Hechos 21 - Zoque Copainalá New Testament

Pablo maŋu Jerusale'ŋojmo

¹ Y te'yandʌs ndzaquiaju'c tuŋgʌpʌjcutʌj barco'ojmo, y wiyuŋ minutʌj Cos-isla'aŋʌ, y jo'pit te' Rodas-isla'aŋʌ, y tepyʌ Patara-cumgu'yojmo.

² Teytyʌs mba'tu barco nʌ inʌc myaŋupʌ Fenicia-najsojmo. Y tʌjcʌyutʌj te'wo'mo, y maŋutʌj.

³ Y ocnʌque'nʌyu'ctijtʌs Chipre-isla, ndzajcutʌs aŋña'ojmo y maŋjojcʌtʌjcutʌj Siria-najsojmo y nu'cutʌj Tiro-cumgu'yojmo porque teytye' inʌc maŋba chʌ'yu te' tzʌmi.

⁴ Y mba'tyajutʌs te' cʌ'aŋmayeta'm y tzʌ'yutʌj tey cu'ya'y jama. Y Espiritupit ñʌjayajpa inʌc ñe'cʌ'sta'm te' Pablo uy qui'mu Jerusale'ŋojmo.

⁵ Pero cʌtʌquiaju'ca te'ta'mbʌ jama, tzu'cumutʌj, y myuma'ŋgʌ'y yomo y 'yuneji'ŋda'm minutʌj maŋdzaquiaju cumgupyutcu'yojmošej. Y cutcʌne'cutʌ nʌ'ʌ'acapoyo'oyj y oto'ŋʌyutʌ Dios.

⁶ Y najyotzpʌcʌtʌju'candʌj tumduma'ŋbʌn, qui'mutʌj barco'ojmo, y ñe'cʌta'm witu'yaju tyʌjcaŋʌ.

⁷ Y nyajta'nu'candʌs te' barco'ojmopʌ tu'ŋajcuy, tzu'cumutʌj Tiro y nu'cutʌj Tolemaida-cumgu'yojmo. Y ñdyujchi'yajutʌs atzita'm, y tzʌ'yutʌj tey ñe'cʌji'ŋda'm tuma'ŋjama.

⁸ Y jo'pit tzu'cumutʌj Pabloji'ŋ y minutʌj Cesarea-cumguy. Y tʌjcʌyutʌj evangelio-tzamgopu'ŋopyapʌ Felipe's tyʌjcaŋʌ. Yʌ'wʌte' tumʌ te' cu'ya'pyʌ diacono'ojmoc, y teytyʌj jeju.

⁹ Y yʌ'wʌ's ijtu inʌc macšcu'y pyapiñomo tza'maŋwa'oyajpapʌ.

¹⁰ Y como tzʌ'yutʌj tey sone jama, wanajcu Judea'ojmoc tumʌ tza'maŋwa'oye ñʌjayajpapʌ Agabo.

¹¹ Y minu ijtumʌytyʌj y pyʌcjayu Pablo's wyajtoquiuy, y ši'nu ñe'ŋbac y quiʌ', y nʌmu: Yʌ'šej nʌ ñʌmu Espíritu Santo: Yʌ'šej maŋba ši'njayaju judio'sta'm Jerusale'ŋojmo yʌ' wajtoquiu'yis quiomi, y maŋba chi'oquia'yaju genti'lista'm quiʌ'ojmo.

¹² Matoŋu'candʌs te'šej, tʌs y te' tey ijtyajupʌ's ojquita'utʌs Pablo uy qui'mu Jerusale'ŋojmo.

¹³ Pijche'ca aŋdzoŋu ñe'cʌ: ¿Tiyajca'nde' njyʌytyamba wa'mis nyajmocha'jaytyamu ʌs ndzocoy? Porque ʌs ŋguipswa'mʌs ndumʌtzocoy ja'nʌj na' wa'y si'ñajutij, sino hasta wa'yʌs ŋgoca'jayu Jerusale'ŋojmo Ngomi Jesujsis ñʌy.

¹⁴ Y ŋguenu'candʌs ja'n suni chʌ'yu, ndzajcutʌs. Y nʌmutʌj: Yajtucʌ tʌ Ngomi's šunbašej.

