Hechos 15 - Zoque Copainalá New Testament

Tu'mʌyaju Jerusaleŋ-gumgu'yojmo

¹ Pijche'cta'm miñaju pʌnda'm Judea'ojmoc y 'yaŋmayajpa inʌc te' atzita'm yʌ'šej: Juca ja'nmij šircuncidatzʌctame aŋma'yoyušej Moisés, ja'nmij ŋguiotzoctame.

² Te'cotoya sunu chamnʌctʌ'yaju Pablo's y Bernabe's, y quipotoŋyaju ñe'cʌji'ŋda'm. Pijche'ca quipsaŋgospo'ʌyaju wa'y quiʌ'wejyaju Pablo y Bernabé wa'y myaŋyaju Jerusale'ŋojmo, y metza tuca'y ñe'co'mota'mbʌ wa'y myaŋyaju ijtyajumʌy te' cʌ'wej y ancianota'm, teymʌ wa'y cha'maŋwajyaju yʌ'šejta'mbʌ tiyʌ.

³ Te' Antioquia'ojmopʌ tu'mʌquiu'yis minu myaŋdzaquiatʌju. Y yʌ'ta'mbʌ cʌtʌquiaju Fenicia y Samaria'ojmo, y chamyaju jutz wyʌ'aŋjamyaju Dios te' genti'lista'm. Y te'cotoya jene ñʌ'omyaju mumu atzi'sta'm.

⁴ Y nu'quiaju'ca Jerusale'ŋojmo yʌ'ta'mbʌ, pyʌjcʌchoŋyatʌju te' cʌ'we'ista'm, te' tu'mʌquiu'yis, y te' anciano'sta'm. Y chamyaju tiyʌta'm chʌjcu Diojsis ñe'cʌpitta'm.

⁵ Pero metza tuca'y te' fariseo'ojmoc wʌ'aŋja'moyajupʌ tenapyaquiaju y nʌmyaju: Ijtu pyena wa'y šircuncidatzʌquiatʌju y wa'y 'yaŋgui'myatʌju wa'y quiojamyaju Moisejsis 'yaŋgui'mguy.

⁶ Y tu'mʌyaju te' cʌ'wejta'm y te' ancianota'm wa'y quipšaju tiyʌte' maŋba inʌc chʌquiaju.

⁷ Y ya'ay hora'a nachamnʌctʌ'yatʌju'c tenaqui'mu Pedro y ñʌjayaju: Atzita'm, mustamba'mis que chʌcpa ame copiŋu'ʌj Diojsis wa'yʌs ne'cʌ maŋu ndzamjayaju gentilta'm te' evangelio, y wa'y wyʌ'aŋjamyaju.

⁸ Y ispʌcjapya Diojsis mumu pʌ'nis chocoy y ñe'cʌ's pyʌjcʌchoŋyaju y chi'yaju Espíritu Santo jujcha' tʌ tzi'que'tu.

⁹ Tu'mbactʌ quendamu gentilji'ŋda'm y yajcowajyaju te' wʌ'aŋjamgupyit te' ñe'ta'm chocoy.

¹⁰ Yʌtij jeque, ¿tiyʌcotoya ndzʌjqui'šca'tamba Dios wa'mis ŋgottamu cʌ'aŋmayecʌsita'm jujcha' tzʌmi jamyusʌ ñʌmaŋyapʌ tiyʌ tʌ ndata'sta'm ni tʌs?

¹¹ Porque nwʌ'aŋjambatʌs que tʌ Ngomi Jesujsis yajya'moquiupyit maŋbatʌ ŋgotzojcu, y te'šejtijque' ñe'cʌta'm.

¹² Pijche'ca mumu te' tu'mʌyajuše'ŋ numumgʌñe'quiaju. Y quiʌmato'ŋʌyajque'tu te' Bernabé y te' Pablo, nʌ'c chamyaju jutz maya'aŋda'mbʌ tiyʌ y isaŋwʌ'ajcuy chʌjcupʌ Diojsis ñe'cʌpitta'm te' genti'lojmo.

