San Mateo 12 - Zoque Copainalá New Testament

Cʌ'aŋmaye'sta'm quitpʌquiaju trigo sabado-jamo'oyj

¹ Tumnaca nʌ inʌc quiʌtʌjcu Jesús trigo-camo'mo, y sabado-jamate' inʌc. Teytyʌj nʌ ŋgʌtʌjcu'c ñe'cʌji'ŋ y te' eyata'mbʌ quiʌ'aŋmaye, nʌtʌj inʌc nyu'u. Y ŋguitpʌjcutʌs trigo-tʌm wa'ytyʌs ŋgʌ'su.

² Y queñajutʌj te' fariseo'sta'm, y ñʌjayaju Jesús: Quena, mis ŋgʌ'aŋmaye'sta'm nʌ chʌquiaju te' yajwinducpapʌ tiyʌ te' aŋgui'mgu'yis uytyʌ ndzʌjcupʌ sabado-jamo'oyj.

³ Y Jesujsis 'yaŋdzoŋyaju: ¿Jañdyu'ndamʌtij tiyʌ chʌjcu Davijtis nʌ'c yu'u ñe'cʌ y ñe'cʌji'ŋ inʌc ijtyajuwʌ?

⁴ Yu'pit tʌjcʌyu yʌ' David Diojsis tyʌjcojmo y wyi'cu te' pan Dios inʌc chamdzi'yajpapʌ. Yʌ' pan yajwinducpapʌte' inʌc aŋqui'mgu'yis uy wyi'quiaju Davijtis ni te' ñe'cʌji'ŋ inʌc ijtyajupʌ's, sino que sacerdote'stijte' wa'y wyi'quiaju.

⁵ ¿O jañdyu'ndamʌtija te' aŋgui'mgu'yojmo que te' sacerdoteta'm yojšajpa templo'ojmo, y te'šej myaŋgocʌtʌquiajpa te' sabado-jama, y te'wʌ ja'n ñʌcowapa'tyay?

⁶ Pero ʌsmij nʌjaytyamba que ijtu yʌy más itniqui'ma'ŋʌyupʌ que ja'nde' templo.

⁷ Juca inʌc mis mustamba jutzte' sunba ñʌmu yʌ'šej: Sunba'ʌs wa'mij ñdyo'ya'ŋʌ'oytyamu, y ja'n copʌn-yajca'oquiupyʌ cʌna'tzʌ'oquiuy. Juca te'šejmis inʌc mustamba, ja'nmis inʌc ndzʌcjaytyame quiowa ja'ndiyʌta'mbʌ's quiowa.

⁸ Porque ʌj, te' Pʌ'nis 'Yune, sabado-jama'sʌjyʌ' quiomi.

Te' pʌn tʌtzpʌ's inʌc quiʌ'

⁹ Y te'ya tzu'cumu'c Jesús, maŋu te' judio'sta'm wyindʌjcojmo.

¹⁰ Y tey inʌc ijtu tumʌ pʌn tʌtzpʌ's inʌc quiʌ'. Y wa'ytyij pya'tyaju tiyʌcʌsi ñiwa'cʌyajpa, minu quiʌ'aŋwa'quiaju Jesús te' fariseo'sta'm: ¿Yajwinducpasʌ'ŋ aŋgui'mgu'yis uytyʌ ndzo'yʌ'oyu sabado-jamo'oyj?

¹¹ Y Jesujsis ñʌjayaju: Juca mi'ojmota'mbʌ's ñʌ'ijtu tumʌ ñchowambe, y te'wʌ cunba wo'ojmo sabado-jamo'oyj, ¿ja'nja maŋu jyascʌtʌjcʌyu wa'y ñʌpujtu?

¹² ¿Ja'nja mustame que más te' wʌwʌ coyowa te' pʌn que ja'n ñchowambe? Te'cotoya ja'ndʌ yajwinduqui aŋgui'mgu'yis wa'ytyʌ ndzʌjcu oyeta'mbʌ tiyʌ sabado-jamo'oyj.

¹³ Pijche'ca ñʌjayu Jesujsis te' pʌn: Yajtʌyʌyʌ mis ŋgʌ'. Y yajtʌyʌyu, y tzojcu te' quiʌ' jujcha'nde' eyapʌ cosa'sapʌ quiʌ'.

