Hechos 26 - Zoque Copainalá New Testament

Pablo's quioquijpu wyin Agripa's wyi'naŋdʌjqui

¹ Pijche'ca Agripa's ñʌjayu Pablo: Yʌtij ndzi'patʌsmij lugar wa'mis ŋgoquijpu nwin. Pijche'ca Pablo's yajqui'mu quiʌ' y ñʌcʌtzo'tzu wa'y quioquijpu wyin. Y nʌmu:

² Señor rey Agripa, yʌtij nʌ'omba'ʌs que mis nwi'naŋdʌjqui maŋba'ʌs ŋgoquijpu nwin jujche'ŋda'mbʌ tiyʌcʌsi'ʌj nicotza'mʌyajpa judio'sta'm.

³ Más ʌs nʌ'ombapʌ porque muspʌ'jayajpamis te' judio'sta'm quiostumbre y wyʌ'aŋja'moquiuytya'm. Te'cotoya nwa'cjapya'ʌsmij wa'misʌj ŋgʌmato'ŋʌyu pacienciapit.

Jutz inʌc itpa Pablo jawyʌ'aŋja'moya'cmaj

⁴ Mumu judio's myuspa jutz ʌj tiju ijtu desde une'ajcu'yojmo. Porque desde que ʌj pʌ'naju, ijtu'ʌj ŋgumguy-tyʌwʌji'ŋda'm y te' Jerusale'ŋojmo.

⁵ Yʌ'ta'mbʌ's jeque, myujšajpa que ʌj desde tzo'tzcu'yojmo fariseo'ʌjyʌ' inʌc. Y muspa'ʌj cotestigosajyaju juca šuñajpa que ŋgʌtʌme'tzpʌ'pa'ʌs inʌc wa'yʌs ŋgojambʌ'u tʌs nwʌ'aŋja'moquiuy.

⁶ Y yʌtij nʌ'ʌj cʌme'chaju porque nwʌ'aŋjamba'ʌs que maŋba tyujcu te' Diojsis chamdzi'yajupʌ tiyʌ tʌ ndatajta'm.

⁷ Te'šej nʌ jyo'cjayaju tʌ macwʌstʌjca'pyʌ tribu's wa'y quiʌpa'tyaju te' chamdzi'yatʌjušej. Y tzu'ji'ŋ jamaji'ŋ quiʌna'tzʌyajpa Dios. Rey Agripa, porque yʌ'še'ʌs njo'que'tpa, nʌ'ʌj nicotza'mʌyaju judio'sta'm.

⁸ ¿Ngomʌ'ytyambaja mi'ojmota'm que Diojsis ja'n musi yajwinsa'yaju ca'yajupʌ?

Wina jene yacsnutzʌquiajpa inʌc Pablo's te' Cristo-wʌ'aŋja'moye

⁹ Wiyuŋšej ʌs ŋguipspa'ʌs inʌc wina que pyʌcpapʌte' inʌc wa'yʌs ndzʌcjayu mal Nazarejtojmopʌ Jesujsis ñʌy.

¹⁰ Y te'še'ʌs inʌc nʌ ndzʌjcu Jerusale'ŋojmo. Y wʌwʌ'ʌs somyaju masanbʌnda'm tzi'yaju'ca'mʌj aŋgui'mʌtʌjcuy sacerdote-cowi'na'sta'm. Y yajca'yatʌju'c, tiju'ʌs ndzamu que oye.

¹¹ Y nʌ'cʌs nyajnʌco'aŋgʌyaju'c mumu judio'sta'm wyindʌjcojmota'm, sone naca'ʌs nya'otowewʌ'ajayaju Dios. Y maya'a'ŋamʌs nʌ inʌc ŋgui'nišaju'c ñe'cʌta'm, nyacsnutzʌquiaju'ʌs hasta eyata'mbʌ cumgu'yojmo.

Pablo's chamu jutz pyʌjcʌchoŋu Jesús

¹² Y te'wʌcotoya'ʌjte' inʌc nʌ maŋu Damasco'ojmo porque sacerdote-cowi'na'sʌjte' cʌ'wejyaju, y tzi'yaju'ʌj aŋgui'mʌtʌjcuy.

¹³ Señor rey, paŋguc-jamaše'ŋoyj tu'ŋojmo'ʌj ijtu'c, ŋguenu'ʌs tzajpojmoc minupʌ sʌ'ŋgʌ' más quiwaŋdzi'muŋbapʌ que ja'n jama. Te'wʌ's cʌwitu'u'ʌj y te' ʌji'ŋ nʌ inʌc myaŋyajupʌ.

¹⁴ Y cunbʌ'utʌj najsojmo muma'ŋgʌ'y. Y matoŋu'ʌs otowe judio-tzuni'ojmoc oto'ŋʌyupʌ'sʌj, y nʌjayu'ʌj: Saulo, Saulo, ¿tiyajca'mʌjte' nyacsnutzʌcpa? Toyate' mijcotoya wa'mis nejpu wi'napʌ tiyʌ.

¹⁵ Pijche'ca nʌmu'ʌj: ¿Iwa'mijyʌ' Señor? Y ñe'cʌ nʌmu: Ʌjyʌ' Jesús nʌmisʌj nyacsnutzʌjcupʌ.

