Hechos 27 - Zoque Copainalá New Testament

Quiʌ'wejyaju Pablo Roma'ojmo

¹ Pero quipsaŋbo'ʌyaju wa'ytyʌj barco'ojmo maŋu Italia-najsojmo. Y chi'oquia'yaju te' Pablo y eyata'mbʌ preso soldado-cowi'nacʌsi, ñʌjayajpapʌ Julio, Augusto's šoldado'ojmocpʌ.

² Y tʌjcʌyutʌj Adramitio'ojmocpʌ barco'ojmo maŋbapʌ inʌc ñu'cu Asia-najsis puerto'ojmota'm, y pijche'ca tzu'cumutʌj. Y tey inʌc nʌ myaŋu tʌji'ŋ Aristarco, Macedonia-pʌn Tesalonica'ojmocpʌ.

³ Y jo'pit nu'cutʌj Sidoŋ-gumgu'yojmo. Y sa'sa ñʌmaŋu te' Pablo te' Julio's, y chi'u lugar wa'y myaŋu 'yamigo's tyʌjcaŋʌta'm wa'y chi'yaju tiyʌ'iwʌ.

⁴ Y te'yandʌj tzu'cumu'c barco'ojmo y ŋgʌnetze'utʌs Chipre-isla, porque te' sawa's šujnʌwitpa inʌc te' barco.

⁵ Y ŋgʌtʌcpʌ'u'candʌs te' Cilicia's y Panfilia's quiowindzʌmyajpapʌ mar, nu'cutʌj Mira, Licia-najsojmopʌ cumgu'yojmo.

⁶ Y tey pya'tu soldado-cowi'na's Alejandria'ojmopʌ barco nʌ myaŋupʌ Italia'ojmo, y te'wo'motʌj yajtʌjcʌyu.

⁷ Sone jama'ndʌj ponij tu'ŋaju barco'ojmo y na' Gnido's wyi'na'ŋoyjtyʌj nu'cu, porque te' sawa's ja'n inʌc yajtu'ŋay te' barco. Te'cotoya maŋutʌs ŋgʌnetze'u Creta-isla, Salmo'ŋis ñʌwiyuŋgʌsi.

⁸ Acanetze'utʌj y maŋutʌj penapit y te'šejtʌj nu'cu ñʌjayajpamʌy Buenos Puertos, tomya' quienbamʌy inʌc Lasea-cumguy.

⁹ Cʌtʌjcu sone jama, y cʌtʌjcu te' ayuno-sʌŋ, pijche'c na'cha'ŋa inʌc wa'ytyʌ ndu'ŋaju barco'ojmo. Pablo's chamnʌctʌ'yaju te' pʌnda'm,

¹⁰ y nʌmu: Pʌnda'm, nʌ'ʌs ŋguenu que yʌ' ma'rojmo maŋbamis ŋguendamu toya y maya'aŋbʌ tocoquiuy, ja'n na' yʌ' barco y te' tzʌmita'm, sino te'šejtijque' tʌta'm nwin.

¹¹ Pero te' soldado-cowi'na's más inʌc ñijamba te' yajtu'ŋajpapʌ's te' barco y te' barco-cowi'na que ja'n te' Pablo's inʌc nʌ chamušej.

¹² Y como ja'ndiyʌ inʌc tey oyepʌ puerto jutimʌytyʌs wa'y ŋgʌtʌjcu pacac aŋsʌŋ, sone pʌn nʌmyaju: Cʌtʌcta'mitʌy yʌy, ma'ndʌ ndzʌjquistamu juca muspatʌ nu'cu Fenice-cumgu'yojmo. Teytyʌ ma'nta'm wa'ytyʌ ŋgʌtʌctamu pacac aŋsʌŋ, porque tey Creta-puertote' chojtaŋgʌsmʌc quenbapʌ.

Tepsmʌjtzʌyu mar te' tujwinsawa's

¹³ Y poyu'c jama-sawa quiomʌ'yaju juca cotzoquiajupa'nde'. Y tyo'pujtyaju te' barco's jyo'tzʌ'quiuytya'm y acanetzeyaju Creta-acapoyo'oyj.