¹⁵ Cʌtʌquiaju'ca yʌ'ta'mbʌ jama, nimejcʌyutʌs ndiyʌjanatiyʌ y qui'mutʌj Jerusalén.

¹⁶ Qui'myajque'tu tʌji'ŋ metza tuca'y Cesarea'ojmota'mbʌ cʌ'aŋmaye, y ñʌmiñaju ñe'cʌ'sta'm tumʌ peca cʌ'aŋmaye ñʌjayajpapʌ Mnasón, Chipre'ojmopʌ. Y te'wʌji'ŋdʌj inʌc maŋba ndumʌjeju ñe' tyʌjcoyj.

Pablo's tiju tyu'nisu Jacobo

¹⁷ Y nu'cu'candʌj Jerusalén, tyumʌtzocoytyʌj pʌjcʌchoŋyaju te' atzi'sta'm.

¹⁸ Y jo'pit Pablo maŋu tʌji'ŋ wa'ytyʌs ndu'nisu Jacobo, y tu'mʌpyʌ'yaju tey mumu te' ancianota'm.

¹⁹ Dyujchi'yaju'ca Pablo's yʌ'ta'mbʌ, quiʌ'ñʌtzambʌ'jayaju tiyʌta'm chʌjcupʌ Diojsis ñe' yoscupyit genti'lojmota'm.

²⁰ Quiʌmato'ŋʌyaju'ca ñe'cʌ'sta'm myʌja'ŋwʌcotzamyaju Dios. Y nʌmyaju: Nguenwa'ja atzi, jujche'ŋ mil ijtyaju wʌ'aŋja'mopyapʌ judío, y mumupʌ's quioquipyajpa te' aŋgui'mguy.

²¹ Yʌy nu'cu tzame que nʌ'nmij 'yaŋma'yoyu wa'y chacjayaju Moisejsis 'yaŋma'yoquiuy mumu judio'sta'm, te' genti'lojmota'm ijtyajupʌ's, y nʌ'nmis nʌjayaju u'ya šircuncidatzʌquiaju 'yune, y u'yamun quio'ŋyaju quiostumbre.

²² ¿Tiya' tucpa? Wiyuŋšej maŋba tyu'mʌyaju aŋba'te pʌn, porque maŋba myujšaju que minumij.

²³ Yʌtij jeque, tzʌcʌ tʌsmij ndzamjapyašej: Ijtyaju tʌ'ojmo macšcu'ŋbʌn maŋba yajcopujtyajupʌ's promesa.

²⁴ Pʌquia yʌ'ta'mbʌ y yajcowayʌ nwin ñe'cʌji'ŋda'm, y nʌcoyojya' wa'y jyu'šaju quiopac. Te'šej maŋba ñʌctʌ'yaju que nʌmijte' ñisujtzʌyaju, porque nʌtijmijte' ñdyu'ŋaju oye y nʌmis ŋgojamu te' aŋgui'mguy.

²⁵ Pero jujche'ŋ wʌ'aŋja'moyajpapʌ gentilta'm njayjayajwa'ndʌs jutztʌs nwʌmʌ'yu u'ya quiojamyaju yʌ'šejta'mbʌ tiyʌ, sino que wa'y chaquiaju comichʌqui's ñʌquiʌsi yajca'yajupʌ tiyʌ, y uy quiu'tyaju nʌ'pin, ni wi'tca'upʌ tiyʌ, y uy ispʌquitzʌquiaju.

Ñuquiaju Pablo te' templo'ojmo

²⁶ Pijche'ca ñʌmaŋu Pablo's te' pʌnda'm, y jo'pit tumʌcowajyaju ñe'cʌji'ŋ. Pijche'ca maŋu te' templo'ojmo wa'y chamjayaju te' sacerdote tiyʌ jama maŋba inʌc quiopujtu te' quiowajcuy jamata'm wa'y chamdzi'oquiu'yajayaju tiyʌ'iwʌ tzi'oquiuy tumduma'ŋbʌngotoya.

²⁷ Pero maŋba'ctya' inʌc tya'nu te' cu'ya'yajcuy jama, Asia'ojmocta'mbʌ judio's quieñaju Pablo templo'ojmo y yajso'nwitu'yaju mumu te' pʌnda'm y ñuquiaju.

