San Mateo 2 - Zoque Copainalá New Testament

Tiju quiujnayaju matza-mujsoyeta'm

¹ Pʌ'naju Jesús te' Beleŋ-gumgu'yojmo te' Judea-najsojmo nʌ'c 'yaŋgui'mu te' rey Herodes. Pijche'c miñaju chojtaŋgʌsmʌc matza-mujsoyeta'm, y nu'quiaju Jerusaleŋ-gumgu'yojmo.

² Y quiʌ'aŋwa'quiaju: ¿Juta' ijtu te' judio'sta'm rey pʌ'najuwʌ? Porque ŋguenjawya'ndʌs te' myatza chojtaŋgʌsmʌc, y minutʌs ŋgujnayjayu.

³ Myatoŋu'ctij yʌ'šej te' rey Herodejsis, jopi'tu quipsoquiuy y te'šejtijque' mumu Jerusale'ŋojmota'mbʌ.

⁴ Y wyejtu'mʌyaju ñe'cʌ's mumu te' sacerdote-cowi'nata'm y te' Israel-pʌ'nista'm 'yaŋgui'mguy-tyayu, y quiʌ'aŋwa'quiaju: ¿Juta'nde' inʌc maŋba pyʌ'naju te' Cristo?

⁵ 'Yaŋdzoŋyaju: Te' Beleŋ-gumgu'yojmo, yʌ' Judea-najsis quiowindzʌmbapʌ, porque jya'yʌyu te' tza'maŋwa'oye's yʌ'šej:

⁶ Y mij, Belén, Juda-najsojmopʌ, ja'n yʌ' más quiʌmaŋda'm mis cowi'nata'm que ja'nde' eyata'mbʌ co'aŋgui'moye yʌpyʌ najsoyj, Porque mi'ojmoc maŋba quieju te' aŋgui'mbapʌ. Y yʌ'wʌ's maŋba quioquenjayu ʌs mbʌnda'm, y yʌ'ta'mbʌte' te' Israel-pʌnda'm.

⁷ Pijche'ca Herodejsis wyejyaju nu'mdij te' matza-mujsoyeta'm y yajtzamyaju jujche'cte' queju te' matza.

⁸ Y quiʌ'wejyatʌju Beleŋ-gumgu'yojmo, y ñʌjayaju: Maŋdamʌ teymʌ y cʌ'aŋwa'cme'tztamʌ te' une. Y mba'ttamu'camis, yajmustamʌ'ʌj wa'yʌs maŋu ŋgujnayjaquie'tu.

⁹ Y quiʌmato'ŋʌyaju'ca ñe'cʌ'sta'm te' rey, maŋyaju. Pijche'ca wyi'najayaju te' matza's, te' quieñajupʌ chojtaŋgʌsmʌc, hasta que nu'cu y minu chʌ'yu te' une's ñʌwiyuŋgʌsi.

¹⁰ Quieñaju'ctij te'šej te' matza ñʌ'o'maŋgʌtʌquiaju.

¹¹ Y tʌjcʌyaju'c te' tʌjcojmo, quieñaju te' une ñana Mariaji'ŋ, y cutcʌne'quiaju y quiʌna'tzʌyaju te' une. Ya'aŋwajyaju te' quiojtoquiuytya'm y chi'yaju oro, pomoj y mirra.

¹² Pero angelejsis yajmujšaju y yajqueñaju 'yʌwyo'mo u'ya wyitu'yaju Herodesaŋʌ. Te'cotoya pyʌquiaju eyapʌ tuŋ wa'y myaŋyaju ñe'ta'm ñajsojmo.

Maŋyaju Egipto-najsojmo

¹³ Y maŋyaju'ca te' matza-mujsoyeta'm, Diojsis 'yangelejsis yajquenu wyin ñapašo'mo te' José, y ñʌjayu: Tzu'cumʌ, y pʌcʌ te' une ñanaji'ŋ y nʌpoya, nʌmaŋya Egipto-najsojmo, y tey ma itʌ hasta que nyajmuspa'ʌsmij, porque te' Herodejsis maŋba mye'tzu te' une wa'y yajca'u.

¹⁴ Y minu ša'u te' José, y pyʌjcu te' une ñanaji'ŋ tzu'cʌsi y maŋyaju Egipto-najsojmo.

¹⁵ Teymʌ maŋu ijtyaju hasta que ca'u te' Herodes. Te'šej cʌtʌjcu wa'y tyujcu chamušej Diojsis te' tza'maŋwa'oyepit, nʌmu'c: Nwejminu'ʌs ʌs une Egipto'ojmoc.

Herodejsis yajyajca'ʌtʌju uneta'm

¹⁶ Quienu'ca Herodejsis que jamyawa' chamjaya te' matza-mujsoye'sta'm, jene qui'šca'u. Pijche'c yajyajca'ʌtʌju jujche'ŋ jaya-une desde pʌ'najupʌmaj hasta metza amepʌ tey Bele'ŋojmo y quiojambaše'ŋ. Yʌ'šej chʌjcu porque te'še'ŋ ame'ande' chʌcpa'c chamjayaju te' matza-mujsoye'sta'm que queju te' matza.

¹⁷ Pijche'c tujque'tu chamušej tza'maŋwa'opyapʌ Jeremiajsis te' nʌmupʌ:

¹⁸ Myatoŋyaju jene nʌ myaya'yaju, Nʌ quiojʌyaju y tyoyapʌquiaju te' Rama-cumgu'yojmo. Raque'lis inʌc nʌ quiojʌyaju te' 'yuneta'm, Y jašunʌ wa'y chamdzocopyaquiaju, porque yajca'yatʌju.

¹⁹ Pero nu'cu te' aŋsʌŋ, minu quia'u te' Herodes. Pijche'ca Diojsis 'yangelejsis yajquengue'tu wyin ñapašo'mo te' José Egipto'ojmo,

²⁰ y ñʌjayu: Tzu'cumʌ, pʌcʌ te' une ñanaji'ŋ y nʌmaŋya Israel-najsojmo, porque ca'yajwa'a te' sunbapʌ's inʌc yajca'yaju te' une.

²¹ Pijche'ca tzu'cumu ñe'cʌ y pyʌjcu te' une ñanaji'ŋ, y miñaju Israel-najsojmo.

²² Pero myatoŋu Jose'is que Herodejsis 'yune, Arquelao, nʌ inʌc 'yaŋgui'moyu te' Judea-najsojmo, y na'tzu wa'y myaŋu teymʌ. Y como yajmujsu Diojsis ñapašo'mo, maŋu Galilea-najsojmo.

²³ Y nu'cu'ctij tey, maŋu ijtu Nazaret-cumgu'yojmo, wa'y tyujcu nʌmyajušej te' tza'maŋwa'oyajpapʌ: Maŋba'n inʌc ñʌjayaju nazareno.