¹⁴ Pero ni jajutʌšej myawʌ tzo'tzu maya'aŋbʌ sawa ñʌjayajpapʌ Euroclidón.

¹⁵ Y šujcʌtʌjcʌyu'cande' barco sawa's, ndzʌcʌpʌ'utʌs porque jamyusa'ndʌs nyajtzʌ'yʌ, y jʌ'tpʌ'utʌj.

¹⁶ Y sujnʌmaŋu'candʌ maŋutʌ nechechcʌne'cu chicspʌ Clauda-isla'ŋi. Y penapittʌs mujsu nuctzʌ'yu te' chics barco.

¹⁷ Yajqui'myaju'cande' chics barco chʌcme'chaju jutz wa'y ši'ñaju te' mʌja barco na'chaju'ŋmʌjcʌ uy maŋu tyʌjcʌyaju wa'na'ojmo. Yajwanaquiaju te' barco-pama, y te'šej ñʌmaŋu jutʌ šunu sawa's.

¹⁸ Pero jene nʌtʌ inʌc matzpʌ'nʌwijtu te' maya'aŋbʌ tujwinsawa's, te'cotoya jo'pit tyʌŋbujtyaju wene te' tzʌmi.

¹⁹ Y tyuca'yajcuy jama ne'cʌtʌs ndʌŋbʌ'jayu te' barco's yajyojšajpapʌ tiyʌ.

²⁰ Y sone jama'ndʌs ja'n ŋguene'c ni jama ni matzata'm, y maya'aŋ inʌc nʌ chaŋboye'u te' tujwinsawa, ŋgomʌ'yutʌs juca ja'nandʌjte' maŋu ŋgotzojcu.

²¹ Y sone jama'ndʌj ja'n ŋgu'ti'c, tenaqui'mu Pablo ñe'ta'm quiucmʌ y nʌmu: Pʌnda'm, wiyuŋšej oye inʌc juca inʌc misʌj ŋgʌmato'ŋʌytyamu, wa'ytyʌ jana ndzu'cumdamu Creta'ojmo uytyʌ ŋguendamu yʌ'šejpʌ toya y tocoquiuy.

²² Pero yʌti'ʌsmij ndzamjaytyamba wa'mij mbyaquitzoco'yajtamu, porque ni'iwʌ tʌ'ojmota'm ja'n maŋu quia'u, más que yʌ' barco maŋba yaju.

²³ Porque yʌ' tzu'oyj cʌnu'cʌyu'ʌj Diojsis 'yangelejsis. Y yʌ' Dios ʌs ŋgʌna'tzʌpya, y ñe'ʌjyʌ'.

²⁴ Y nʌjayu'ʌj: Pablo, uy na'tze porque ijtu pyena wa'mij 'yaŋgueju Cesa'ris wyi'naŋdʌjqui. Y yʌtij Diojsismij nʌ ñchi'yaju mumu miji'ŋ ijtyajupʌ yʌ' barco'ojmo.

²⁵ Te'cotoya mij pʌnda'm paquitzoco'yajtamʌ, porque ʌs nwʌ'aŋjamba'ʌs Dios, que maŋba tyujcu tzamjayuše'ʌj ñe'cʌ's.

²⁶ Pero maŋbapʌtʌyʌ' mbuttamu isla'ojmo.

²⁷ Nu'cu'cande' macmactascu'y tzu', y como sujnʌmaŋutʌ sawa's Adriatico-ma'rojmo, paŋguc-tzu'še'ŋoyj minu 'yaŋjamyaju te' barco-nʌtu'ŋajyajupʌ's que tomya' nʌ quieñaju nas.

²⁸ Y myujquišaju, y jʌŋu inʌc ips saj. Y tu'ŋajyaju uša'ŋ, y myujquišajque'tu y tey yʌjta'y sajtya'a jʌŋu.

