Hechos 1 - Zoque Copainalá New Testament

Diojsis chamdzi'oquia'u Espíritu Santo

¹ Njayjayu'cʌsmij wina, Teófilo, ndzamjayu'ʌsmij mumu jutz ñʌcʌtzo'tzu Jesujsis wa'y chʌjcu y wa'y 'yaŋma'yoyu.

² Yʌ'šej chʌjcu Jesujsis hasta tiyʌ jama pyʌjcʌchoŋu Diojsis tzajpojmo, chamjayaju'ca Espíritu Santopit tiyʌ wa'y chʌquiaju te' cʌ'we'ista'm te' ñe'cʌ's quiopiŋyajupʌ.

³ Y toyapʌjcu'ca Jesús, yajqueñaju quenbapʌ wyin te' cʌ'wejta'm ja'n šujchapyʌ tzʌquipit. Y wʌstʌjqui's jama yajqueñaju wyin y ñʌtzamyaju jutz aŋgui'mba Dios.

⁴ Y tumʌ'ijtyaju'c, 'yaŋgui'myaju Jesujsis uy chu'cumyaju te' Jerusaleŋ-gumgu'yojmo, sino tey wa'y jyo'quiaju tʌ Ndata Diojsis chamdzi'yajupʌ tiyʌ. Te'šej chamjayaju Jesujsis. Y ñʌjayajque'tu:

⁵ Porque wiyuŋšej, Juan yajnʌ'yʌ'oyu nʌ'pit, pero mijta'm maŋbamij ñʌ'yʌytyamu Espíritu Santopit yʌ'ta'mbʌ jamo'oyj.

Jesús qui'mu tzajpojmo

⁶ Pijche'ca te' tu'mʌyajupʌ's quiʌ'aŋwa'quiaju y nʌmyaju: Señor, ¿maŋbaja nya'aŋgui'mwʌtzʌquiaju Israel-pʌnda'm yʌ'ta'mbʌ jamo'oyj?

⁷ Y 'yaŋdzoŋyaju Jesujsis: Ja'n pyʌqui wa'mis mustamu te' jama ni te' aŋsʌŋ na' tʌ Ndata's quiowindzʌmyajpapʌ.

⁸ Pero maŋba minu mijcʌsita'm te' Espíritu Santo y maŋbamij ñchi'tamu pyʌmi. Maŋbamisʌj ŋgowʌ'aŋjamdamu Jerusaleŋ-gumgu'yojmo, mumu Judea y Samaria-najsojmo y mumu naswindumʌ.

⁹ Yʌ'šejta'mbʌ tiyʌ'a chamu'c Jesujsis, y teytyij nʌ quieñaju'c, yajqui'mu Diojsis y quiʌwʌ'nu o'na's, te'šej quiendocoyaju.

¹⁰ Y cʌsmʌtij nʌ quieñaju'c tzajpojmo nʌ'cše'ŋoyj qui'mu Jesús, quiʌnu'cʌyaju metza'ŋbʌ'nis sujpopota'mbʌ's pyama.

¹¹ Yʌ'ta'mbʌ's ñʌjayaju te' cʌ'wejta'm: Galilea-pʌnda'm, ¿tiyajca'nde' nʌ ŋguiendamu tzajpojmo? Yʌ' Jesús, yajqui'mupʌ Diojsis tzajpojmo mista'm nwi'naŋdʌjqui, nguendamušejmis nʌ myaŋu'c tzajpojmo, te'šejtij maŋba mingue'tu.

Quiopiŋyaju Judajsis wyingʌyoj

¹² Pijche'ca tzu'cumyaju te' cʌ'wejta'm te' ñʌjayajpamʌy Olivo-tʌc pu'mna, y minwʌtzʌquiaju Jerusaleŋ-gumgu'yojmo. Y te' Olivo-tʌc pu'mna's tyome inʌc quienba te' Jerusalén, sabado-jama tu'ŋajcuyše'ŋ.

