'šej chambamʌy, yajnʌctʌ'yʌ. Nguendamba'camis yʌ'še'a nʌ tyujcu,

¹⁶ pijche'c te' Judea-najsojmo ijtyajuwʌ yajpoya wa'y myaŋyaju tza'mo'mo.

¹⁷ Y iwʌ tʌjcʌcopajcʌsi ijtu, wanajcu'ca, u'ya maŋu ñʌpujtu yajtiyʌ tyʌjcojmoc.

¹⁸ Y te' ca'mo'mo nʌ yojsupʌ u'ya wyitu'u tyʌjcaŋʌ wa'y maŋu pyʌjcu te' ñu'soquiuy.

¹⁹ Pero te'ta'mbʌ jamo'oyj jene maŋba tyoyapʌquiaju checji'ŋda'mbʌ yomo, y te' ijtyajupʌ's tzu'chajpapʌ 'yune.

²⁰ Wa'ctamʌ jeque Dioscʌsi umij pacac aŋsʌ'ŋoyj o sabado-jamo'oyj maŋu mbyoytyamu.

²¹ Porque te'ta'mbʌ jamo'oyj maŋba ijtu maya'aŋbʌ toyapʌjcuy yajujche'cmaj ja'itʌpʌ desde que tzo'tzu yʌ' najsacopac hasta pijche'c, ni ja'na maŋu itque'tumaj te'šejpʌ toyapʌjcuy.

²² Y juca Diojsis ja'n yajco'nʌy te' toyapʌjcuy-'yaŋsʌŋ, ya'iwʌ inʌc ja'n quiotzoque. Pero ñe'cʌ's maŋba yajco'nʌyu te' toyapʌjcuy-'yaŋsʌŋ wa'y quiotzoquiaju ñe'cʌ's quiopiŋyajupʌ pʌn.

²³ Pijche'ca juca iwʌjutiwʌ'smij ñʌjaytyamba: Quena, yʌy ijtu te' Cristo, o juca ñʌjaytyambamij: Teymʌ ijtu. Uy wʌ'aŋjamdame.

²⁴ Porque maŋba chu'cumyaju chʌquichʌquita'mbʌ Cristo y tza'maŋwa'oyeta'm. Y maŋba chʌquiaju maya'aŋda'mbʌ tiyʌ y isaŋwʌ'ajcuy wa'y 'yaŋgoma'cʌyaju hasta te' Diojsis quiopiwita'm, juca inʌc pya'tyajpa jutz.

²⁵ Yʌtij nʌytya'mʌsmij ndzamjaytyamu maŋbamaj tyuquiajupʌ tiyʌ.

²⁶ Te'šej jeque juca ñʌjatʌjtambamij: Ʌmʌ ijtu te' Cristo ja'itʌnʌmʌmʌy, ʌsmij nʌjaytyamba: Uy maŋdame. Y juca nʌmyajpa: Tey ijtu tʌjcojmo, ʌsmij nʌjaytyamba: Uy wʌ'aŋjamdame.

²⁷ Porque maŋba'camʌj mingue'tu, ʌj te' Pʌ'nis 'Yune, ja'nʌj maŋu minu nu'mdij. Mumu pʌ'nisʌj maŋba queñaju jujcha' quieñajpa ne'mgʌ' sʌ'ŋjojpacpapʌ chojtaŋgʌsmʌc y hasta tyʌ'paŋgʌsmʌc.

²⁸ Jutʌ ijtu ca'uwʌ tiyʌ tey maŋba tyu'mʌyaju te' ju'qui.

Jutz maŋba minu te' Pʌ'nis 'Yune

²⁹ Y cʌtʌjcu'ca pijche'cta'mbʌ toyapʌjcuy, maŋba pyi'tza'u te' jama, y te' poyaj ja'na maŋu šʌ'ŋu. Te' matzata'm maŋba quiuñaju tzajpojmoc, y te' tzajpojmo ijtyajupʌ tiyʌ maŋba myi'cspʌ'yaju.

³⁰ Pijche'ca mumu najsacopajcʌsita'mbʌ pʌn maŋba jyʌyaju y tyoyapʌquiaju nʌ'ca quieju tiyʌ'iwʌ tzajpojmo quiotzambapʌ's que nʌwa'mʌj minu, ʌj te' Pʌ'nis 'Yune. Maŋba'ʌj queñaju ʌj, nʌ'camʌj minu tzajpojmopʌ o'na'ojmo ʌs mʌja'ŋajcu'yojmo, y ʌs wʌwʌpʌ ndzi'muŋgʌ'ojmo.

³¹ Y paqui maŋba myu'sonoñaju. Pijche'cʌs maŋba ŋgʌ'weju ʌs angelesta'm wa'y yajtu'mʌyjayaju te' ʌs ŋgopiwi-pʌnda'm mumu naswindumʌ desde chojtaŋgʌsmʌc hasta tyʌ'paŋgʌsmʌc.

