Hechos 24 - Zoque Copainalá New Testament

Pablo's quioquijpu wyin Felijsis wyi'naŋdʌjqui

¹ Cʌtʌjcu'ca mosa'y jama wanajcu mʌja'ŋbʌ sacerdote Ananías tzamupʌndʌcwayji'ŋda'm, y tzamdʌjcʌ'opyawʌ Tertuloji'ŋ. Y nu'quiaju gobernado'ris wyi'naŋdʌjqui wa'y ñiwa'cʌyaju Pablo.

² Y te'ya wyejyaju'c Pablo, ñitzʌjcu Tertulo's wa'y ñicotza'mʌyu y nʌmu: Mijpit sʌ'mnayu'ctʌjyʌ' itpa mumu jama, y sone oyeta'mbʌ tzʌqui nʌ tyu'ŋaju yʌ' nacio'ŋojmo mis nʌctʌ'yoquiupyit.

³ Mumu jama y mumujutʌ ndumʌcomasa'najapyatʌs mis aŋgui'moquiuy, mij Félix jene wʌpʌ 'yaŋgui'moyemij.

⁴ Pero u'yʌsmij ya'ay hora nitu'quiuy chi'u, nwa'cjapya'ʌsmij wa'mistʌj ŋgʌmato'ŋʌyu ušʌc mis wʌpʌpʌ'najcupyit.

⁵ Muspatʌs que yʌ' pʌn yatzi-pa'ajšejpʌyʌ'. Aŋnʌctza'mʌ'opya wa'y ñʌcʌpo'yaju quipcuy mumu judio'sta'm mumu naswindumʌ, y nazareno-wʌ'aŋja'moye'sta'myʌ' quiowi'na.

⁶ Yʌ'wʌ's sunu jyojtʌjcʌytyʌ'ʌ templo. Pero nujcutʌs y sunutʌs ŋgʌme'tztʌ'ʌ tʌs aŋgui'mgu'yis chambašej.

⁷ Pero minutʌ yajwindujcu te' mʌja'ŋbʌ soldado-cowi'na Lisiajsis, y jyupcʌtʌjcʌyu y yajʌcʌ'u tʌs ŋgʌ'ojmoc.

⁸ Y 'yaŋgui'myaju te'wʌ's wa'y yʌy 'yaŋguejyaju mi'aŋi te' ñicotza'mʌyajpapʌ's. Y yʌtij muspamis ndacscʌ'aŋwa'cpʌjcu wa'mis mujsu mumutiyʌcotoyatʌste' nicotza'mʌpya.

⁹ Te'šejtij aŋdzoŋyajque'tu te' judiota'm, y nʌmyaju: Wiyuŋšej te'šejte' nʌ chʌjcu.

¹⁰ Pijche'ca te' gobernado'ris chʌcjayu seña te' Pablo wa'y 'yaŋdzoŋu. Y ñe'cʌ nʌmgʌ'yu: Muspa'mʌs que sone ame'amij nyospa jujcha' juez yʌ' nacio'ŋoyj, te'cotoya oma'oma ʌs ŋgoquijpa nwin.

¹¹ Muspamis ŋgʌ'aŋwa'cu que chʌcpamaj macwʌstʌjca'y jama qui'mu'ʌj wa'yʌj maŋu ŋgʌna'tzʌ'oyu Jerusale'ŋojmo.

¹² Jaquipotowa'ʌj ya'iwʌji'ŋ ni jañchʌcʌ'ʌs tu'mʌquiuy templo'ojmo ni windʌjcojmo ni cumgu'yojmo, te'cotoya jaquieña'ʌj yʌ'šejta'mbʌ tiyo'mo.

¹³ Ni ja'n musi quiojtyaju quiopac que wiyuŋšejte' te' nicotza'mʌyajpaše'ʌj.

¹⁴ Yʌ'še'ʌsmij jeque ŋgowʌ'aŋjamjapya que te' yʌ'šejpʌ Tuŋ ñe'cʌ'sta'm ñʌjayajpapʌ ja'n 'yoyepʌ aŋma'yoquiuy, te'še'ʌs ŋgʌna'tzʌyjapya ʌs ndata'sta'm Dios. Y te'še'ʌs nwʌ'aŋjamba mumutiyʌ chambaše'ŋ aŋgui'mgu'yis y jya'yʌyajušej tza'maŋwa'oye'sta'm.

