Hechos 13 - Zoque Copainalá New Testament

Ñʌcʌtzo'chaju wa'y maŋu chamgopu'ŋoyaju te' Bernabé y Saulo

¹ Pijche'cta'm ijtyaju inʌc Antioquia-tu'mʌquiu'yojmo tza'maŋwa'oyajpapʌ y mujsoyajpapʌ: Te' Bernabé, y te' Simón ñʌjayajpapʌ Niger, y te' Lucio Cirene'ojmopʌ, y Manaén te' tzojcupʌ te' aŋgui'mbapʌ Herodesji'ŋ, y te' Saulo.

² Y tey inʌc nʌ quiʌna'tzʌyaju tʌ Ngomi Dios yʌ'ta'mbʌ's, y nʌ 'yayunatzʌquiaju'c nʌmu te' Espíritu Santo: Copiŋbutjaytyamʌ'ʌj te' Bernabé y te' Saulo wa'y maŋu yojšaju te' ʌs ŋgʌ'wejyajpamʌy.

³ Ayunatzʌquiaju'ca y 'yoto'ŋʌyaju'ca Dios, quiojtyaju quiʌ' ñe'cʌcʌsita'm y ñʌjayaju: Diosji'ŋ tuŋgʌpʌctamʌ.

Tzamgopu'ŋoyaju te' cʌ'wej Chipre'ojmo

⁴ Y te'šej quiʌ'wejyaju Espíritu Santo's. Y ñe'cʌta'm wanaquiaju Seleucia-cumgu'yojmo. Y te'ya tzu'cumyaju barco'ojmo y maŋyaju Chipre-isla'ojmo.

⁵ Y nu'quiaju Salamina-cumgu'yojmo y chamgopuŋgʌ'yaju te' Diojsis chame te' judio's wyindʌjcojmota'm. Y nʌ inʌc quiotzoŋyaju te' Jua'ŋis ñe'cʌta'm.

⁶ Y quiʌtʌcpʌ'yaju mumu te' isla hasta Pafo'ojmošej y pya'tyaju tumʌ judio-pʌn brujopʌ y sutzpapʌ tza'maŋwa'oye, ñʌjayajpapʌ Barjesús.

⁷ Tey inʌc ijtu Sergio Pauloji'ŋ, co'aŋgui'moye nʌctʌ'yopyapʌ pʌn. Yʌ'wʌ's wyeju Bernabé y te' Saulo, y jene sunba inʌc myatoŋjayu te' Diojsis chame.

⁸ Pero te' brujos, (yʌ'šej cacpʌ'pa ñʌy Elimas) te'wʌ's ja'n inʌc chi'yay lugar wa'y chamtzamnayaju, wa'ytyij jana wyʌ'aŋja'moyu te' co'aŋgui'moye.

⁹ Pijche'ca como jyo'ʌyu te' Espíritu Santo's te' Saulo, ñʌjayajque'tpapʌ Pablo, quiengʌpʌjcu

¹⁰ y ñʌjayu: Mij jʌ'ʌ, njyo'ʌyupʌmijyʌ' aŋgoma'cʌ'oquiu'yis y yacha'cu'yis, diablo'smijyʌ' ñʌc'ijtʌyupʌ, ŋgui'nispamis mumu justota'mbʌ tiyʌ. ¿Ja'nsʌ'ŋmis ndzaque wa'mis nyajto'yjayu tʌ Ngomi's wiyuŋda'mbʌ Tyuŋ?

¹¹ Yʌtij jeque tʌ Ngomi's quiʌ'is maŋbamij nyajto'ti'aju u'yamis ŋguenu jama uša'ŋ aŋsʌ'ŋoyj. Pijche'ctij to'ti'aju, tzʌ'yu jujcha' pi'tza'ŋajcu'yojmo. Y jasa'oquiʌ'yu mye'tzpa inʌc iwʌ's wa'y jyitinʌmaŋu quiʌ'cʌsi.