²⁹ Y como na'chaju u'ya maŋu ñu'cu tza'cotʌjcojmo, tyʌŋwanaquiaju barco-ucaŋgʌcmʌc macšcu'y jo'tzʌ'quiuy, y quiʌñʌñajpa inʌc wa'y tyaŋbʌ'nʌmu.

³⁰ Y sunba inʌc pyoyaju te' yajtu'ŋajyajpapʌ's barco. Tyʌ'ŋʌyaju te' chicspʌ barco ma'rojmo, como que maŋba inʌc quiotjayaju te' jo'tzʌ'quiuytya'm barco-wi'na'ŋojmoc.

³¹ Pero Pablo's ñʌjayu te' soldado-cowi'na y soldadota'm: Juca ja'n chʌ'yay yʌ'ta'mbʌ yʌ' barco'ojmo, ja'nmij ŋguiotzoctame mijta'm.

³² Pijche'ca jyacjayaju te' soldado'sta'm te' chics barco's chay wa'y myaŋu.

³³ Y nʌ'ca tyaŋbʌ'nʌmu'c, ñʌjayaju Pablo's wa'y quiu'tyaju y nʌmu: Chʌcpa' macmactascu'y jamamij mbyacpitica'tamba, y jañchʌjquistamʌtijmis nijutzpʌ cu'tcuy.

³⁴ Te'cotoya'ʌsmij nwa'cjaytyamba wa'mij ŋguiu'ttamu wa'mij mbyʌmipʌctamu, porque ni tumʌc mista'm ŋgopajcojmopʌ nway ja'n maŋu tyocoyu.

³⁵ Y yʌ'še'a nʌmu'c, pyʌjcu te' pan, y ñʌjayu Dios yʌscotoya mumu pʌ'nista'm wyi'naŋdʌjqui, y wye'nbʌ'u'ca cu'tcʌ'yu.

³⁶ Pijche'ca mumu paquitzoco'yajyaju y cu'tyajque'tu.

³⁷ Y doscientos setenta y seis pʌndʌte' inʌc ijtu te' barco'ojmo.

³⁸ Y cu'ttajsu'candʌ, 'yumbujtyaju te' trigo ma'rojmo wa'y ya'oquejyaju te' barco.

Namawenu'c tocoyu te' barco

³⁹ Y taŋbʌ'nʌmu'ca ja'n inʌc quio'ispʌquiay te' nas. Pero 'yocnʌque'nʌyaju ma'racu'sʌ ijtumʌy acapoya. Y tey inʌc sunba pyujtyaju, juca muspa yajtʌjcʌyaju te' barco.

⁴⁰ Y jyacjayaju te' barco-jo'tzʌ'quiu'yis chay y chaquiaju ma'rojmo. Y pyu'pʌ'jayaju te' barco-mye'nwitu'cu'yis chay, y yajqui'myaju te' barco-pama sawo'mo wa'y yajwiyu'ŋaju acapoyo'mo.

⁴¹ Pero nu'quiaju tumʌtzʌcpamʌy metzapʌ nʌ', y tey pacwindujcu te' barco. Y wʌŋu wa'na'ojmo te' barco's wyi'naŋ y mʌtʌtcʌne'cu'c tzʌ'yu, y 'yucaŋgʌ'mʌc wengʌ'yu ma'ris pyʌmipit.

⁴² Pijche'ca quipšajtʌ'u myuma'ŋgʌ'y te' soldado'sta'm wa'y yajca'pʌ'yatʌju te' preso uy maŋu ni'iwʌ jembujtu'c pyoyu.

⁴³ Pero te' soldado-cowi'na's sunba inʌc yajcotzojcu Pablo, y yajwinduquiaju te' soldadota'm. 'Yaŋgui'mu wa'y tyʌŋdʌjcʌyaju wyin wina iwʌta'm muspa jyemyaju wa'y pyujtyaju nascʌsi.

⁴⁴ Y mumu eyata'mbʌ's wa'y pyʌcjayaju barco's tyabla o tyiyʌ'iwʌ. Y te'šej tujcu, mumu cotzocpʌ'yaju y pujtyaju nascʌsi.