¹⁴ Te'ya tzu'cumyaju'c fariseota'm maŋu quipsaŋgospo'ʌyaju jutz wa'y yajca'yaju Jesús.

Jya'yʌyušej Isaiajsis te' Jesús

¹⁵ Myujsutya'a Jesujsis jutz inʌc maŋba quiʌquipsʌyaju, y tzu'cumu tey. Y wʌwʌ pʌ'nis quiʌ'maŋu 'yucaŋgʌ'y y yajtzocpʌ'u jujche'ŋ ca'eta'mbʌ.

¹⁶ Y chamda'njayaju oye uy ya'iwʌ yajmujšaju.

¹⁷ Yʌ'še'a chʌjcu'c, pijche'c tujcu jya'yʌyušej tza'maŋwa'opyawʌ Isaiajsis, te' Diojsis chamušej Jesús:

¹⁸ Yʌy ijtu ʌs ŋgoyospapʌ, te' ʌs ŋgopiŋupʌ, Te' jene sunbapʌ'ʌs, porque yajtzocopyacjapya ʌs ndzocoy. Maŋba'ʌs njo'ʌyu yʌ'wʌ ʌsne' Espiritupit, Y maŋba chamgopuŋu genti'lojmota'm que te' Dios Cʌme'tzopya wiyuŋbʌ tiyʌ'ojmo.

¹⁹ Ja'n maŋu quijpu, ni ja'n maŋu quipotoŋu, Ni ya'iwʌ's ja'n maŋu myatoŋjayu jojtu'ŋojmo wyejwejnaquiʌ'.

²⁰ Juca ijtu pʌn mochipʌ's wyʌ'aŋjamguy jujcha' mochi tzinindʌjcʌyupʌ cape, ñe'cʌ's maŋba pyʌmitzi'u. Juca ijtu pʌn ja'nʌj yosjapyʌ's oye jujcha' candil-chi'mchi'mnapyapʌ ja'n yosepʌ oye, ñe'cʌ's maŋba quiotzoŋu. Te'šej maŋba chʌjcu hasta que tucta'nbʌ'pa justopʌ tiyʌ.

²¹ Y mumu genti'lista'm ñe' ñʌy maŋba ñite'tzʌyjayaju.

Nʌmyaju que Jesús yatziwʌ'ste' ñʌc'ijtʌyu

²² Y ñʌmiñaju Jesujsis wyi'naŋdʌjqui tumʌ pʌn yatzi-espiritu's ñʌc'ijtʌyupʌ. Y te' pʌn to'tipʌte' y umapʌte' inʌc. Y yajtzojcu Jesujsis, cosaque'cše'ŋoyj te' to'tiwʌ y umapʌ inʌc otoŋu y quenu.

²³ Y maya'yaju mumu te' pʌnda'm, y nʌmyaju: ¿Yʌ'wʌsʌ'ŋde' te' Davijtis 'Yune, te' Mesías?

²⁴ Pero myujšaju'ca te' fariseo'sta'm, nʌmgʌ'yaju: Yʌ'wʌ's ja'n myacputi yatzita'mbʌ espíritu juca ja'n yatzita'mbʌ espiritu's quiowi'napit, te' ñʌjayajpapʌ Beelzebú.

²⁵ Jesujsis ñʌctʌ'yjayaju te' ñe'ta'm quipsoquiuy, y ñʌjayaju: Juca tumʌco gobierno'ojmota'mbʌ quipyajpa ñe'co'mo, tyacsniyajyajpa. Y juca tumʌco cumgu'yojmota'mbʌ o tʌjcoyj ijtyajupʌ quipyajpa ñe'co'mo, ja'n maŋu itjojcʌtʌquiaju.

²⁶ Y juca myacputpa Satanajsis te' ñe' quio'aŋgui'moyeta'm, ñe' te' 'yaŋgui'mʌtʌjcuy nʌ wye'nbʌ'u. Te'šej ja'n maŋu itjojcʌtʌjcu 'yaŋgui'mʌtʌjcuy.