²⁸ Y wejcʌ'yaju: Israel-pʌnda'm, cotzo'ŋoytyamʌ. Yʌ'wʌte' te' pʌn yʌmʌc teymʌc nʌ 'yaŋma'yoyupʌ contra te' pʌnda'm, y contra te' aŋgui'mguy, y yʌ' lugar. Ja'n na' te'wʌtij, sino ñʌtʌjcʌquie'tu griego-pʌn yʌ' templo'ojmo, y myaŋgocʌtʌcwa'a yʌ' masanbʌ tʌc.

²⁹ Quieñaju'ŋmʌjcʌte' wina te' cumgu'yojmo que nʌ wyijtu ñe'cʌji'ŋ Efeso'ojmopʌ Trófimo, quiomʌ'yaju juca ñʌtʌjcʌyu Pablo's yʌ'wʌ te' templo'ojmo.

³⁰ Te'cotoya mi'csu cumguy y ñicutzu'ʌyaju y ñuquiaju te' Pablo, y jyopopujtyaju te' templo'ojmoc y 'yaŋgʌyaju te' puertata'm.

³¹ Tey nʌ chʌcme'chaju'c jutz wa'y yajca'yaju, maŋu chamjayaju te' soldado-cowi'na que nʌ šo'nwitu'u Jerusalén.

³² Y yʌ'wʌ's pyʌjcu soldado quiowi'naji'ŋda'm, y popya quiʌ'maŋyaju. Y quieñaju'ctij te' pʌ'nista'm te' cowi'na soldadoji'ŋ ñacsaŋjejyaju te' Pablo.

³³ Y nu'cu'ca te' soldado-cowi'na, pyʌjcu te' Pablo y yajsi'nʌtʌju metzapʌ cadenapit, y quiʌ'aŋwa'cu iwʌte' y tiyʌte' chʌjcu.

³⁴ Y wejyajpa inʌc myuma'ŋgʌ'y, y tumʌpʌ's chamba inʌc tumʌpʌ tiyʌ y eyapʌ's eyapʌ tiyʌ. Jañʌctʌ'yʌ'ca jutipʌte' wiyuŋdzamba so'nwitu'yajpa'ŋmʌjcʌ, quiʌ'weju Pablo soldado-tʌjcoyj.

³⁵ Y nʌ'c ñu'quiaju maŋchipacsaŋita'm nʌte' inʌc quiuŋnʌmaŋyaju soldado'sta'm te' Pablo porque jene nʌ inʌc qui'šca'yaju te' pʌ'nʌputzi.

³⁶ Porque wʌwʌ pʌ'nis inʌc nʌ quio'ŋyaju 'yucaŋgʌ'y, y weju'c nʌmyaju: Yajca'ʌ.

Pablo's quioquijpu wyin

³⁷ Y maŋba'ca ñʌtʌjcʌyaju Pablo te' soldado-tʌjcojmo, ñʌjayu ñe'cʌ's te' soldado-cowi'na: ¿Ndzi'paja'ʌj lugar wa'yʌsmij oto'ŋʌyu? Y ñe'cʌ's ñʌjayu: ¿Muspaja griego-otowe?

³⁸ ¿Ja'nja te' mij te' Egipto'ojmopʌ pʌn cʌtʌquiajupʌ jamo'oyj ñʌcʌpo'upʌ's quipcuy macšcu'y mil nu'myajca'oyajpapʌ pʌnji'ŋ, y nʌmaŋyajumis ja'itʌnʌmʌmʌy?

³⁹ Pijche'ca Pablo nʌmu: Ʌj wiyuŋšej Tarso'ojmopʌ judio-pʌ'nʌjyʌ', ja'nde' tyiyʌjanatiyʌ cumguy Cilicia-najsojmopʌ. Pero nwa'cjapya'ʌsmij wa'misʌj ndzi'u lugar wa'yʌs oto'ŋʌyu yʌ' pʌnda'm.

⁴⁰ Te' cowi'na's chi'u'c lugar, Pablo tenapyajcu maŋchipacscʌsi y chʌcjayaju seña quiʌ'pit te' pʌnda'm. Maya'aŋ numumgʌñe'quiaju y nʌmgʌ'yu Pablo judio-otowe'ojmoc: