Hechos 11 - Zoque Copainalá New Testament

Pedro's chamjayu te' Jerusale'ŋojmopʌ tu'mʌquiuy tiyʌta'm chʌjcu

¹ Minu myujšaju te' Judea'ojmo ijtyajupʌ cʌ'we'ista'm y atzi'sta'm que genti'lista'm pyʌjcʌchoŋyajque'tu Diojsis chame.

² Y qui'mu'c Pedro Jerusale'ŋojmo quipotoŋgʌ'yaju ñe'cʌji'ŋ te' circuncidatzʌquiajupʌ,

³ y ñʌjayaju: ¿Tiyajca'nde' ŋgʌ'maŋyaju y ŋguiu'tu jašircuncidatzʌquiapʌ pʌnji'ŋ?

⁴ Pijche'ca cha'maŋwajcʌ'yu Pedro's ñe'ŋacʌsi jutzte' tujcu, y nʌmu:

⁵ Jope-cumgu'yojmo'ʌj inʌc ijtu, y nʌ'ʌs inʌc oto'ŋʌyu Dios. Nguenu'ʌs napašo'mošej yʌ'šejpʌ quene: Nʌ inʌc wyanajcu ti'yʌc jujcha' mʌjapʌ pama macšcu'y aŋguinʌ si'nupʌ. Te'šej wanajcu tzajpojmoc y minu ijtumʌ'yʌj.

⁶ Y te'wo'mo ŋguengʌpʌjcu'cʌs ndacsoctu'nu'ʌs, y ŋguenu'ʌs nascʌsi wijtyajpapʌ copʌn macšcu'y ñe'ŋbacta'mbʌ, tza'ma copʌn, y jyopoyajpapʌ's wyin, y sitityajpapʌ sawo'mo.

⁷ Y matoŋu'ʌs otowe nʌjayupʌ'sʌj: Tzu'cumʌ Pedro, yajca'ʌ y cʌ'sʌ.

⁸ Y nʌmu'ʌj: Ja'ne Señor, porque nuncama'ʌs jaŋguiottʌ'ʌ aŋnaco'mo ñempetiyʌ jaquiowapʌ.

⁹ Pijche'ca aŋdzoŋgue'tu te' tzajpojmopʌ otowe myetza naco'oyj: Tiyʌ yajcowaju Diojsis uy nʌjay mis ñempetiyʌ.

¹⁰ Y tyuca'y ñaco'ma'mʌj oto'ŋʌyu'c, qui'mwʌtzʌcpʌ'u mumu tzajpojmo, te' ŋguenupʌ tiyʌ'ʌs.

¹¹ Pijche'ctij nu'quiaju te' tʌjcoyj ijtumʌ'yʌj tuca'y pʌn quiʌ'wejyatʌjupʌ Cesarea'ojmoc.

¹² Y tzamjayu'ʌj te' Espíritu Santo's wa'yʌj maŋu ñe'cʌji'ŋda'm, u'yʌj metzatzoco'yaju. Y maŋyajque'tu ʌji'ŋ yʌ' tujta'ytya'mbʌ atzi, y tʌjcʌyutʌj te' pʌ'nis tyʌjcaŋʌ, te' yajweyatʌjupʌ'sʌj.

¹³ Y tzamgʌ'yjayutʌj te'wʌ's jutzun quienu ángeles ñe' tyʌjcoyj. Tey inʌc tenayu y ñʌjayu: Cʌ'wejya pʌnda'm Jope'ojmo wa'y maŋu wyejyaju Simón, a'ŋʌyupʌ's ñʌy Pedro.

¹⁴ Y te'wʌ'smij minba ñchamjayupʌ tzamepit maŋbamij ŋguiotzojcu mij, y mumu mis ndʌjcoyjtya'mbʌ.

¹⁵ Y nitzʌjcu'cti'ʌs wa'yʌs ndzamu, wanajcu Espíritu Santo ñe'cʌcʌsita'm wanajcušej winbʌ tʌcʌsita'm.

¹⁶ Pijche'cʌs njamwʌtzʌjcu jutz nʌmu tʌ Ngomi: Wiyuŋšej yajnʌ'yʌ'oyu te' Juan nʌ'pit, pero mijta'm maŋbamij ñʌ'yʌytyamu Espíritu Santopit.