²⁷ Y juca ʌs, te' Beelzebupi'tʌs macputpa yatzita'mbʌ espíritu, mis ŋgʌ'aŋmaye'sta'm ¿iwʌpi'ta myacpujtyajpa yatzita'mbʌ espíritu? Te'cotoya mista'mne' ŋgʌ'aŋmaye'smij maŋba nyajmujšaju que te' nʌšejmij ñʌmdamu ja'nde' wiyuŋbʌ tiyʌ.

²⁸ Pero ʌs, macputpa'ʌs yatzita'mbʌ espíritu Diojsis 'Yespiritupit. Te'cotoya yʌtij Diojsis 'yaŋgui'mʌtʌjcuy yʌy ijtu mi'ojmota'm.

²⁹ ¿Iwa'sʌ'ŋ muspa tyʌjcʌyu pʌmi'ʌyupʌ pʌ'nis tyʌjcojmo wa'y maŋu ñinu'mu? Ijtupʌte' pyena wa'y myo'csu wina wa'y mujsu ñinu'mu.

³⁰ Iwʌ ja'n suni wyijtu ʌji'ŋ, qui'nispapʌ'ʌjte'. Y iwʌ'sʌj ja'n nʌwoctu'mʌy, yajtitpʌ'pa.

³¹ Te'cotoya'ʌsmij nʌjaytyamba: Jujche'ŋ cowa y otowewʌ'ajcuy chʌquiajpapʌ pʌ'nis, maŋba yajcotocoyjayu Diojsis. Pero iwʌ's 'yotowewʌ'ajayajpa Espíritu Santo, nunca ja'n maŋu yajcotocoyu Diojsis.

³² Y iwʌ'sʌj otowewʌ'ajapya ʌj, te' Pʌ'nis 'Yune, maŋba yajcotocoyu Diojsis. Pero juca iwʌ's 'yotowewʌ'ajapya te' Espíritu Santo, te'wʌ ja'n maŋu yajcotocoyu Diojsis, ni yʌtijpʌ itcu'yojmo ni yajujche'c.

Chʌquicʌsimis maŋba ispʌquiaju

³³ Mustambatʌ que juca oye te' cuy chʌcpa oyepʌ tʌm, y juca ja'n 'yoye te' cuy ja'n chʌqui oyepʌ tʌm. Porque te' tyʌmgʌsi ispʌcpatʌ te' cuy.

³⁴ Njyoco'istotzanšejta'm mij. ¿Jutza'mis muspa ndzamdamu oyeta'mbʌ tiyʌ juca yatzitzocoytya'm mij? Porque tiyʌtʌ ŋguipspa ndzoco'yojmo, te'wʌ tʌ ndzamba aŋnacapit.

³⁵ Te' oyepʌ pʌ'nis ñʌputpa oyeta'mbʌ tiyʌ choco'yojmo quioquenbamʌy oyeta'mbʌ tiyʌ. Y te' yatzipʌ pʌ'nis ñʌputpa yatzita'mbʌ tiyʌ te' quioquenbamʌy.

³⁶ Te'cotoya'ʌsmij nʌjaytyamba: Jujche'ŋ jecse tzame ja'n yosepʌ chamyajpapʌ pʌ'nista'm, te'wʌ maŋba cha'maŋguejyaju Diojsis wyi'naŋdʌjqui te' cʌme'tzoquiuy jamo'oyj.

³⁷ Porque mis ndzamupʌ tiyʌpit maŋbamij ŋguiotzojcu, juca ja'ne, mis ndzamupʌ tiyʌcotoya maŋbamij nyajnʌco'aŋgʌyaju.

Yatzitzocoytya'mbʌ's sunba quieñaju isaŋwʌ'ajcuy

³⁸ Pijche'ca metza tuca'y aŋgui'mguy-tyayu's y te' fariseo'sta'm ñʌjayaju Jesús: Maestro, sunbatʌs wa'mistʌj nyajquenu isaŋwʌ'ajcuy jujcha' señal.

³⁹ Y ñe'cʌ aŋdzoŋu y ñʌjayaju: Yʌ' yʌtijta'mbʌ pʌn yatzita'mbʌyʌ' y cʌtzʌjcʌ'oyajpapʌ. Sunba quieñaju isaŋwʌ'ajcuy jujcha' señal, pero ja'ʌs maŋu nyajqueñaju isaŋwʌ'ajcuy jujcha' señal, sino que te' quiʌtʌcjayušej te' tza'maŋwa'opyawʌ Jonás.