¹² Quienu te' co'aŋgui'moye's jutz quiʌtʌcjayu te' pʌn, y wʌ'aŋja'moyu, y ñʌmaya'jayu tʌ Ngomi's 'yaŋma'yoquiuy.

Te' Pablo y te' Bernabé Pisidia-najsis 'Yantioquia'ojmo

¹³ Y barco'ojmo tzu'cumyaju Pablo tyʌwʌji'ŋda'm te' Pafo-cumgu'yojmoc y tzʌ'ñicʌtʌquiaju Panfilia-najsojmopʌ Perge'ojmo. Tey chaquiaju Jua'ŋis y witu'u Jerusale'ŋojmo.

¹⁴ Y tzu'cumyaju te' Perge'ojmo, y maŋyaju te' Pisidia-najsojmopʌ Antioquia-cumgu'yojmo. Y sabado-jamo'oyj tʌjcʌyaju judio'sta'm wyindʌjcojmo y maŋu pyocšaju.

¹⁵ Y tyu'ñaju'ca te' aŋgui'mguy y te' tza'maŋwa'oye'sta'm chame, maŋu yajnʌjayatʌju te' windʌc-cowi'na'sta'm: Atzita'm, juca nʌ'ittamumis tiyʌ'iwʌ aŋma'yoquiuy yʌ' pʌngotoyata'm, tzamdamʌ.

¹⁶ Pijche'ca tenaqui'mu Pablo y chʌjcu seña quiʌ'pit wa'y ñumumñayaju, y nʌmu: Israel-pʌnda'm y mumu jujche'ŋ ña'tzpapʌ's Dios, matoŋdamʌ.

¹⁷ Te' Israel-pʌ'nista'm Diojsis quiopiŋjayaju tʌ ndatajta'm y yajmʌja'ŋajyaju te' pʌnda'm ñempe witita'm inʌc Egipto-najsojmo. Y ñe'cʌ's quiuŋbʌ'yaju jitipʌquiaju teymʌc.

¹⁸ Y wʌstʌjqui's ameše'ŋoyj pyʌ'mgopajcʌyjayu te' pʌ'nista'm chʌqui ja'itʌnʌmʌmʌy.

¹⁹ Y jyascotzo'u cu'ya'y te' nación Canaan-najsojmo, y wye'nbʌ'jayatʌju tatatzaquešej te' tepyʌ nas.

²⁰ Y jʌsa'ca, quiotjayatʌju cʌme'tzoyeta'm cuatrocientos cincuenta ameše'ŋoyj, hasta te' tza'maŋwa'opyapʌ Samue'lis 'yaŋsʌ'ŋoyj.

²¹ Pijche'ca wya'quiaju rey. Y chi'yaju Diojsis te' Saúl, te' Cijsis 'yune, Benjami'ŋis fyamilia'ojmopʌ pʌn. Aŋgui'moyu yʌ'wʌ wʌstʌjqui's ame.

²² Y yajʌcʌ'u'c te'wʌ Diojsis, quiotjayatʌju jujcha' rey te' David. Y yʌ'šej nʌmu Dios: Ngue'nʌwya'mʌs David, Isai'is 'yune, te' yajtzocopyacjapyapʌ's ʌs ndzocoy. Yʌ'wʌ's maŋba chʌjcu mumu ʌs sunbašej.

²³ Y Davijtis wyinboya'ojmoc yajtzu'cumu Diojsis te' Jesús wa'y yajcotzojcu Israel-pʌnda'm, ñe'cʌ's chamdzi'oquia'ušej.

²⁴ Pero maŋba'cmaj minu Jesús, chamgopuŋu Jua'ŋis que mumu Israel-pʌnda'm wa'y quipswitu'yaju y wa'y ñʌ'yʌyaju.

²⁵ Pero maŋba'ca yajtujcu Jua'ŋis te' yoscuy, nʌmu: ¿Iwʌše'amʌj ŋgomʌ'ytyamba? Ja'n ʌjyʌ' ñe'cʌ. Pero ʌs ucaŋgʌ'mʌc nʌ minu tuma'ŋbʌn, y ñe' myasa'najcupyit ja'n pyʌqui ni wa'yʌs mbu'pʌ'jayu wyacasnaca tzay.