¹³ Tʌjcʌyaju y qui'myaju te' cʌsmʌpʌ itcu'yojmo ijtyajpamʌy inʌc Pedro, y Jacobo, y Juan, y Andrés, y Felipe, y Tomás, y Bartolomé, y Mateo, y Jacobo te' Alfeo's 'yune, y Simón te' Zelotista'sta'm tyʌwʌ, y Judas te' Jacobo's pyotzo.

¹⁴ Mumu yʌ'ta'mbʌ's tumʌ'ajcu'yoyj te' yomoji'ŋda'm y te' Jesujsis ñanaj Mariaji'ŋ y te' Jesujsis pyotzoji'ŋda'm 'yoto'ŋʌyajpa inʌc Dios.

¹⁵ Tiyʌjcaŋda'mbʌte' inʌc te' tumʌtzʌquiajupʌ tey mojsi's-co-ips. Y ʌ'ta'mbʌ jamo'oyj tenaqui'mu Pedro te' atzicucmʌta'm y nʌmu:

¹⁶ Atzita'm, pyʌcpapʌte' inʌc wa'y tyujcu ja'yʌyušej Totojaye'ojmo, chamušej wina Davijtis te' Judas te' Espíritu Santopit. Yʌ' Judajsiste' wyi'najayaju te' pʌnda'm wa'y maŋu ñuquiaju Jesús.

¹⁷ Y yʌ' Judas nʌcma'yʌyupʌte' inʌc tʌji'ŋ y quiottʌ'u Jesujsis wa'y tyumʌyojsu tʌji'ŋ yʌ' yoscu'yojmo.

¹⁸ Yʌ'wʌ's jeque, jyuyu nas te' yacha'cu'yis quioyowapit. Y quiopacpit cunu y cucpʌpsu y cutzupujtu pyu'u.

¹⁹ Pijche'ca myujšaju mumu te' Jerusale'ŋojmo ijtyajupʌ's. Te'cotoya quiotjayaju ñʌy yʌ' najsisñe' Acéldama ñe'ta'm 'yotowe'ojmo, sunbate' ñʌmu, Nʌ'pin-lugar.

²⁰ Porque yʌ'šej ja'yʌyu Salmo-libro'ojmo: Yajtzʌ'yiwʌ'a te' itcuy, y u'ya ijtu ya'iwʌ tey. Y ja'yʌquie'tu: Yajpʌcja eyapʌ's te' quioque'noquiuy.

²¹ Yʌy ijtyaju pʌnda'm wijtyajupʌ tʌji'ŋ jujche'ŋdiempo wijtuca'ŋu tʌ Ngomi Jesús tʌji'ŋ

²² desde ñʌcʌtzo'tzu'c te' Jua'ŋis wa'y yajnʌ'yʌ'oyu, hasta tiyʌ jama pyʌjcʌchoŋyaju Jesús tzajpojmo. Pyʌcpa jeque, tuma'ŋbʌn yʌ'wo'mocta'mbʌ wa'y quiotzamupʌ's tʌji'ŋ que winsa'u Jesús.

²³ Pijche'ca yajtenaqui'myaju metza'ŋbʌn: Te' José, ñʌjayajpapʌ inʌc Barsabás y a'ŋʌyupʌ's ñʌy Justo, y te' Matías.

²⁴ Y 'yoto'ŋʌyaju Dios y nʌmyaju: Señor, como ispʌcpamis mumu pʌ'nis chocoy, yajquenatʌj yʌ' metzapo'moc jutipʌ mis ŋgopiŋu

²⁵ wa'y quiʌ'we'aju y wa'y yojsu yʌ' yoscu'yojmo. Judajsis chajcu yʌ' yoscuy te' ñe' yacha'cupyit y maŋu quiowindzʌmbamʌy.

²⁶ Šijyatʌju, y pujtu te' sijcu'yojmo te' Matías. Y te'wʌji'ŋ ta'ñaju macwʌstʌjca'y te' cʌ'wej.