⁴⁰ Tiju ijtu Jonás te' mʌja coque's chejcojmo tuca'y jama y tuca'ŋdzu'. Te'šej ʌj, te' Pʌ'nis 'Yune, maŋba'ʌj ijtu tza'tʌjcojmo tuca'y jama y tuca'ŋdzu'.

⁴¹ Te' Ninive-cumgu'yojmota'mbʌ pʌ'nis myatoŋyaju tiyʌ chamgopuŋu Jonajsis, y quipswitu'yaju. Y te' cʌme'tzoquiuy jamo'oyj maŋba tyumʌ'aŋguejyaju yʌ' yʌtijta'mbʌ pʌnji'ŋ, y yʌ' Ninive-pʌ'nista'm maŋba wya'quiaju wa'y yajnʌco'aŋgʌyatʌju, porque yʌtij yʌy ijtu más mʌja'ŋbʌ que ja'nde' Jonás, y ja'n wyʌ'aŋjamyay.

⁴² Ijtu inʌc reina tzu'cumbamʌy jama-sawa. Desde teymʌc ya'ay tzu'cumu wa'y minu myatoŋjayu Salomo'ŋis myujsoquiuy-chame. Y te' cʌme'tzoquiuy jamo'oyj maŋba tyumʌ'aŋguejyaju yʌ' reina yʌ' yʌtijta'mbʌ pʌnji'ŋ, y yʌ' reina's maŋba wya'cu wa'y yajnʌco'aŋgʌyatʌju, porque yʌtij yʌy ijtu más mujsopyawʌ que ja'nde' Salomón, y ja'n wyʌ'aŋjamyay.

Tʌjcʌwyʌtzʌcpa te' yatzi-espiritu

⁴³ Juca tumʌ yatzipʌ espiritu's chacpa te' pʌn, maŋba wyijtu cotʌtz-luga'rojmo wa'y mye'tzu cojejcuy, y ja'n pya'te.

⁴⁴ Pijche'ca nʌmba: Maŋgue'tpati'ʌj ndʌjcaŋʌ, te' pujtumʌ'yʌj. Y te'ya nu'cu'c, jojtaca pya'tpa. Tacspejtuwʌ y cowatzʌjcupa'a pya'tu te' tyʌc.

⁴⁵ Pijche'ca maŋba 'yaŋbʌjca'ŋʌyu cu'ya'y 'yespiritu-tʌwʌ más yatzita'mbʌ que ja'n ñe'cʌ. Y tʌjcʌyajpa wa'y ijtyaju te' pʌ'nojmo. Te' te'šejpʌ pʌ'nis jʌsa'capʌ itcuy más maŋba wyʌwa'u yacha'cuy que ja'n wina. Te'šej maŋba quiʌtʌcjayaju yʌ' yatzita'mbʌ pʌn.

Jesujsis ñanaj y pyotzota'm

⁴⁶ Teytyij nʌ 'yoto'ŋʌyaju'c te' pʌnda'm Jesujsis, nu'quiaju fuera'ojmoc ñe' ñanaj y pyotzota'm. Sunba inʌc 'yoto'ŋʌyaju.

⁴⁷ Tuma'ŋbʌ'nis ñʌjayu: Tey ijtyaju mis nanaj y mis mbotzota'm fuera'ojmoc, sunbamij 'yoto'ŋʌyaju.

⁴⁸ 'Yaŋdzoŋu ñe'cʌ's te' nʌ chamjayupʌ's: ¿Iwa' jeque te' ʌs nanaj, y iwa'nde' ʌs mbotzota'm?

⁴⁹ Pijche'ca ñe' quiʌ'pit winbʌ'jayutʌj te' wʌwʌta'mbʌ quiʌ'aŋmaye, y nʌmu: Yʌ'ta'mbʌte' ʌs nanaj y ʌs mbotzota'm.

⁵⁰ Porque iwʌ's chʌquiajpa tzajpojmo ijtupʌ ʌs Ndata Diojsis šu'noquiuy, te'wʌte' ʌs mbotzota'm y ʌs nanaj.