San Mateo 13 - Zoque Copainalá New Testament

Te' tʌmbu-puŋbapʌ

¹ Y te' pijche'cpʌ jamo'oyj tzu'cumu Jesús tyʌjcoyj, y maŋu pyocsu ma'ra'acapoyo'mo.

² Y quiʌtu'mʌyaju aŋba'te pʌ'nis. Pijche'ca tʌjcʌyu Jesús te' barco'ojmo, y pocsu teymʌ. Y mumu te' pʌnda'm tzʌ'yaju tey ma'ra'acapoyo'mo.

³ Y comparacioŋbit chamjayaju soneta'mbʌ tiyʌ. Yʌ'šej nʌmu: Ijtu inʌc tumʌ pʌn, tzu'cumupʌ wa'y maŋu pyuŋu tʌmbu tajyʌ'sumʌy nas.

⁴ Nʌ'c pyuŋu te' tʌmbu, wene cuñaju te' tuŋgʌsi, y paloma's minu jyu'quiaju.

⁵ Y wene cuñaju ijtumʌy tzeya-nas tza'cʌsi. Y jʌnʌjtij nayu, porque ja'n inʌc tyiŋdiŋ te' nas.

⁶ Pero piju'cande' jama, pyoŋga'u y tʌjtzu, porque jawyatzipʌquia oye.

⁷ Y wene cuñaju apijtojmo, y ye'ŋu te' apitta'm, y yajsu'csca'pʌ'u.

⁸ Y wene cuñajque'tu oyepʌ najsojmo. Y yʌ'ta'mbʌ tʌ'majyaju. Wenepʌ tʌmbu's chʌquiaju tyʌm mojsi's, y wenepʌ's chʌquiaju tuqui's, y wenepʌ's chʌquiaju ips-co-mac.

⁹ Iwʌ's ijtyaju quiowi wa'y myatoŋyaju, yajcʌmato'ŋʌya'ʌj.

Tiyʌcotoyate' chamu Jesujsis comparacioŋda'm

¹⁰ Pijche'ca ca'ŋnu'cutʌj, tʌj te' quiʌ'aŋmaye, y nʌjayutʌs: ¿Tiyajca'a comparacioŋbit oto'ŋʌyajpa?

¹¹ Y Jesujsis aŋdzoŋutʌj, y nʌmu: Porque Diojsismij nyajmustamba mij te' jayajqueyapʌ tiyʌta'm winata'mbʌ tiempo'ojmo, te' chambapʌ's jutz aŋgui'mba tzajpojmo ijtupʌ Dios. Pero te' eyata'mbʌ pʌn jayajmujša.

¹² Te' myuspapʌ'sa uša'ŋ, Diojsis maŋba yajmujsa'ŋʌyu wa'y myujsoyu más. Pero te' ja'n suni myujsupʌ's, te' uša'ŋ myuspapʌ tiyʌ maŋba yajʌcʌ'jayaju.

¹³ Te'cotoya'ʌste' oto'ŋʌyajpa comparacioŋbit. Porque ñempe quieña ja'n quie'nʌyay, y ñempe myatoŋya ja'n myujšay ni ja'n ñʌctʌ'yay.

¹⁴ Tey quiʌtʌcjayaju te' tza'maŋwa'opyawʌ Isaiajsis jya'yʌyušej, nʌmu'c: Ne' ŋgowipit maŋbamis matoŋdamu, pero ja'nmis maŋu nʌctʌ'ytyamu. Ne' nwitʌmbit maŋbamis ŋguendamu, pero ja'nmis maŋu ŋgue'nʌytyamu.

¹⁵ Porque jene nuyu'ajyajwa'a yʌ' pʌ'nista'm chocoy. Y 'yʌwyo'mošej myatoŋyajpa quiowipit, Y itzaŋga'myaju wyitʌm Wa'ytyij jana quieñaju wyitʌmbit, Y uy myatoŋyaju quiowipit, Y uy ñʌctʌ'yaju choco'yojmo, Wa'yʌj cʌwitu'ʌyaju ʌj Wa'yʌs nyajcotzoquiaju.

¹⁶ Pero jene dichoso mijta'm, porque nʌ šʌ'ŋu mista'm nwitʌm, y nʌmis matoŋdamu ŋgowipit.

¹⁷ Wiyuŋše'ʌsmij ndzamjaytyamba que sone ya'acta'mbʌ tza'maŋwa'oye's y wʌta'mbʌ pʌ'nis sunjo'yu quieñajtʌ'ʌ mis nʌ ŋguendamupʌ tiyʌ, pero jaquieña. Sunjo'yu myatoŋyajtʌ'ʌ mis nʌ matoŋdamupʌ tiyʌ, pero jamyatoŋya.