²⁶ Tʌwʌta'm, Abraha'ŋis fyamilia's wyinboyata'm y jujche'ŋ mi'ojmota'm ña'chajpapʌ's Dios, Diojsistʌ cʌ'wejaytyamu yʌ' tzame chambapʌ's jutztʌ wa'y ŋgotzoctamu.

²⁷ Pero te' Jerusalen-iti's y te' quiowi'na'sta'm ja'ispʌquia te' Jesús ni jañʌctʌ'yjaya te' tza'maŋwa'oyajpapʌ's chame, tyu'ñajpapʌ inʌc tumdumʌ sábado. Yʌ'ta'mbʌ's chʌcta'ñaju ja'yʌyušej te' yajca'yaju'c Jesús.

²⁸ Ñempe japya'tjaya quiowa wa'y yajca'yaju, wya'quiaju Pilatocʌsi wa'y yajyajca'ʌtʌju.

²⁹ Y chʌcjayaju'ca te' Jesús mumu te' ñe'cʌcotoya ja'yʌyušej Totojaye'ojmo, yajʌcʌ'yaju te' cruzcʌsi y maŋu ñipyaju.

³⁰ Pero yajwinsa'u Diojsis te' ca'yajupʌ'ojmoc.

³¹ Y ñe'cʌ's yajqueñaju wyin sone jama te' tumʌqui'myajupʌ ñe'cʌji'ŋ Galilea'ojmoc wa'y miñaju Jerusale'ŋojmo. Yʌ'ta'mbʌ's quiotestigosajyajpa te' pʌ'nojmota'm.

³² Te'šejtijque' tʌs ndzamgopuŋjaytyambatʌsmij que oyepʌ tiyʌte' te' chamdzi'jayatʌjupʌ tʌ ndatajta'm.

³³ Y te'wʌte' chʌcta'nwa'a Diojsis tʌ ndata'sta'm 'yunecotoya yajwinsa'u'c te' Jesús. Y tʌta'm ñe'ta'mdʌyʌ' 'yune. Yʌ'šej ñʌjayu Diojsis te' Jesús myetzo'mopʌ salmo'ojmo: Mijte' ʌs une, ʌjte' mis ndataj.

³⁴ Y yajtzu'cumu Diojsis te' Jesús ca'yajupʌ'ojmoc u'ya yajujche'c quia'que'tu. Te'cotoya wina ñʌjayu Diojsis: Maŋba'ʌsmij ndzi'tamu te' masanbʌ y wiyuŋbʌ to'ya'ŋʌ'oquiuy te' ndzamdzi'upʌ'ʌs te' David.

³⁵ Te'cotoya nʌmgue'tpa eyapʌ salmo'ojmo: Ja'nmis maŋu ndzajcu te' mis Masanbʌ wa'y pyutzpʌ'u.

³⁶ Porque wiyuŋšej Davijtis yosjayu te' ñe' ijtaŋ-dʌwʌta'm šunušej Diojsis. Pijche'ca ca'u, y ñipyaju nipyajumʌy te' tyatajta'm, y putzpʌ'u.

³⁷ Pero ʌ' Jesús yajtzu'cumupʌ Diojsis, japyutzpʌ'ʌ.

³⁸ Te'cotoya tʌwʌta'm, mustamʌ que yʌ'wʌpit ñchamgopuŋjatʌjtambamij jutz cotocopya tʌ ŋgowa.

³⁹ Jujche'ŋ tiyʌcʌsimij janjyustococottamʌ mumutiyʌcʌsi te' Moisejsis 'yaŋgui'mgu'yis, njyustococotpa Jesujsis jujche'ŋmij nwyʌ'aŋja'moytyamba.

