Hechos 23 - Zoque Copainalá New Testament

¹ Pijche'ca ñique'nʌyu Pablo's te' aŋgui'moye'sta'm tyu'mʌquiuy y nʌmu: Tʌwʌta'm, ʌj cowajupʌ tzoco'yʌs nʌ nʌtu'ŋaju Diojsis wyi'naŋdʌjqui hasta como yʌtij.

² Pijche'ca te' mʌja'ŋbʌ sacerdote Ananiajsis 'yaŋgui'myaju wa'y 'yaŋdzaŋyaju te' tome 'ya'ŋijtyajupʌ's.

³ Pijche'ca ñʌjayu Pablo's: Mij njamninacsupʌ no'tze-winnaca, Diojsismij maŋba ñchaŋu mij. ¿Ja'njamij tey mbyocsu wa'misʌj ŋgʌme'tzu aŋgui'mgupyit, y te' aŋgui'mgu'yis yajwinducpapʌ tiyʌpit, te'šej misʌj nyajtzawʌtʌjpa?

⁴ Y tey ijtyajupʌ nʌmyaju: ¿Y te'šej aŋdzoŋdʌctʌcwʌpya Diojsis myʌja'ŋbʌ sacerdote?

⁵ Y Pablo nʌmu: Tʌwʌta'm, ja'ʌs inʌc musi juca mʌja'ŋbʌ sacerdotete', porque yʌ'šej ja'yʌyu: Uy yatzicotzame mis ŋgumgu'yis quiowi'na.

⁶ Y ñʌctʌ'yu'ca Pablo's que wene pʌn saduceo y wene pʌn fariseo, paquinʌmu aŋgui'moye'sta'm tyu'mʌquiu'yojmo: Pʌnda'm, ʌj fariseo'ʌjyʌ' y fariseo'sta'm 'yune. Nwʌ'aŋjamba'ŋmʌjcʌ'ʌs maŋbamaj tyujcupʌ tiyʌ, y que maŋba wyinsa'yaju ca'yajupʌ, te'wʌcotoya misʌjte' nʌ ŋgʌme'tztamu.

⁷ Yʌ'še'a nʌmu'c quipotoŋgʌ'yaju fariseota'm saduceoji'ŋda'm, y we'ñaju te' wʌwʌpʌ pʌn.

⁸ Porque nʌmyajpa saduceo que ja'ndiyʌ'n winsa'cuy, ni ángeles, ni espirituta'm. Pero te' fariseo's maŋdzʌ'yu'c chamyajpa yʌ'šejta'mbʌ tiyʌ.

⁹ Y maya'aŋ wejqui'myaju. Y tzu'cumyaju aŋgui'mguy-tyayuta'm, te' fariseo'sta'm tyʌwʌ, y quipotoŋu'c nʌmyaju: Yajtiyʌ yacha'cuytyʌs ja'n mba'tjay yʌ' pʌ'nisñe'. Juca espiritu's o angelejsis 'yoto'ŋʌyu, ja'n 'yoye wa'ytyʌ nyajpacwinductamu Dios.

¹⁰ Y maya'a'ŋa inʌc nʌ wyocwitu'yaju'c na'tzu te' mʌja'ŋbʌ soldado-cowi'na uy maŋu ñamatuquiaju Pablo. Wyeju šoldadota'm wa'y minu ñʌpujtyaju y wa'y ñʌmaŋyaju soldado-tʌjcojmo.

¹¹ Y jo'pitpʌ tzu'oyj quiʌ'minu tʌ Ngomi's y ñʌjayu: Uy na'tze Pablo, ŋgotestigosajušejmisʌj Jerusale'ŋojmo, te'šej pyʌjque'tpa wa'misʌj ŋgotestigosajque'tu Roma'ojmo.

Quipsaŋgospo'ʌyaju wa'y yajca'yaju Pablo

¹² Y taŋbʌ'nʌmu'ca tu'mʌyaju sone judiota'm y quipsaŋgospo'ʌyjayaju toya, y Diojsis ñʌquiʌsipʌ yacha'cupyit nʌmyaju que ja'nun maŋu quiu'tyaju ni 'yuquiaju hasta que ja'nun inʌc yajca'yay Pablo.

¹³ Y wʌstʌjqui's pʌngʌtʌquita'mbʌte' inʌc te' te'šej pyʌcjayajupʌ's Diojsis ñʌy.

¹⁴ Quiʌ'maŋyaju yʌ'ta'mbʌ's sacerdote-cowi'nata'm y tzamupʌndʌcway y nʌmyaju: Tʌj, nʌmwa'ndʌj Diojsis ñʌquiʌsi que ja'ndʌs maŋu ŋgu'tu yajtiyʌ hasta que nyajca'patʌs Pablo.

¹⁵ Te'cotoya yʌtij, mista'm aŋgui'moye'sta'm tyu'mʌquiuyji'ŋ, tzamjaytyamʌ te' mʌja'ŋbʌ sacerdote-cowi'na wa'y ñʌpujtu Pablo jomij como que wa'mij nwyiyuŋdzoco'yajtamu tiyʌ'iwʌcʌsi. Y teytyʌj maŋba ijtu tʌj wa'ytyʌs nyajca'u maŋba'cmaj ñu'cu.

¹⁶ Y myatoŋu Pablo's quiose's 'yune's yʌ'šejpʌ cʌ'isʌ'oquiuy. Maŋu y tʌjcʌyu te' soldado-tʌjcoyj y chamjayu te' Pablo.

