San Mateo 18 - Zoque Copainalá New Testament

¿Iwa'sʌ'ŋde' te' más mʌja'ŋbʌ?

¹ Pijche'cta'm ŋgʌ'minutʌs Jesús ŋgʌ'aŋmaye-tʌwʌji'ŋ, y nʌjayutʌs: ¿Iwa'sʌ'ŋ más mʌja'ŋ te' aŋgui'mbamʌy te' tzajpojmopʌ Dios?

² Y Jesujsis wyeju tumʌ chics une, y minu yajtenayu tʌs ŋgucmʌ,

³ y nʌmu: Wiyuŋše'ʌsmij ndzamjaytyamba: Pyʌcpa wa'y quiacpʌ'u mista'm ŋguipsoquiuy. Juca ja'ne, ja'nmij maŋu ñdyʌjcʌytyamu aŋgui'mbamʌy te' tzajpojmo ijtupʌ Dios.

⁴ Te'šej jeque iwʌ yumi'ajpa jujcha' yʌ' une, te'wʌ's maŋba pya'tu mʌja'ŋajcuy aŋgui'mbamʌy te' tzajpojmo ijtupʌ Dios.

⁵ Y iwʌ's pyʌjcʌchoŋba tumʌc yʌ'šejpʌ chics une ʌs nʌquiʌsi, ʌjte' pʌjcʌchoŋba.

Tiyʌ'stʌ yajcowapa'tpa

⁶ Y iwʌ's yajcowapa'tpa tumʌc yʌ'šej chicsta'mbʌ, te' wʌ'aŋjambawʌ'sʌj, pyʌcpa wa'y ši'nʌyjayaju mʌja waquiuycha' quiʌnʌcʌ'y y te'šej wa'y tyʌŋdʌjcʌyaju ma'rojmo.

⁷ Jene maŋba quieñaju toya najsacopac-pʌ'nista'm, porque jene ijtu yajcowapa'toyajpapʌ tiyʌ. Te'šejta'mbʌ tiyʌ's pyʌcpa wa'y ijtu, pero maŋba quienu toya te' yajcowapa'tpapʌ's tyʌwʌ.

⁸ Te'cotoya juca mis ŋgʌ' o mis ne'ŋbajquismij nyajcowapa'tpa, tʌcspʌ'ʌ, y tʌŋbʌ'ʌ. Más oye ne'ŋdyucu o cʌ'tyucu wa'mij ñdyʌjcʌyu iscuy-quengu'yojmo que ja'n como'mawʌ wa'mij ñdyʌŋdʌjcʌyaju ja'n yayepʌ jucʌtʌjcojmo.

⁹ Y juca mis nwitʌ'mismij nyajcowapa'tpa, potztonbutʌ, y tʌŋbʌ'ʌ. Más oye wa'mij ñdyʌjcʌyu tu'maŋdo'tiwʌ te' iscuy-quengu'yojmo, que ja'nde' metzapʌ nwitʌmji'ŋ wa'mij ñdyʌŋdʌjcʌyaju infierno'ojmopʌ jucʌtʌjcojmo.

Te' tocoytyʌ'upʌ ñchowambe

¹⁰ Coquendamʌ cuenta umis menoscocottamu ya'iwʌ wʌ'aŋjambapʌ'sʌj, ñempe chicspʌ. Porque ʌsmij nʌjaytyamba que ñe'ta'm 'yangelejsis quioqueñatʌjpa, y tzajpojmo ijtyaju. Y 'yoto'ŋʌyjayajpa tzajpojmo ijtupʌ ʌs Ndata Dios.

¹¹ Porque ʌs, te' Pʌ'nis 'Yune's, minu'ʌs nyajcotzoquiaju te' tocoyajupʌ.

¹² Cʌmato'ŋʌytyamʌ'ʌj: Juca ijtu tuma'ŋbʌ'nis mojsi's ñchowambe, y tocopya tumʌ, ¿ja'nsʌ'ŋ chaque te' noventa y nuevepʌ wa'y maŋu mye'tzu tza'mo'mo te' tocoyupʌ?

¹³ Y ʌsmij nʌjaytyamba: Juca pya'tpa, más ñʌ'omba te'wʌ que ja'nde' noventa y nueveta'mbʌ jatyocoyapʌ.

¹⁴ Te'šej jequete', te' tzajpojmo ijtupʌ mista'm Ndata's ja'n šunjo'y wa'y tyocoyu ni tumʌc yʌ' chicsta'mbʌ.

Jutz pyʌcpa wa'ytyʌ nyajcotoco'yoyu

¹⁵ Te'cotoya juca iwʌ'smij minba njyojtʌjcʌyu, cʌ'mawʌ ñaytyumʌ ijtu'c, y tzamnʌctʌ'yʌ que ijtu quiowa. Y juca wyʌmʌ'pya tiyʌmis ndzamjapya, sʌ'mnayu'camij maŋba ittamu mejtzji'ŋ.

¹⁶ Pero juca ja'n wyʌmʌ'i tiyʌ mis nʌtzamu, nʌmawʌ tumʌ o metza eyata'mbʌ pʌn wa'mis nduca'pyʌni ndzamnʌctʌ'ytyamu que wiyuŋbʌ tiyʌte'.