¹⁶ Pero tzu'cumʌ y tenaqui'mʌ, porque yʌ'wʌcotoya'ʌsmijte' minu nyajquenu nwin. Y ŋgopiŋu'ʌsmij wa'misʌj nyosjayu y ŋgotestigosaju tiyʌta'm mis ŋguenu y te' maŋbapʌmajmis ŋguenu, nyajquengue'tpa'ca'mʌsmij nwin.

¹⁷ Maŋba'ʌsmij nyajcotzojcu mis ŋgumgutyʌwʌ's quiʌ'ojmoc, y te' genti'lista'm quiʌ'ojmoc, te' yʌti'ʌsmij maŋba ŋgʌ'wejumʌy.

¹⁸ Myaŋbamij teymʌ wa'mis nyajsʌ'ŋjayaju wyitʌm, wa'y chaquiaju pi'tza'ŋajcʌ' y wa'y quieñaju sʌ'ŋgʌ', wa'y chacjayaju Satanajsis 'yaŋgui'mʌtʌjcuy y wa'y mye'chaju Dios. Te'šej wa'yʌs nyajcotocoyjayaju quiowa y wa'y pyʌjcʌchoŋyaju pyarte te' masa'najyajupʌji'ŋ jujche'ŋʌj wʌ'aŋjamyajpapʌ's.

Pablo's chʌjcu te' quienušej te' quene'ojmo

¹⁹ Te'cotoya, Señor rey Agripa, mato'ŋoyjayu'ʌs te' tzajpojmopʌ quene.

²⁰ Wina'ʌs ndzamgopuŋgʌ'yjayaju Damasco'ojmota'mbʌ, pijche'ca Jerusale'ŋojmota'mbʌ y mumu Judea-najsojmota'mbʌ, y genti'lojmota'mbʌ. Ndzamgopuŋu'ʌs wa'y quipswitu'yaju y quiʌna'tzʌyaju Dios, y wa'y chʌquiaju pyʌcpašej wa'y chʌjcu te' quipswitu'yajupʌ's.

²¹ Te'wʌcotoya'ʌjte' nuquiaju templo'ojmo judio'sta'm, y sunu'ʌj yajca'yajtʌ'ʌ.

²² Pero como Diojsisʌj cotzoŋu hasta išo'pyʌ jama, ja'ʌs ndzaque wa'yʌs nʌtzamyaju mʌja'ŋda'mbʌ y cʌmaŋda'mbʌ. Y ja'ʌs ndzame eyapʌ tiyʌ sino que na' chamyajuše'ŋdij tza'maŋwa'oyajpapʌ's y Moisejsis que maŋbamaj tyujcu.

²³ Nʌmyaju que maŋba inʌc tyoyapʌjcu te' Cristo y maŋba wyinawinsa'u ca'yajupʌ'ojmoc wa'y chamgopuŋjayaju te' pʌnda'm y gentilta'm wa'y quieñaju te' sʌ'ŋgʌ'.

Pablo's 'yojquita'u Agripa wa'y wyʌ'aŋjamu Jesús

²⁴ Y yʌ'šej nʌ chamu'c Pablo's wa'y quioquijpu wyin, weju'c nʌmu te' Festo: Nguio'sawapʌmijyʌ' Pablo. Jene 'yaŋmayu'ŋmʌjcʌmijyʌ' nʌmij ŋguio'sawa'u.

²⁵ Pero ñe'cʌ nʌmu: Señor Festo, ja'nʌjyʌ' ŋgo'sawapʌ, sino que nʌ'ʌs ndzamu wiyuŋda'mbʌ tzame nʌctʌ'yoquiuyji'ŋbʌ.

²⁶ Yʌ'šejta'mbʌ tiyʌ myuspa re'yis, te'cotoya jana na'chcu'yʌs ndzamjapya ñe' wyi'naŋdʌjqui. Ngomʌ'pya'ʌs mumu yʌ'šejta'mbʌ tiyʌ myuspʌ'pa porque ja'nyʌ' jojcu'šcʌ'mʌ nʌ tyuquiajupʌ tiyʌ.

²⁷ Señor rey Agripa, ¿nwʌ'aŋjamyajpaja tza'maŋwa'oyajpapʌ? Ʌs muspa'ʌs que nwʌ'aŋjambamis.

²⁸ Pijche'ca Agripa's 'yaŋdzoŋu Pablo: Uša'ŋbʌ tiyʌpit misʌj sunba nyajcristianu'aju.

²⁹ Y Pablo nʌmu: Juca uša'ŋ o wʌwʌpʌpit, Diojsis yajsunʌ que ja'n na' mijtij sino que mumu išo'yʌj nʌ cʌmato'ŋʌyajupʌ's wa'mij nwyʌ'aŋja'moytyamu jujcha' ʌj, pero ja'n wa'mij ši'nʌtʌjtamu cadenapit.

³⁰ Yʌ'šejta'mbʌ tiya' chamu'c, tenaqui'mu te' rey y te' gobernador y te' Bernice, y te' tey inʌc pocšajupʌ ñe'cʌji'ŋda'm.

³¹ Y ca'ŋmaŋyaju'ca emʌ, nañʌmjayatʌjpa inʌc ñe'co'mo: Yajtiyʌ cowa jachʌcʌ yʌ'wʌ's myerecetzʌcpapʌcʌsi wa'y quia'u ni wa'y šomyaju.

³² Te' Agripa's ñʌjayu Festo: Muspatʌ inʌc ndzʌcʌpʌ'u yʌ' pʌn juca inʌc jawya'cʌ wa'mis ŋgʌ'weju Cesa'raŋʌ.