Hechos 25 - Zoque Copainalá New Testament

Ya'aŋguejyaju Pablo te' Festo's wyi'naŋdʌjqui

¹ Nu'cu jeque Festo te' najsoyj. Y tuca'y jamatij cʌtʌjcu, tzu'cumu Cesarea y qui'mu Jerusalén.

² Y quiʌ'miñaju ñe'cʌ sacerdote-cowi'na'sta'm y te' judio'sta'm 'yaŋgui'myajpawʌ's wa'y yatzicotzamyaju Pablo. Y 'yojquita'yaju,

³ y wya'quiaju wa'y chʌcjayaju ñe'ta'm šu'noquiuy wa'y quiʌ'wejque'tutij Pablo Jerusale'ŋojmo. Ñe'cʌ'sta'm quiʌquipsʌyaju wa'y minu jyo'quiaju tu'ŋojmo wa'y yajca'yaju.

⁴ Pero aŋdzoŋu Festo que tey Cesarea'ojmo nʌ inʌc quioqueñaju Pablo preso'mo, y jʌ'nʌ'amunde' inʌc maŋba ñe'cʌ.

⁵ Y nʌmu: Iwʌta'm muspa myaŋu, yajmaŋya ʌji'ŋ. Y juca ijtu tiyʌ'iwʌ quiowa te' Pablo's, niwa'cʌytyamʌ.

⁶ Y ya'yu'ca tey tucutujta'y o majca'y jamaše'ŋoyj, minu Cesarea'ojmo. Jo'pit maŋu pyocsu te' cʌme'tzopyamʌy, y aŋgui'mu wa'y ñʌmiñaju Pablo.

⁷ Y te'ya ijtu'c Pablo, quiʌne'ŋyaju te' Jerusale'ŋojmoc miñajupʌ judio'sta'm, y maya'aŋda'mbʌ cowa chʌcjayaju tey. Pero ja'n inʌc pya'tyay jutz wa'y wyiyuŋše'aju.

⁸ Quioquipcʌ'yu Pablo's ñe' wyin, y nʌmu: Ʌs janjyojtʌjcʌyja'ʌs judio'sta'm 'yaŋgui'mguy, ni te' templo, ni te' César.

⁹ Pero como te' Festo sunba inʌc chʌ'yu bien judio'sta'm wyi'naŋdʌjqui, ñʌjayu te' Pablo: ¿Sunbaja myaŋu Jerusale'ŋojmo, teymʌ'ʌsmij wa'y ŋgʌme'tzu yʌ'šejta'mbʌ tiyʌcʌsi?

¹⁰ Y Pablo nʌmu: Cesa'risyʌ' juejsis wyi'naŋdʌjqui'ʌj ijtu, pyʌcpamʌy wa'yʌj cʌ'aŋwa'cpʌquiaju. Porque nijutzpʌ ma'lʌs jañchʌcjaya judiota'm, muspaše'amis.

¹¹ Juca ndzʌjcu'ʌs tiyʌ'iwʌ cowa pyʌcpapʌ's wa'yʌj yajca'yaju, ja'nʌj nje'ŋe wa'yʌj ŋga'u. Pero juca yajtiyʌ ŋgowa'ʌs ja'ndiyʌ yʌ'ta'mbʌ'sʌj nicotza'mʌyajpašej, ya'iwʌ'sʌj ja'n musi tzi'oquia'u ñe'cʌcʌsita'm. Cesa'raŋʌ ʌj maŋba.

¹² Pijche'ca maŋu ñʌtzamyaju Festo's te' aŋgui'myajpapʌ tyʌwʌ, y pijche'c ñʌjayu Pablo: Cesa'raŋʌ mis nwa'cu wa'mij myaŋu, Cesa'raŋʌ mij myaŋba.

Ya'aŋguejyaju Pablo te' Agripa's wyi'naŋdʌjqui

¹³ Y cʌtʌjcu'ca metza tuca'y jama, minu rey Agripa y Bernice Cesarea'ojmo wa'y dyujchi'yaju Festo.

¹⁴ Y sone jama'a ijtyaju'c tey, Festo's yajmujsu te' rey jutz ñicotza'mʌyaju Pablo, y nʌmu: Felijsis chajcu yʌ' pʌn preso'mo.

¹⁵ Y tiju'cʌj Jerusale'ŋojmo yʌ'wʌcotoya cʌ'miñaju'ʌj sacerdote-cowi'na'sta'm y judio's chamupʌndʌcwa'yis, y wa'cjayaju'ʌj wa'yʌs nyajnʌco'aŋgʌyu quiowa.