¹⁷ Y juca ni te'ta'mbʌ's chamyajpapʌ tiyʌ ja'n wyʌmʌ'i, tzamʌ wʌ'aŋja'moyajpapʌ's tyu'mʌquiu'yojmo. Y juca ni te' tu'mʌquiu'yis chambapʌ tiyʌta'm ja'n wyʌmʌ'i, jujcha' ja'n wyʌ'aŋjamepʌ's Dios, y jujcha' tze'coyajpawʌšej, te'šej comʌ'yʌ.

¹⁸ Wiyuŋše'ʌsmij ndzamjaytyamba que tiyʌ mis nyajwinductamba najsacopajcʌsi, windujcupʌ tiyʌte' tzajpojmo. Y tiyʌ mis ja'n nyajwinductame najsacopajcʌsi, ja'nde' wyinduquipʌ tiyʌ tzajpojmo.

¹⁹ Wiyuŋšej ndzamwʌtzʌcjaytyamba'ʌsmij: Juca metza'ŋbʌ'nis mi'ojmota'mbʌ's sunba wya'quiaju tiyʌ'iwʌ Dioscʌsi, y ndumʌtzocoy mis nwa'ctamba te' mismopʌ tiyʌ, te' tzajpojmo ijtupʌ ʌs Ndata's maŋba chʌjcu nwa'ctamušejmis.

²⁰ Porque jutimʌy tu'mʌyajpa metza o tuca'y ʌs nʌquiʌsi, te'yʌj maŋba ijtu ñe'cʌji'ŋda'm, nʌmu Jesús.

²¹ Pijche'ca Pedro's quiʌnu'cʌyu Jesús y ñʌjayu: Señor, ¿jujche'ŋ nacasʌ'ŋ oye wa'yʌs nyajcotocoyu te' minbapʌ'sʌj jojtʌjcʌyu? ¿Nyajcotocopyasʌ'ŋʌs cu'ya'y ñaca?

²² Jesujsis 'yaŋdzoŋu: Ʌsmij nʌjapya que cu'ya'y ñaca jene uša'ŋde'. Más oye wa'mis nyajcotocoyu mone naca.

Te' ja'n yajcotoco'yoyepʌ coyosa

²³ Te'cotoya te' tzajpojmopʌ aŋgui'mʌtʌjcuy yʌ'šejpʌte': Jujcha' rey piŋujmyayupʌ'sa jujche'ŋ jya'tzjayajpa quioyosa'sta'm.

²⁴ Y nu'ctzo'tzcʌ'yaju te' ja'chajpapʌ. Pijche'c minu 'yaŋgueju tumʌ pʌn jya'tzjapyapʌ's aŋba'te millón.

²⁵ Pero yʌ'wʌ's ja'na inʌc quiʌpa'te wa'y quioyoju. Te'cotoya aŋgui'mu te' jya'tzi-comi wa'y mya'ʌyaju te' pʌn yomoji'ŋ y 'yuneji'ŋda'm, y tyiyʌta'm ijtu, te'šej wa'y quioyoju te' jya'tzi.

²⁶ Pijche'ca cutcʌne'cu te' coyospapʌ te' jya'tzi-comi's wyi'naŋdʌjqui, y jʌyu'c ñʌjayu: Señor, to'ya'ŋʌ'ʌj, y maŋba'ʌsmij ŋgoyojpʌ'u.

²⁷ Y te' quiomi's tyo'ya'ŋʌyu te' quioyospawʌ. Chʌcʌpʌ'u, y yajcotocoyjayu te' jya'tzi.

²⁸ Y tzu'cumu'ctij tey te' coyospapʌ, pya'tu te' coyospapʌ tyʌwʌ, jya'tzjapyawʌ's mojsi's denario. Jyascʌtʌjcʌyu quiʌnʌcʌ'y y nʌwa' inʌc pyenga'u, y ñʌjayu: Coyowa'ʌj te' nja'tzjapyapʌmisʌj.

²⁹ Pijche'ca te' coyospapʌ tyʌwʌ's quiutcʌne'cjayu te' quioyosa-tʌwʌ, y jʌyu'c ñʌjayu: To'ya'ŋʌ'ʌj, y maŋba'ʌsmij ŋgoyojpʌ'u.

³⁰ Pero ñe'cʌ's jatyo'ya'ŋʌ, sino que maŋu quiojtu preso'mo hasta que quioyojpʌ'pa te' jya'tzi.

³¹ Y quieñaju'ca te' coyojšajpapʌ tyʌwʌ's tiyʌ nʌ chʌcjayu, jene ñʌqui'šca'yaju. Y maŋu ñicotza'mʌyaju te' quiomicʌsi, jutz chʌjcu te' tyʌwʌ.

³² Pijche'ca wyeju te' quiomi's y ñʌjayu: Yatzitzocopyʌ ŋguioyosamij. Ʌs nyajcotocopyʌ'jayu'ʌs mis nja'tzi porque jʌyu'c misʌj nwa'cjayu.

³³ Te'šej inʌc pyʌcpa wa'mis nyajcotocoquie'tu coyospawʌ ndʌwʌ jujcha' ʌsmij nyajcotocoyu mij.

³⁴ Te'cotoya jene qui'šca'u te' quiomi, y chi'oquia'u yacsnutzʌjcoyajpapʌcʌsi wa'y te'ta'mbʌ's yajcoyojyaju mumu te' jya'tzi.

³⁵ Te'šejmij maŋba ñchʌctamu tzajpojmo ijtupʌ ʌs Ndata's, juca ja'nmis nyajcotocoytyame ndumʌtzocoy eyata'mbʌ pʌn.