³² Nʌctʌ'ytyamʌ yʌ' comparación te' higo-cu'yisñe': Yawaye'ŋu'cande' te' 'yaŋmaŋ, y nʌwa' wyo'mbujtu te' 'yay, mustambamis que nʌ tyo'mʌyu te' tu'aŋsʌŋ.

³³ Te'šejtijque' ŋguendamba'camis mumu yʌ'šejta'mbʌ tiyʌ, nʌctʌ'ytyamʌ que nʌwa'nde' ñu'cu te' hora wa'yʌj mingue'tu.

³⁴ Wiyuŋše'ʌsmij ndzamjaytyamba que ja'n maŋu quia'yaju yʌ' yʌtijta'mbʌ pʌn hasta que tucpa mumu yʌ'šejta'mbʌ tiyʌ.

³⁵ Maŋba yaju te' tzap y te' najsacopac, pero ʌs ndzame ja'n maŋu yaju.

³⁶ Pero jujche'c y tiyʌ jama'ʌj maŋba minu ya'iwʌ's ja'n myusi, ni te' angelejsis tzajpojmo ijtyajupʌ's, sino que ʌs Ndata'stij myuspa.

³⁷ Nʌ inʌc chʌquiajušej pʌ'nista'm Noe'is 'yaŋsʌ'ŋoyj, te'še'ʌs maŋba mba'tyaju minba'camʌj, ʌj te' Pʌ'nis 'Yune.

³⁸ Maŋba'cmaj quiejcu te' mʌja tuj nʌ inʌc quiu'tyaju, y 'yuquiaju. Nʌ inʌc quio'tʌjcajyaju y šajyaju 'yune wa'y quio'tʌjcajyaju. Te'šej inʌc nʌ chʌquiaju hasta que tʌjcʌyu Noé te' arca'ojmo.

³⁹ Jawyʌ'aŋjamya tiyʌte' maŋba tyujcu hasta que quejcu te' mʌja tuj, y sucsca'pʌ'yaju. Te'šejtij maŋba tyujque'tu minba'camʌj, ʌj te' Pʌ'nis 'Yune.

⁴⁰ Pijche'c maŋba ijtyaju metza'ŋbʌn nʌ yojšajupʌ ca'mo'mo. Tumʌ maŋba ñʌmaŋyaju, y te' eyapʌ tey maŋba chaquiaju.

⁴¹ Y maŋba ijtyajque'tu metza yomo nʌ wyayajupʌ tumʌpʌ waquiuycha'cʌsi. Tumʌ maŋba ñʌmaŋyaju, y te' eyapʌ tey maŋba chaquiaju.

⁴² Nimejcʌyu'c jeque jo'ctamʌ, porque ja'nmis mustame tiyʌ hora'ʌj maŋba minu, ʌj mista'm Ngomi.

⁴³ Cottamʌ ŋguipsoquiu'yojmo que juca inʌc myuspa te' tʌjcomi's tiyʌ hora minba te' nu'mbawʌ, quioquenba inʌc tyʌc y ja'n inʌc chaque wa'y ñinu'myaju.

⁴⁴ Te'cotoya nimejcʌyu'c coquendamʌ nwin, porque ja'nmis tiyʌ nʌ ŋguipstamu'c maŋba'ʌj minu, ʌj te' Pʌ'nis 'Yune.

Te' ñijamyajpapʌ y te' ja'n ñijamyapyʌ coyosa

⁴⁵ ¿Iwa'sʌ'ŋde' te' ñijamyajpapʌ y nʌctʌ'yopyapʌ coyosa, te' quiomi's quiojtupʌ te' ñe' quioyosacʌsita'm wa'y pyʌ'nʌyaju nu'cpa'ca hora?

⁴⁶ Dichosopʌte' te' coyosa juca te'šej nʌ chʌjcu'c minba'ca te' quiomi, y te'šej pya'tpa.

⁴⁷ Wiyuŋše'ʌsmij ndzamjaytyamba que te' quiomi's maŋba quiojtu te'wʌ mumupʌ ñe' itʌpa'tcuquiʌsi jujcha' co'aŋgui'moye.

⁴⁸ Pero juca yatzipʌte' te' coyosa, y nʌmba choco'yojmo: Ʌs ŋgomi maŋbamaj ya'yu wa'y minu.

⁴⁹ Pijche'ca tzo'tzcʌ'pya wa'y tyochʌquiaju quioyosa-tʌwʌ, y maŋba quiu'tu y 'yujcu ño'tpawʌji'ŋda'm.

⁵⁰ Maŋba minu te'wʌ's quiomi ja'n nʌ ñijamupʌ jamo'oyj ni ja'n myusipʌ hora'oyj.

⁵¹ Y maya'aŋ maŋba yajnʌco'aŋgʌyu te'wʌ te' quiomi's. Y maŋba tyumʌcojtu wʌ'aŋjamba chʌcpaji'ŋda'm. Tey maŋba jyʌyaju y toyapit maŋba quiʌ'tyaju tyʌtz.