Cha'maŋwaju Jesujsis te' tʌmbu-puŋbapʌ

¹⁸ Yʌtij jeque matoŋdamʌ mista'm jutzte' sunba ñʌmu te' comparación, chambapʌ's te' tʌmbu-puŋbawʌ.

¹⁹ Iwʌ's myatoŋba jutz aŋgui'mba te' tzajpojmo ijtupʌ, y ja'n ñʌctʌ'i, minba te' yatziwʌ y yajʌcʌ'japya te' Diojsis chame tʌjcʌyupa'a choco'yojmo. Yʌ'wʌte' te' tʌmbu cuñajuwʌ tuŋgʌsi.

²⁰ Y te' tʌmbu cuñajupʌ ijtumʌy tzeya-nas tza'cʌsi, yʌ'wʌte' te' pʌnda'm myatoŋyajpapʌ's te' tzame y jʌ'nʌjʌ'nʌ pyʌjcʌchoŋyajpa, y ñʌ'omyajpa.

²¹ Pero te' choco'yojmo ja'n wyatzipʌqui te' tzame, uša'ŋ horacotoyatij wyʌ'aŋjamyajpa. Quiengʌ'yajpa'c toya o qui'nisoquiuy te' Diojsis chamecotoya, pijche'ctij ja'na šuñay, y chaquiajpa.

²² Te' tʌmbu cuñajupʌ apijtojmo, yʌ'wʌte' te' pʌnda'm myatoŋyajpapʌ's te' tzame, pero quipšajpa najsacopajcʌsipʌ yosjojcʌtʌjcuy, y ñʌ'omyajpa itʌpa'tcuy. Y yʌ'šejta'mbʌ tiyʌ's yajambʌ'yajpa te' tzame choco'yojmo, y ja'na tyʌ'may.

²³ Pero te' tʌmbu cuñajupʌ oyepʌ najsojmo, yʌ'wʌte' te' pʌnda'm myatoŋyajpapʌ's te' tzame, y ñʌctʌ'yajpa. Yʌ'wʌte' te' chʌquiajpapʌ's tʌm. Wenepʌ's chʌquiajpa tʌm mojsi's, y wenepʌ's tuqui's, y wenepʌ's ips-co-mac.

Te' tumʌnayupʌ yatzi-pa'aj trigoji'ŋ

²⁴ Chamjayajque'tu Jesujsis eyapʌ comparación, y nʌmu: Yʌ'šejte' aŋgui'mba te' tzajpojmo ijtupʌ, jujcha'nde' pʌn tijupʌ's ñijpu trigo yojsa'ŋojmo.

²⁵ Pero ʌŋyaju'cše'ŋoyj te' pʌnda'm, minu te' qui'nispapʌ's te' yojsaŋ-gomi. Minu ñʌcnijpʌyjayu yatzi-tʌmbupit, y maŋu.

²⁶ Y nayu te' trigo. Y nʌ'ca quieju te' tyʌm minu quieju te' yatzi-pa'aj.

²⁷ Pijche'ca quiʌnu'cʌyaju te' quiomi te' quioyojšajpawʌ's, y quiʌ'aŋwa'quiaju: Señor, ¿jañipʌmis oyepʌ trigo mis nyojsa'ŋojmo? ¿Tiyajca'yʌ' naquie'tu yatzi-pa'aj?

²⁸ Y ñe'cʌ's ñʌjayaju: Qui'nispapʌ'sʌj te'wʌ'syʌ' yʌ'šej minu chʌjcu. Y te' quioyojšajpawʌ's quiʌ'aŋwa'quiaju: ¿Sunbaja wa'ytyʌs maŋu ocwispʌ'u?

²⁹ Y ñe'cʌ's ñʌjayaju: Ja'ne, porque juca maŋbamis nwistamu te' yatzi-pa'aj maŋbamis nʌcwisʌytyamu te' trigo.

³⁰ Tzactamʌ wa'y tyumʌtzoquiaju hasta tiyʌ jama'ʌs maŋba nyajactu'mʌtʌju te' trigo. Y nu'cu'ca te' pitpʌ jama, ndzamjayajpati'ʌs te' coyojšajpawʌ: Jactumʌtzʌctamʌ winac te' yatzi-pa'aj, y si'ndumʌtzʌctamʌ wa'mis mboŋbʌ'tamu. Y te' trigo cottamʌ ʌs ndrigo-cotcu'yojmo.