¹³ Y te'še'a ñumumñayaju'c aŋdzoŋu Jacobo y nʌmu: Atzita'm, cʌmato'ŋʌytyamʌ'ʌj.

¹⁴ Chamwa'a Simo'ŋis jutz winbʌ quiʌ'tiju Diojsis te' gentilta'm wa'y ñʌpujtu ñe'co'mocta'm pʌnda'm ñe'cʌcotoyatij.

¹⁵ Yʌ'šej minba quiopujtu te' tza'maŋwa'oyajpapʌ's chame, ja'yʌyušej:

¹⁶ Tujcu'ca yʌ'šej, witu'que'tpati'ʌj, Y maŋba'ʌs ndzʌcwʌtzʌcjayu Davijtis cʌna'tzʌ'oquiuy-tyʌc co'tzupʌ. Y maŋba'ʌs ŋgowʌtzʌcjayu ju'mbʌ'yajumʌy, Y maŋba'ʌs nyajtenawyʌtzʌjcu.

¹⁷ Maŋba'ʌs ndzʌjcu te'šej wa'y mye'tzjayaju tʌ Ngomi eyata'mbʌ pʌ'nis, Y mumu te' genti'lista'm maŋbapʌcʌsi wyejwindzoŋjayaju ʌs nʌy ñe'cʌcotoyata'mde'.

¹⁸ Te'šej nʌmba tʌ Ngomi, yajmustamupʌ'stʌ mumu yʌ'šejta'mbʌ tiyʌ desde winata'mbʌ aŋsʌ'ŋojmo.

¹⁹ Te'cotoya ʌj nʌmba'ʌj que ja'n 'yoye wa'ytyʌ ndzʌcjopi'tyaju jujche'ŋ gentilta'm nʌ wyʌ'aŋjamyajupʌ's Dios.

²⁰ Ma'ndʌ njayjayaju uy quiu'tyaju tiyʌta'm chamdzi'yaju comichʌqui, uy ispʌquitzʌquiaju, uy quiʌ'šaju wi'tca'yajupʌ tiyʌ, y uy quiu'tyaju nʌ'pin.

²¹ Porque desde cʌtʌquiajupʌ aŋsʌ'ŋojmo ijtu iwʌ's chamgopuŋjapya te' Moisejsis tyotojaye te' windʌjcojmota'm tumdumʌ cumgu'yojmo, tyu'ñajpamʌy tumdumʌ sábado.

²² Y wyʌmʌ'yaju cʌ'we'is y anciano'sta'm tu'mʌquiuyji'ŋducu wa'y quiojtyaju ñe'co'mocta'mbʌ pʌn wa'y quiʌ'wejyaju Antioquia'ojmo Pablo y Bernabeji'ŋ. Quiʌ'wejyaju Judas, a'ŋʌyupʌ's ñʌy Barsabás, y te' Silas, mʌja'ŋda'mbʌ pʌn te' atzi'ojmota'm.

²³ Y te'ta'mbʌcʌsi quiʌ'wejyaju toto yʌ'šej nʌmbawʌ: Tʌs, cʌ'wej y ancianota'm y atzita'm, njayjaytyambatʌsmij mijta'm gentil-atzita'm Antioquia'ojmo, Siria'ojmo y Cilicia'ojmo. Ñdyujchi'tambatʌsmij.

²⁴ Matoŋu'ŋmʌjcʌtʌs que pujtyaju tʌ'ojmoc eya'eya nʌ chamyajupʌ's. Te'ta'mbʌ ja'nde' tʌs ŋgʌ'wejyajupʌ y nʌmij ñchʌcjopi'tʌtʌjtamu, y 'yaŋgui'mʌtʌjtamu wa'mij šircuncidatzʌctamu y wa'mis ŋgojamdamu te' aŋgui'mguy. Yʌ'ta'mbʌ jaŋguiʌ'wejyatʌs.

