San Marcos 12 - Zoque Copainalá New Testament

Te' yatzita'mbʌ cowe'nducʌ

¹ Y chamnʌcʌtzo'tzjayaju Jesujsis yʌ'šejpʌ comparacioŋbit. Chʌjcu tumʌ nas-comi's te' uva-nipi y 'yaŋgowe'cʌyu. Y tyajwoju tza' tanquešej tey wa'y quiomi'tzu te' uva, y yajtzu'cumu torre wa'y teymʌc quiengomʌ'ñaju. Y chi'oquia'u yojšajpapʌcʌsi wa'y quiowe'nduquiaju. Pijche'ca maŋu ya'aquiumguy.

² Nu'cu'cande' te' uva-aŋsʌŋ, quiʌ'weju tumʌ quioyosa ijtyajumʌy te' cowe'nducʌta'm wa'y minu pyʌjcʌchoŋu te' uva-nipi's tyʌm quiowindzʌmbaše'ŋ.

³ Pero te' cowe'nducʌ'sta'm ñuquiaju y ñacšaju te' coyosa y wyindumʌ yajtzu'cumyaju.

⁴ Y te' uva-comi's quiʌ'wejwʌtzʌjque'tu eyapʌ quioyosa, pero ñe'cʌ'sta'm tyʌŋyaju tza'pit. Y tyʌŋjejtyaju quiopajcʌsi y chʌctza'ajyaju'ca myacpoyaju.

⁵ Y quiʌ'wejwʌtzʌjque'tu eyawʌ, y te'wʌ yajca'yaju. Y sone eyata'mbʌ ñacšaju, y eyata'mbʌ te'šej yajca'yajque'tu.

⁶ Itque'tu inʌc tumʌwʌ 'yune šunbapʌ. Te'wʌ quiʌ'wejque'tu último ñe'ca'ŋʌta'm y nʌmu: Yʌ' ʌs une maŋba quiʌna'tzʌyjayaju.

⁷ Pero te' cowe'nducʌta'm nʌmyaju ñe'co'mo: Yʌ'wʌ'syʌ' maŋba ñʌtzʌ'yu yʌ' uva-nipi. Ma'ndʌ nyajca'tamu wa'ytyʌ nijuptamu.

⁸ Pijche'ca ñuquiaju, yajca'yaju y ñʌpujtyaju te' ñe' 'yuva-nipi'ojmoc.

⁹ ¿Tiya'sʌ'ŋ maŋba chʌjcu te' uva-nipi comi's? Maŋba minu, y maŋba yajca'pʌ'yatʌju te' cowe'nducʌta'm. Y maŋba chi'oquia'u te' ñe' uva-nipi eyata'mbʌ cowe'nducʌcʌsi.

¹⁰ ¿Y jañdyu'ndamʌytya' te' Totojaye'ojmo nʌmbamʌy yʌ'šej? Te' tza' jašuñapʌ te' tʌctzʌquiajpapʌ's, Yʌ'wʌ minu yojsu aŋguinʌ tzo'tzcuquiotoya.

¹¹ Yʌ'wʌ tʌyʌ' Ngomi Diojsis quiojtu, Nguenba'ctʌ yʌ' maya'aŋbʌ tiyʌ, nʌmaya'patʌ.

¹² Pijche'ca te' qui'nišajpapʌ's Jesús chʌcme'chaju wa'y ñuquiaju, porque ñʌctʌ'yaju que ñe'cʌte' nʌ chamyaju Jesujsis chamu'c te' comparación. Pero ña'chajpa inʌc te' wʌwʌta'mbʌ pʌn. Te'cotoya chaquiaju Jesús y maŋyaju.

Te' cocoyo'oquiuy

¹³ Y miñaju Jesusaŋʌ metza tuca'y fariseo y Herodista wa'y yajcuñaju te' chamdzamnaquiuquiʌsi.

¹⁴ Minu ñʌjayaju: Maestro, muspatʌs que nwyiyuŋdzambamij y ja'nmis ŋgʌjamʌ'ʌy ya'iwʌ pʌn, ni ja'nmis ndzame sa'sata'mbʌ tiyʌ wa'ytyijmij šuñaju, sino que wiyuŋšej nyajqueñajpamis te' tuŋ Diojsisñe'. ¿Yajwinducpasʌ'ŋdʌ aŋgui'mgu'yis uytyʌ ŋgocoyo'oyu rey Cesarcʌsi, o ja'ne? ¿Ijtu pyena wa'ytyʌ ŋgocoyo'oyu, o ja'ne?

¹⁵ Pero ñe'cʌ's ñʌctʌ'yu que wʌ'aŋjamba chʌcpata'mde', y ñʌjayaju: ¿Tiyajca'mʌjte' sunba oc'istamu? Nʌminjaytyamʌ'ʌj jeque te' tumin wa'yʌs ŋguenu.