¹⁷ Y wyeju Pablo's tumʌ te' soldado-cowi'na y ñʌjayu: Nʌmawʌ yʌ' jaya-une te' mʌja'ŋbʌ soldado-cowi'naŋʌ, porque ijtu tiyʌ maŋba chamjayu.

¹⁸ Pijche'ca ñe'cʌ's pyʌjcu y ñʌmaŋu te' mʌja'ŋbʌ soldado-cowi'naŋʌ y nʌmu: Te' preso'mo ijtupʌ Pablo's weju'ʌj y nucsu'ʌj wa'yʌsmij nʌminjayu yʌ' jaya-une, ijtu'n tiyʌ mij maŋba ñchamjayu.

¹⁹ Y jyiticʌtʌjcʌyu quiʌ'cʌsi te' mʌja'ŋbʌ soldado-cowi'na's y ñʌmaŋu emʌ, y quiʌ'aŋwa'cu: ¿Tiya'mʌjte' sunba ndzamjayu?

²⁰ Y nʌmu: Nʌ 'yaŋdzamyaju te' judiota'm maŋba'n wya'quiaju wa'mis nʌpujtu Pablo jomij aŋgui'moye'sta'm wyi'naŋdʌjqui, como que wa'y wyiyuŋdzoco'yajyaju tiyʌte' te' quiowa Pablo'sñe'.

²¹ Pero mis, uy wʌ'aŋjamyay porque wʌstʌjqui's pʌngʌtʌqui's nʌ jyo'quiaju. Te'ta'mbʌ nʌmyajwa'a Diojsis ñʌquiʌsi que ja'nun maŋu quiu'tyaju ni 'yuquiaju hasta que yajca'yajpa Pablo. Y yʌtij nimejcʌyu'c nʌ jyo'quiaju tiyʌ mis ndzamba.

²² Pijche'ca yajtzu'cumu te' jaya-une te' mʌja'ŋbʌ soldado-cowi'na's y 'yaŋgui'mu uy ya'iwʌ yajmujsu juca chamjayu yʌ'šej.

Quiʌ'wejyaju Pablo te' Felixaŋʌ

²³ Pijche'ca wyeju metza soldado-cowi'na y 'yaŋgui'myaju wa'y ñimejcʌyaju te' tzu'cotoya las nueveše'ŋoyj majqui's soldado, tuqui's-co-mac cayupocšajpapʌ, y majqui's lanzaji'ŋda'mbʌ wa'y myaŋyaju Cesarea'ojmo.

²⁴ Y wa'y ñimejcʌyjayaju cayu wa'y pyocsnʌmaŋu Pablo's, y te'šej wa'y quiotzojcu'c ñʌmaŋyaju gobernador Felixaŋʌ.

²⁵ Y jyayu carta yʌ'šej nʌmbapʌ:

²⁶ Ʌs Claudio Lisiajsis nʌ'ʌsmij njayjayu mij te' mʌja'ŋbʌ gobernador Félix, y ñdyujchi'pa'ʌsmij.

²⁷ Ñuquiaju judio'sta'm yʌ' pʌn y maŋba inʌc yajca'yaju, y popya'ʌj maŋu wʌwʌta'mbʌ soldadoji'ŋda'm wa'yʌs nyajcotzojcu, nʌctʌ'yu'ŋmʌjcʌ'ʌs que romanoyʌ'.

²⁸ Y como sunba inʌjcʌs mujsu tiyʌcotoyate' ñiwa'cʌyaju, nʌmaŋu'ʌs te' tu'mʌyajpamʌy ñe'ta'm 'yaŋgui'moyeta'm.

²⁹ Y tey matoŋu'ʌs que ñiwa'cʌyajpa inʌc porque ja'n quiojame te' ñe'ta'm 'yaŋgui'mguy, pero ja'ndiyʌ inʌc nijutzpʌ quiowa wa'ytyʌs nyajca'u o wa'ytyʌs somu.

³⁰ Pero yajmujšaju'ʌj que nʌ quiʌquipsʌyaju judio'sta'm wa'y yajca'yaju yʌ' pʌn. Y yʌtij nʌ'ʌs ŋgʌ'weju mis nwi'naŋdʌjqui, y nʌjayajwa'mʌs te' ñiwa'cʌyajpapʌ's wa'y ñiwa'cʌyaju mis nwi'naŋdʌjqui. Sa'satij itʌ.

³¹ Y te' soldado's pyʌquiaju te' Pablo 'yaŋgui'myatʌjušej, y ñʌmaŋyaju te' tzu'oyj Antipatris-cumgu'yojmo.

³² Y jo'pit witu'yaju te' eyata'mbʌ te' soldado-tʌjcoyj, y te' cayupocšajpapʌ'stya'a ñʌtu'ŋajyaju.

³³ Y nu'quiaju'ca te' Cesarea'ojmo, chi'yaju te' carta te' gobernador, y ñʌmaŋyajque'tu te' Pablo ñe' wyi'naŋdʌjqui.

³⁴ Y tu'nu'cande' te' carta, quiʌ'aŋwa'cu te' gobernado'ris jutipʌ estado'ojmopʌte', y ñʌctʌ'yu'ca que Cilicia'ojmocpʌ pʌnde',

³⁵ nʌmu: Yajmiña winac ñiwa'cʌyajpapʌ'smij. Pijche'cʌsmij ŋgʌmato'ŋʌpya. Y quiojtu aŋgui'mguy wa'y quioqueñaju Herodejsis quiʌme'tzoquiuy-pyalacio'ojmo.