⁴⁰ Coquendamʌ jeque cuenta umij ŋguiʌtʌcjaytyamu chamnitzaquiajušej tza'maŋwa'oye'sta'm, nʌmyaju'c:

⁴¹ Qui'tzcu'yajyajpapʌ's matoŋdamʌ, maya'tamʌ y ca'tamʌ, Porque ʌs Dios, nʌ'ʌs ndzʌjcupʌ tzʌqui mista'm jamo'oyj Ja'nmis maŋu nwʌ'aŋjamdamu ñempemij iwʌ's ñchamjaytyamʌ.

⁴² Y nʌ'c pyujtyaju te' judio'sta'm wyindʌjcojmoc, wya'quiaju te' pʌ'nista'm wa'y cha'ma'ŋʌyjayaju yʌ'šejta'mbʌ tiyʌ te' minbapʌ sabado'oyj.

⁴³ Y tzu'cumyaju te' tu'mʌyajupʌ, y soneta'mbʌ judio's y a'ŋʌyajupʌ wʌ'aŋja'moye's quio'ŋyaju Pablo y Bernabé. Y yʌ' metza'ŋbʌ'nis 'yoto'ŋʌyatʌju y chamnʌctʌ'yatʌju wa'y itjojcʌtʌquiaju Diojsis yajya'moquiu'yojmo.

⁴⁴ Y nu'cu'cande' eyapʌ sábado cutzunu'cu cumguy wa'y myatoŋjayaju Diojsis chame.

⁴⁵ Pero quieñaju te' judio'sta'm te' pʌ'nʌputzi y cʌjoŋyaju. Y ñʌqui'šca'cʌ'yaju tiyʌta'm inʌc chamba Pablo's y tiyʌta'm chamgʌ'yjayaju, y 'yotowewʌ'ajayaju Dios.

⁴⁶ Pijche'ca jana na'chcuy nʌmyaju te' Pablo y te' Bernabé: Wiyuŋšej pyʌcpapʌte' inʌc wa'ytyʌsmij mijta'm wina ndzamgopuŋjaytyamu te' Diojsis chame. Pero como ja'nmis suni mbʌjcʌchoŋdamu y como ŋgomʌ'ytyambamis que ja'nmis merecetzʌctame wa'mis mbʌjcʌchoŋdamu te' ja'n yayepʌ quenguy, yʌtij ŋgʌ'maŋyajpatʌs gentilta'm.

⁴⁷ Porque te'šejtʌj aŋgui'mu tʌ Ngomi's, nʌmu'c: Ngotwa'mʌsmij jujcha' sʌ'ŋgʌ' gentilcotoyata'm, Wa'mis nyajcotzoquiaju naswindumʌta'mbʌ.

⁴⁸ Y yʌ'še'a myatoŋyaju'c te' genti'lista'm ñʌ'omyaju y myʌja'ŋwʌcotzamgʌ'yjayaju tʌ Ngomi's chame. Y wʌ'aŋja'moyaju jujche'ŋ wyinacopiŋyajupʌ Diojsis wa'y pya'tyaju te' ja'n yayepʌ quenguy.

⁴⁹ Y nʌ inʌc quiopuŋu te' tʌ Ngomi's chame mumu te' najsoyj.

⁵⁰ Pero chamjʌ'mʌyaju te' judio'sta'm sone casnambʌn-yomo tumʌtzocoy cʌna'tzʌ'oyajpapʌ, y te' cumguquiowi'nata'm. Y tzʌcjʌ'mʌ'oyaju te' cumgupyʌnda'm wa'y yacsnutzʌquiaju te' Pablo y Bernabé. Y maŋu myactzaquiatʌju ñe'cʌ'sta'm quiojamyajpaše'ŋ.

⁵¹ Pijche'ca quiopupyaju ñe'cʌ'sta'm te' ñe'ŋbajcʌsipʌ po'yo wa'y yajnʌctʌ'yaju. Y maŋyaju Iconio-cumgu'yojmo.

⁵² Y jyo'ʌyaju Espíritu Santo's y omdzocopyaquiaju te' cʌ'aŋmayeta'm.