¹⁶ Ñe'cʌ'sta'm ñʌminjayaju, y Jesujsis ñʌjayaju: ¿Iwʌ'sja yʌ' wyinnaca-chʌqui, y yʌ' ja'yʌyupʌ tiyʌ cʌsmʌc? Ñe'cʌ'sta'm ñʌjayaju: Te' rey Cesa'riste'ñe'.

¹⁷ Aŋdzoŋu Jesús y ñʌjayaju: Tzi'tamʌ jeque te' César ñe'cʌ's quiowindzʌmbaše'ŋ, y tzi'taŋgue'ta Dios ñe'cʌ's quiowindzʌmbaše'ŋ. Y jene ñʌmaya'yaju Jesús.

¿Jutzasʌ'ŋ winsa'ʌnʌmu'ca?

¹⁸ Pijche'ca quiʌ'miñaju Jesús te' saduceo'sta'm. Yʌ'ta'mbʌte' nʌmyajpa que ja'n maŋu wyinsa'ʌnʌmu. Minu wa'y quiʌ'aŋwa'quiaju, y nʌmyaju:

¹⁹ Maestro, Moisejsis jayʌtzacjayutʌj que juca iwʌjutiwʌ's 'yatzi ca'pa y chacpa te' yomo, y ja'itʌ 'yune, yajnʌco'tʌjcaja te' pyotzo's te' yomo wa'y ijtyaju 'yune, te'šej wa'y yajwingʌyojayu 'yatzi's ñʌy.

²⁰ Ijtu inʌc cu'ya'ytya'mbʌ atzi. Co'tʌjcaju te' winbʌ, y ca'u pero ja'itʌ 'yune.

²¹ Y te' myetzo'mowʌ's ñʌco'tʌjcʌjayu te' yomo, y ca'que'tu te' pʌn y ja'itque'tatij 'yune. Y te'šejtij chʌjque'tu te' tyuca'yojmopʌ's y ca'que'tu.

²² Y te'šej quiu'yapyʌni ñʌco'tʌjcajayaju te' yomo, y te'šejtijque' ja'ijtya 'yune y ca'yaju. Y último ca'que'tu te' yomo.

²³ Como quiu'ya'pyʌni tiju ñʌ'itne'ŋbʌ'yaju, ¿jutiwʌ'sasʌ'ŋde' yomo winsa'yajpa'ca ca'yajupʌ?

²⁴ Pijche'ca aŋdzoŋu Jesús y ñʌjayaju: Njyopi'ttambamij porque ja'nmis nʌctʌ'ytyame te' Totojaye, ni te' Diojsis myujsoquiuy.

²⁵ Porque winsa'ʌnʌmba'ca ca'yajuwʌ'ojmoc, ja'na maŋu quio'tʌjcajyaju ni ja'na maŋu šajyaju 'yune. Pero maŋba ijtyaju jujcha' te' angelesta'm te' tzajpojmo ijtyajuwʌ.

²⁶ Juca ndzambatʌ que wiyuŋšej maŋba wyinsa'yaju te' ca'yajupʌ, pyʌcpa wa'mis ndu'ndamu jya'yʌyušej Moisejsis que te' Diojsis 'yoto'ŋʌyu ñe'cʌ apit-su'tʌ'ojmo nʌmu'c: Ʌjte' te' Abraha'ŋis Dios, te' Isaajquis Dios y te' Jacojpis Dios.

²⁷ Y juca ñe'cʌ te' ñe'ta'm Dios, queñajpamaj ñempe ca'yaju ñe'ta'm cuerpo. Te'šej jeque mijta'm jenemij nʌ njyopi'ttamu.

Te' más aŋgui'mbapʌ aŋgui'mguy

²⁸ Pijche'ca nu'cu tumʌ te' aŋgui'mguy-tyayu, te' myatoŋuwʌ's nʌ inʌc quipotoŋyaju. Y myuspa inʌc que Jesujsis 'yaŋdzoŋyaju oye, y quiʌ'aŋwa'cu yʌ'šej: ¿Jutiwa'sʌ'ŋde' te' más cowi'napʌ aŋgui'mguy mumuta'mbʌ aŋgui'mgu'yojmo?

²⁹ Jesujsis 'yaŋdzoŋu: Te' más cowi'napʌ aŋgui'mguy myumupo'moc, yʌ'wʌte': Matoŋdamʌ, Israel-pʌnda'm, tʌ Ngomi Dios, ñe'cʌtijte' te' tumʌwʌ Comi.

³⁰ Sunʌ jeque mis Ngomi Dios ndumʌtzocoy, y ndumʌ sis y ndumʌ nʌ'pin, y mumupʌ mis nʌctʌ'yoquiupyit, y mumupʌ mis nyojsaŋbit. Yʌ'wʌte' te' aŋgui'mguy-quiowi'na.