Te' mostaza-tʌmbu

³¹ Chamjayajque'tu eyapʌ comparación, y nʌmu: Yʌ'šejpʌte' te' tzajpojmopʌ aŋgui'mʌtʌjcuy, jujcha' mostaza-tʌmbu pyʌjcupʌ te' pʌ'nis, y maŋu ñijpu yojsa'ŋojmo.

³² Wiyuŋšej yʌ'wʌte' te' más chʌlʌcspʌ tʌmbu mumupo'mo. Pero tzocpa'ca más mʌja'pa que ja'nde' eyata'mbʌ nipi. Y mʌja cuyšej tucpa, y miñajpa sitityajpapʌ paloma y chʌquiajpa ño'se 'yaŋmaŋgʌsita'm.

Te' levadura

³³ Chamjayajque'tu Jesujsis eyapʌ comparación, y nʌmu: Yʌ'šejpʌte' te' tzajpojmopʌ aŋgui'mʌtʌjcuy, jujcha' levadura pyʌjcupʌ tumʌ yomo's, y myojtu tuca'y muquipʌ harina-waye'ojmo. Te'wʌ's yajpojqui'mbʌ'u.

Tiyʌcotoyate' chamu Jesujsis comparacioŋda'm

³⁴ Y mumu yʌ'šejta'mbʌ tiyʌ cha'maŋwajayaju Jesujsis te' wʌwʌta'mbʌ pʌn comparacioŋbit. Y mumutiyʌ inʌc comparacioŋbit chamjayajpa.

³⁵ Te'šejta'mbʌ tiyʌ chamu wa'y tyujcu chamnitzajcušej te' tza'maŋwa'opyapʌ's, nʌmu'c: Maŋba'ʌs nya'aŋwaju aŋnaca wa'yʌs ndzamu comparación. Maŋba'ʌs ndzamu aŋma'yoquiuy, pʌ'nista'm jañʌctʌ'yapyʌ desde que tujcu yʌ' najsacopac.

Cha'maŋwaju Jesujsis tiyʌte' te' yatzi-pa'aj

³⁶ Pijche'ca yajtzu'cumyaju Jesujsis te' pʌnda'm, y tʌjcʌyu te' tʌjcojmo. Y ŋgʌnu'cʌyutʌs tey ŋgʌ'aŋmaye-tʌwʌji'ŋda'm, y nʌjayutʌs: Tza'maŋwajatʌj te' comparación, te' yojsa'ŋojmo wo'mbujtupʌ yatzi-pa'aj.

³⁷ Y aŋdzoŋu ñe'cʌ y nʌjayutʌj: Te' ñijpapʌ's oyeta'mbʌ tʌmbu, ʌste', te' Pʌ'nis 'Yune's.

³⁸ Y te' yojsaŋ, najsacopacte'. Y te' oyeta'mbʌ tʌmbu, te' Diojsis te' 'yuneta'm. Y te' yatzi-pa'aj, te' yatziwʌ'ste' 'yuneta'm.

³⁹ Y te' ñijpupʌ's te' yatzi-pa'aj, qui'nisopyapʌte', y te'wʌte' te' diablo. Y te' jactu'mʌquiuy, te'wʌte' te' yajpa'ca najsacopac. Y te' coyojšajpapʌ, te'wʌte' te' angelesta'm.

⁴⁰ Te'cotoya jujcha' wyoctu'mʌyajpašej yatzi-pa'aj, y pyoŋbʌ'yajpa jucʌtʌjcojmo, te'šejtij maŋba tyujque'tu yajpa'ca yʌ' najsacopac.

⁴¹ Ʌs, te' Pʌ'nis 'Yune's, maŋba'ʌs ŋgʌ'weju ʌs angelesta'm mumupʌ ʌs aŋgui'mʌtʌjcu'yojmo wa'y maŋu wyoctu'mʌyaju mumu yajca'ŋdocoyajpapʌ's tyʌwʌ, y jujche'ŋ chʌquiajpapʌ's yacha'cuy.

⁴² Y tey maŋba pyʌquiatʌju wa'y tyʌŋgomʌ'nbʌ'yatʌju jucʌtʌjcojmo. Teymʌ maŋba jyʌyaju y toyapit maŋba quiʌ'tyaju tyʌtz.

⁴³ Pijche'c te' jyustococojtyatʌjupʌ maŋba šʌ'ŋjojpaquiaju jujcha' jama ñe'ta'm Tyata Diojsis 'yaŋgui'mʌtʌjcu'yojmo. Iwʌ's ijtyaju quiowi wa'y myatoŋyaju, yajcʌmato'ŋʌya'ʌj.