¹⁶ Y aŋdzoŋyaju'ʌs que romano'sta'm ja'n chʌquiay te'šej wa'y chi'oquia'yaju iwʌjutiwʌ wa'y yajca'yaju hasta que aŋguejyajpa wa'coyajpapʌ te' nʌ ñiwa'cʌyajupʌ's wyi'naŋdʌjqui. Y te'ya wyi'na'ŋoyj ijtyaju'c te'ta'mbʌ wa'y quioquijpu wyin tiyʌpitte' nʌ ñiwa'cʌyaju.

¹⁷ Te'šej jeque tumʌmiñaju yʌy ñe'cʌta'm. Y jo'pitti'ʌj maŋu mbocsu te' cʌme'tzoyajpamʌy, y maŋu'ʌs nyajpʌcʌtʌju te' pʌn.

¹⁸ Te'ya ijtyaju'c te' ñiwa'cʌyajpapʌ's, nijutipʌ's jachamʌ wiyuŋšej tiyʌte' te' quiowa, te' ʌs inʌc ŋgomʌ'pyašej.

¹⁹ Yʌ'wʌtijte' nʌ quioquipyaju ñe'cʌji'ŋ, ñe'ta'm wyʌ'aŋja'moquiuy y te' ñʌjayajpapʌ Jesús ca'upʌ, Pablo's quiotpa inʌc quiopac que quenba.

²⁰ Y como ja'ʌs aŋbonʌctʌ'i wa'yʌs ŋgʌme'tzu yʌ'šejta'mbʌ tiyʌ, nʌjayu'ʌs juca sunba myaŋu Jerusale'ŋojmo, teymʌ wa'yʌs ŋgʌ'aŋwa'cpʌjcu yʌ'šejta'mbʌ tiyʌcʌsi.

²¹ Pero wya'cu Pablo's te'šejmaj wa'y chʌ'yu Augusto'sa wa'y quiʌme'tzu. Ngojtu'ʌs aŋgui'mguy wa'y quioqueñaju hasta que ŋgʌ'wejpa'ʌs Cesa'raŋʌ.

²² Pijche'ca Agripa's ñʌjayu Festo: Ʌs sunba'ʌs inʌc ŋgʌmato'ŋʌquie'tu yʌ' pʌn. Y ñe'cʌ's ñʌjayu: Maŋbamis ŋgʌmato'ŋʌyu jomij.

²³ Y jo'pit mʌja'ŋmequia'u'c miñaju te' Agripa y te' Bernice y tʌjcʌyaju te' mʌja'ŋbʌ soldado-cowi'naji'ŋda'm y te' cumgu'yoyjtya'mbʌ mujsoyeji'ŋ te' maŋbamʌy inʌc quiʌmato'ŋʌyaju. Pijche'ca Festo's 'yaŋgui'mgupyit ñʌmiñaju te' Pablo.

²⁴ Pijche'ca nʌmu Festo: Rey Agripa, y mumu jujche'ŋmij yʌy ittamuše'ŋ tʌji'ŋ, yʌ'yʌs ŋgotpa yʌ' pʌn mista'm nwi'naŋdʌjqui. Yʌ'wʌcotoya nicutzu'ʌyaju'ʌj judio'sta'm Jerusale'ŋojmo y yʌy wa'y wya'quiaju yʌ'wʌ, y weju'c inʌc nʌmyaju: Ja'n 'yoye wa'y itque'tumaj.

²⁵ Nʌctʌ'yu'ʌs que jachʌcʌ nijutzpʌ cowa wa'yʌs nyajca'u. Y ñe'cʌ'stij wya'cu wa'y myaŋu Augusto's wyi'naŋdʌjqui, y te'cotoya teymʌ'ʌs maŋba ŋgʌ'weju.

²⁶ Pero jañʌ'itʌ'ʌs wiyuŋbʌ tiyʌ jutzʌs wa'y njayjayu ŋgowi'na. Te'cotoya'ʌsyʌ' nʌpujtu mis nwi'naŋdʌjqui rey Agripa, y mumupʌ's wyi'naŋdʌjqui wa'y ijtu tiyʌ'ʌs wa'y nja'yʌyu ŋgʌ'aŋwa'cpʌjcu'candʌ.

²⁷ Porque ŋguipspa'ʌs que jowi'ajcuytye' wa'yʌs ŋgʌ'weju preso juca ja'ʌs nʌ nja'yʌyu totocʌsi tiyʌcotoyate' nʌ ñiwa'cʌyaju.