¹⁵ Dioscʌsi'ʌs njo'cpa ʌs, que maŋba wyinsa'yaju ca'yajupʌ, justota'mbʌ y ja'n jyustota'mbʌ, nʌ jyo'quiajque'tušej ñe'cʌ'sta'm.

¹⁶ Te'cotoya ndzʌcme'tzjojcʌtʌcpa'ʌs uy quionocjayu ʌs ndzocoy Diojsis ni pʌ'nista'm.

¹⁷ Pero sone ame'a cʌtʌjcu'c, minu'ʌs ndzacpʌ'u tumin ʌs ŋgumguy-tyʌwʌcotoyata'm y wa'yʌs ŋgojtu tzi'oquiuy.

¹⁸ Nʌ'cʌs ndzʌjcu yʌ'šej, cowajupʌ'ʌj queñaju templo'ojmo metza tuca'y Asia'ojmota'mbʌ judio's, ni ja'n wʌwʌ pʌnji'ŋ ni ja'ndʌj nʌ so'nwitu'u.

¹⁹ Pyʌcpa wa'y 'yaŋguejyaju te'ta'mbʌ yʌy mis nwi'naŋdʌjqui wa'yʌj nicotza'mʌyaju, juca tiyʌ'ʌs ndzʌcjayajwa'a.

²⁰ Yajtzamya te' yʌy ijtyajupʌ's tiyʌ yatzitzoco'yajcu'yʌs ndzʌjcu teymʌ'ʌj ijtu'c aŋgui'moye'sta'm wyi'naŋdʌjqui.

²¹ Jañchʌcʌ'ʌs eyapʌ tiyʌ más que weju'cʌs nʌjayaju: Nʌmisʌj ŋgʌme'tztamu yʌtij porque nwʌ'aŋjamba'ʌs que maŋba wyinsa'yaju ca'yajupʌ.

Ñuctzʌ'yaju Pablo

²² Myatoŋu Felijsis yʌ'šejta'mbʌ tiyʌ, y como ñʌctʌ'pya inʌc oye jutzte' te' Tuŋ, chajcu jʌsa'cacotoya, y nʌmu: Minu'cande' mʌja'ŋbʌ soldado-cowi'na Licias, maŋba'ʌs muspʌ'u tiyʌyʌ' mista'm nwa'coquiuy.

²³ Y 'yaŋgui'mu te' soldado-cowi'na wa'y quioquenu te' Pablo, pero u'ya šomu, y uy yajwinducjayu ni'iwʌpʌ tyʌwʌ minbapʌ's mye'tzu, ni chi'papʌ's tiyʌ'iwʌ.

²⁴ Y cʌtʌjcu'ca sone jama minu Félix ñe' judio-yomoji'ŋ, Drusila'ajupʌ. Wyeju te' Pablo y tey ñʌtzamu jutzte' te' Jesucristocʌsipʌ wʌ'aŋja'moquiuy.

²⁵ Y sa'sa nʌ'ca chamnʌctʌ'yu'c Pablo's jutztʌ justococotpa Diojsis, y que pyʌcpa wa'ytyʌ njʌ'ctzʌ'ytyamu nwin, y que maŋbatʌ cʌme'tzu Diojsis, pijche'ca na'tzu te' Félix, y ñʌjayu: Yʌtij mawʌ. Itque'tpa'ca lugar nwejque'tpa'ʌsmij.

²⁶ Nʌ inʌc jyo'cu juca minba chi'u tumin Pablo's wa'y chʌcʌpʌ'u, te'cotoya sone naca wyeju wa'y ñʌtzamdzamnayu.

²⁷ Pero metza ame ta'nu'ca, pujtu te' Félix, y tʌjcʌyu Porcio Festo. Y como sunba inʌc chʌ'yu bien judiocʌsita'm te' Félix, teymʌ chajcu Pablo preso'mo.