Te' nipcʌwʌ'nupʌ tumin

⁴⁴ Yʌ'šejpʌte' te' tzajpojmopʌ aŋgui'mʌtʌjcuy, jujcha' tumin najsacʌ'mʌ tajcʌwʌ'nupʌ. Y pya'tpa iwʌjutiwʌ's, y quiʌwʌ'nwʌtzʌjque'tpatij. Y omapit maŋba mya'ʌyu myumutiyʌ wa'ytij jyuyu te' nas.

Te' aŋba'te coyowapʌ perla

⁴⁵ Yʌ'šejque' te' tzajpojmopʌ aŋgui'mʌtʌjcuy, jujcha' perla-ma'ʌwitu'witu'opyawʌ mye'tzpapʌ's oyeta'mbʌ perlas.

⁴⁶ Y pya'tpa más sa'sapʌ, y maŋba mya'ʌyu myumutiyʌ wa'y jyuyu.

Te' suquiuy-ñuti

⁴⁷ Yʌ'šejpʌte'que' te' tzajpojmopʌ aŋgui'mʌtʌjcuy, jujcha' suquiuy-ñuti quiojtyajupʌ ma'rojmo, ñujcupʌ's wi'ni eyata'mbʌ coquej.

⁴⁸ Y tajsu'ca ñʌpujtyaju acapoyo'mo. Y tey pocšaju'c quiopiŋyajpa te' oyeta'mbʌ y quiojtyajpa waco'mo, y te' ja'n 'yoyeta'mbʌ tyʌŋbutputwʌyajpa.

⁴⁹ Yʌ'šej maŋba chʌjcu Diojsis yajpa'ca najsacopac: Maŋba miñaju angelesta'm y maŋba pyiŋwe'ñaju te' yatzita'mbʌ pʌn te' oyeta'mbʌ'ojmoc.

⁵⁰ Y maŋba tyʌŋgomʌ'nbʌ'yatʌju jucʌtʌjcojmo te' ja'n 'yoyeta'mbʌ. Y tey maŋba jyʌyaju y toyapit maŋba quiʌ'tyaju tyʌtz.

Pecapʌ y jomepʌ oro-cojtoquiuy

⁵¹ Y cʌ'aŋwa'cutʌj Jesujsis: ¿Nʌja nʌctʌ'ytyamu mumu yʌ'šejta'mbʌ tiyʌ? Y aŋdzoŋutʌs: Jʌ'ʌ, Señor. Nʌctʌ'pyatʌs.

⁵² Y ñe'cʌ'stʌj nʌjayu: Jene oye te'šej, porque iwʌ aŋmayu te' Totojaye'ojmo chambamʌy jutz aŋgui'mba te' tzajpojmo ijtupʌ Dios, te'wʌ tʌjcomišejpʌte' ijtupʌ's myumutiyʌ y te' ñe' tyʌjcojmoc ñʌputpa jometa'mbʌ y pecata'mbʌ tiyʌ.

Jesús te' Nazaret-cumgu'yojmo

⁵³ Cha'maŋjeju'ca Jesujsis yʌ'šejta'mbʌ comparación, tzu'cumu tey.

⁵⁴ Minu te' ñe' quiumgu'yojmo, y aŋma'yoyu te' judio'sta'm wyindʌjcojmo. Y ñʌmayajayajpa inʌc 'yaŋma'yoquiuy, y nʌmyaju: ¿Juta' jequeyʌ' aŋmayu yʌ'wʌ wa'y minu yʌy 'yaŋma'yoyu y wa'y chʌjcu yʌ'šejta'mbʌ isaŋwʌ'ajcuy?

⁵⁵ ¿Ja'njate' yʌ'wʌ te' cuytyayu's 'yune? ¿Ja'njate' yʌ'wʌ's ñanaj ñʌjayajpa María, y pyotzota'm Jacobo, José, Simón y Judas?

⁵⁶ ¿Y ja'njate' yʌytya'mbʌ iti mumu te' yomojta'mbʌ pyotzo? ¿Juta' jequeyʌ' aŋmayu yʌ'wʌ wa'y minu chʌjcu y chamu mumu yʌ'šejta'mbʌ tiyʌ?

⁵⁷ Y japyʌjcʌchoŋya. Pero Jesujsis ñʌjayaju: Mumu tza'maŋwa'oye wyʌcotzamyajpa, pero ja'n ñe' ñajsojmo ni ñe' tyʌjcaŋʌ.

⁵⁸ Y Jesujsis jachʌcʌ tey wʌwʌ isaŋwʌ'ajcuy, porque jawyʌ'aŋjamya.