³¹ Y te' myetzo'mopʌ aŋgui'mguy-quiowi'na te'šej tomepʌtijte'que': Sunʌ mis ndʌwʌ jujcha' mis sunba ne' nwin. Ja'ndiyʌ eyapʌ aŋgui'mguy más mʌja'ŋbʌ que ja'n yʌ'šejta'mbʌ.

³² Pijche'ca te' aŋgui'mguy-tyayu's ñʌjayu Jesús: Maestro, 'yaŋdzoŋumij oye. Wiyuŋšej mis ndzamu que tumʌwʌtijte' te' Dios y ja'ndiyʌ eyapʌ dios más que ñe'cʌ.

³³ Y juca sundambatʌ Dios ndumʌtzocoy y mumu tʌ nʌctʌ'yoquiupyit, y ndumʌ sis y ndumʌ nʌ'pin y mumu tʌ mbʌmipit y juca sundambatʌ tʌ ndʌwʌ jujcha' tʌ ne' nwin, yʌ'šejta'mbʌ tiyʌ más valetzʌcpa que ja'nde' tzi'oquiuy poŋuwʌ y te' tzi'oquiuy yajca'uwʌ.

³⁴ Pijche'ca ñʌctʌ'yu'ca Jesujsis que 'yaŋdzoŋu oye, ñʌjayu: Uša'ŋ šunba wa'mij ñdyʌjcʌyu Diojsismij 'yaŋgui'mbamʌy. Y mumupʌ's ña'chajpa inʌc wa'y quiʌ'aŋwa'quiajque'tumaj.

¿Iwʌ'sasʌ'ŋde' 'yune te' Cristo?

³⁵ Nʌ inʌc 'yaŋma'yoyu Jesús te' templo'ojmo y nʌmu: ¿Tiyʌcotoyasʌ'ŋ nʌmyajpa te' aŋgui'mguy-tyayuta'm que te' Cristo Davijtiste' 'yune?

³⁶ Porque ñe'cʌ David nʌmu Espíritu Santopit: 'Yoto'ŋʌyjayu ʌs Ngomi te' Tata Diojsis, y ñʌjayu: Pocsa yʌy ʌs ndzʌ'na'ŋoyj mʌja'ŋajcu'yojmo, Nyajmaŋgopajcʌyajpa'cše'ŋo'yʌsmij te' ŋgui'nišajpapʌ'smij.

³⁷ Juca David jequete' te' tataj, ¿tiyajca' ñʌjayu te' Cristo, ʌs Ngomi, juca 'yunete'? Y sa'sa inʌc quiʌmato'ŋʌyajpa te' wʌwʌta'mbʌ pʌ'nis.

Yatzicotzamu Jesujsis te' aŋgui'mguy-tyayuta'm

³⁸ Y Jesujsis ñʌjayajpa inʌc te' 'yaŋma'yoquiu'yojmo: Coquendamʌ cuenta te' aŋgui'mguy-tyayuta'm. Yʌ'ta'mbʌ's yamyajpa pʌytya'mbʌ pyama wa'y quieñatʌju. Quiʌñʌñajpa wa'y myʌja'ŋdyujchi'yatʌju te' plaza'ojmo.

³⁹ Y quiʌñʌñajpa te' wi'naŋ-bocscuytya'm te' judio'sta'm wyindʌjcojmopʌ y te' wi'naŋ-bocscuytya'm sʌŋ-gu'tcu'yojmo.

⁴⁰ Yʌ'ta'mbʌ's ñicu'tpʌ'yajpa se'aŋ-yomota'm, y chʌquiajpa pʌytya'mbʌ conucsoquiuy wa'y cha'maŋjamyaju. Te'cotoya más wʌwʌ maŋba quio'aŋgʌyaju.

Te' se'aŋ-yomo's quiojtuše'ŋ tumin

⁴¹ Cajša'ŋi inʌc pocsu Jesús quiojtyajpamʌy inʌc tumin. Quienu jutz inʌc nʌ quiojtyaju pʌ'nista'm te' tumin te' tumin-gaša'ojmo. Soneta'mbʌ rico's nʌ inʌc quiojtyaju wʌwʌ tumin.

⁴² Minu tumʌ yacsnuwitpapʌ se'aŋ-yomo, y quiojtu tey metza te' nama tumin, metza centavote'.

⁴³ Pijche'ca wyejyaju Jesujsis te' quiʌ'aŋmayeta'm y ñʌjayaju: Wiyuŋše'ʌsmij ndzamjaytyamba que yʌ' quiojtuše'ŋ yacsnuwitpapʌ se'aŋ-yomo's yajtzocopyacpa Dios más que ja'nde' eyata'mbʌ pʌ'nis quiojtyajuše'ŋ.

⁴⁴ Porque mumu yʌ'ta'mbʌ's quiojtyajupʌ tyumingʌchʌ'yʌtijte', pero yʌ' yomo's quiotpʌ'u ijtuše'ŋbʌ tyumin maŋbapʌpit inʌc quiu'tu.