²⁵ Y ndumʌquipsu'candʌs, nwʌmʌ'yutʌs que oye wa'ytyʌsmij ŋgʌ'wejaytyamu copiwi-pʌn Bernabé y Pabloji'ŋ jene suñajpapʌtʌs.

²⁶ Yʌ'ta'mbʌ's jatyo'ya'ŋʌya wyin tʌ Ngomi Jesucristo's ñʌquiotoya.

²⁷ Te'cotoya ŋgʌ'wejutʌs Judas y Silas. Yʌ'ta'mbʌ'smij te'šejtij maŋba ñchamjaytyaŋgue'tu.

²⁸ Porque wyʌmʌ'yu Espíritu Santo's y tʌs uytyʌsmij maŋu'ŋmʌjcʌ ŋgotjaytyamu jujcha' tzʌmi sino que pyʌcpaše'ŋ:

²⁹ U'yamis ŋgʌ'stamu comichʌqui's ñʌquiʌsi yajca'yajupʌ tiyʌ, y u'yamis ŋgu'ttamu nʌ'pin, y u'yamis ŋgʌ'stamu wi'tca'yajupʌ tiyʌ, y u'yamis ispʌquitzʌctamu. Juca njʌ'ctzʌ'ytyamba mis nwin yʌ'šejta'mbʌ tiyʌcʌsi, oye mis ndzʌctamba. Oye'c ittamʌ.

³⁰ Pijche'ca te' quiʌ'wejyatʌjupʌ wanaquiaju Antioquia'ojmo. Y yajtu'mʌyaju te' tu'mʌquiuy y chi'oquia'yaju te' totojaye.

³¹ Y tyu'ñaju'ca te' toto, ñʌ'omyaju y tzocopyaquiaju.

³² Y te' Judas y Silas, como tza'maŋwa'oyeta'mde' inʌc, chamdzocopyaquiaju y pyaquitzi'yaju te' atzita'm sone tzamepit.

³³ Y ya'yaju'ca sone jama, sʌ'mnayu'c yajtzu'cumyatʌju te' atzi'sta'm wa'y wyitu'yaju te' ijtyajumʌy te' quiʌ'wejyajupʌ's.

³⁴ Pero te' Silajsis wyʌmʌ'yu wa'y chʌ'yu tey.

³⁵ Y tzʌ'ya'ŋʌyaju Pablo y Bernabé Antioquia'ojmo wa'y 'yaŋma'yoyaju y wa'y chamgopuŋyaju sone eyata'mbʌji'ŋ te' evangelio, tʌ Ngomi's chame.

Myetza naco'mo maŋu chamgopu'ŋoyu Pablo

³⁶ Y cʌtʌjcu'ca sone jama, ñʌjayu Pablo's te' Bernabé: Ma'ndʌ ndu'niswʌtzʌquiaju te' atzita'm jujche'ŋ cumgu'yojmo'andʌs ndzamgopuŋjayu tʌ Ngomi's chame, wa'ytyʌs ŋguenu jutz ijtyaju.

³⁷ Y Bernabe'is šunba inʌc wa'y ñʌmaŋyaju Juan, a'ŋʌyupʌ's ñʌy Marcos.

³⁸ Pero ja'n inʌc wyʌcomʌ'i wa'y ñʌmaŋu te'wʌ Pablo's, porque te'wʌ's chaquiaju te' Panfilia'ojmo, y jamyawʌ ñe'cʌji'ŋda'm te' Diojsis yoscu'yojmo.

³⁹ Y jatyu'mbajcajya quipsoquiuy, y nachaquiatʌju. Pyʌjcu Bernabe'is te' Marcos y barco'ojmo maŋyaju Chipre.

⁴⁰ Y quiopiŋu Pablo's te' Silas. Y ñitza'mʌyaju'cande' te' atzi'sta'm Diojsis yajya'moquiuquiʌsi, tzu'cumyaju.

⁴¹ Y ñʌcwijtʌpyʌ'u te' Ciria y te' Cilicia-nas wa'y pyʌmitzi'yaju jujche'ŋ tu'mʌquiuytya'm.