¹⁷ Te'šej jeque, chi'yajque'tu ñe'cʌta'm Diojsis te'šejpʌ tzi'ʌtʌjcuy tzi'ušejtʌj tʌta'm nwʌ'aŋjamdamu'ctʌ Ngomi Jesucristo. Y ¿iwa'mʌjyʌ' ʌj wa'yʌs nyajwindujcu Dios?

¹⁸ Y myatoŋyaju'ca yʌ'šejta'mbʌ tiyʌ numumgʌñe'quiaju. Y myʌja'ŋwʌcotzamyaju Dios, y nʌmyaju: Entonces te'šejtij yajquipswitu'yajque'tu Diojsis te' gentilta'm wa'y chi'yajque'tu quenguy.

Te' Antioquia'ojmopʌ tu'mʌquiuy

¹⁹ Yacsnutzʌquiaju'c jeque Esteban, pijche'c tzo'tzu yacsnutzʌjcoquiuy. Y te' puŋdijtitnayajupʌ te'ta'mbʌ jamo'oyj maŋyaju hasta Fenicia y Chipre-najsojmo y Antioquia-cumgu'yojmo. Y judiotij ñʌtzamyatʌju te' tzame.

²⁰ Pero ñe'co'mota'm ijtyaju inʌc Chipre y Cirene-pʌnda'm. Y tʌjcʌyaju yʌ'ta'mbʌ Antioquia-cumgu'yojmo y chamgopuŋjayatʌju te' griegota'm te' evangelio chambapʌ's tʌ Ngomi Jesús.

²¹ Y tʌ Ngomi's pyʌmi's nʌ inʌc quiotzoŋyaju ñe'cʌta'm, y wʌ'aŋja'moyaju wʌwʌ pʌn y quio'ŋyaju tʌ Ngomi.

²² Y myatoŋyaju yʌ'šejta'mbʌ tiyʌ te' Jerusale'ŋojmo ijtyajupʌ tu'mʌquiu'yis. Pijche'ca quiʌ'wejyaju Bernabé Antioquia'ojmo.

²³ Y nu'cu yʌ'wʌ y quienu jutz chi'yaju Diojsis yajya'moquiuy, y ñʌ'omu. Y pyʌmitzi'yaju chamepit mumuta'mbʌ wa'y tyumʌtzocoy quio'ŋjojcʌtʌcjayaju tʌ Ngomi.

²⁴ Yʌ'šej chʌjcu porque wʌpʌ pʌnde' inʌc y jyo'ʌyupʌ wʌ'aŋjamgu'yis y Espíritu Santo's. Y tʌ Ngomi-wʌ'aŋjamgu'yojmo a'ŋʌyu aŋba'te pʌn.

²⁵ Jʌsa'ca tzu'cumu Bernabé y maŋu Tarso'ojmo wa'y mye'tzu Saulo. Y pya'tu'ca ñʌminu Antioquía.

²⁶ Tumʌ ame tzʌ'yaju tey te' tu'mʌquiuyji'ŋ, y 'yaŋmayaju wʌwʌ pʌn. Y tey te' Antioquia'ojmo wina tzo'tzu wa'y ñʌjayatʌju cristianota'm te' cʌ'aŋmayeta'm.

²⁷ Ʌ'ta'mbʌ jamo'oyj wanaquiaju tza'maŋwa'oyajpapʌ Jerusale'ŋojmoc y nu'quiaju Antioquia'ojmo.

²⁸ Y tenaqui'mu ñe'co'mocta'mbʌ tuma'ŋbʌn ñʌjayajpapʌ Agabo, y cha'maŋwaju Espíritu Santopit que maŋba inʌc ijtu maya'aŋbʌ yu' mumu nascʌsita'mbʌ pʌ'nojmo. Yʌ'šej tujcu nʌ 'yaŋgui'moyu'c te' Claudio.

²⁹ Pijche'ctij quipsaŋgospo'ʌyaju te' cʌ'aŋmaye'sta'm wa'y quiʌ'wejyaju tumin quiʌpa'tyajpaše'ŋ tumduma'ŋbʌ'nis te' Judea'ojmota'mbʌ atzicotoya.

³⁰ Te'šej jeque chʌquiaju, y quiʌ'wejyaju te' Bernabé y te' Saulocʌsi wa'y chi'yaju te' ancianota'm.