Hebreos 6 - Zoque Copainalá New Testament

¹ Te'cotoya pyʌcpa wa'ytyʌ aŋmayjojcʌtʌctamu hasta que muscota'nbatʌ mumu Cristo's 'yaŋma'yoquiuy, ja'n na' cho'tzcuytyij. Ja'n 'yoye wa'ytyʌ nitzʌcwʌtzʌjcu wa'ytyʌ ŋguipswitu'u porque ndzʌctamutʌ ja'n yojšapyʌ tiyʌ, ni wa'ytyʌ nitzʌcwʌtzʌjcu Dios-wʌ'aŋjamguy,

² ni wa'ytyʌ aŋmaywyʌtzʌjcu tiyʌcotoya pyʌcpa wa'ytyʌ nʌ'yʌytyamu, ni tiyʌcotoya quiojtyajpa quiʌ' co'atzipʌ'nista'm wʌ'aŋja'moyajpapʌcʌsi. Ja'n 'yoye wa'ytyʌ nitzʌjcu wa'ytyʌ nwʌ'aŋjamwʌtzʌjque'tu que maŋba wyinsa'ʌnʌmu, y que te' Diojsis maŋba quiʌme'chaju pʌnda'm, y que tiyʌ chamba ñe'cʌ's te'še'ande' tzʌ'yu.

³ Pero maŋbatʌ aŋmaytyamu mumu te' wiyuŋbʌ tiyʌ juca Diojsistʌ cotzoŋba.

⁴ Porque iwʌta'm šʌ'ŋgʌtzʌcjayajwa'a Diojsis, pyʌjcʌchoŋyaju ñe'cʌ's chi'yajupʌ tiyʌ, y quiotzoŋyaju Espíritu Santo's.

⁵ Te'ta'mbʌ's myujšaju que jene oyepʌte' te' Diojsis chame, y 'yaŋmayaju choco'yojmo te' pʌmi maŋbamaj yajquejupʌ Diojsis te' minbapʌ aŋsʌ'ŋojmo.

⁶ Juca te'ta'mbʌ's chaquiajpa te' wyʌ'aŋjamyajupʌ tiyʌ, ja'nandʌ jutz musi yajquipswitu'yaju. Ndzʌcta'mitʌy cuenta que te'ta'mbʌ's nʌte' yajca'wʌtzʌquiaju te' Diojsis 'Yune cruzcʌsi. Y te'wʌcotoya maŋba qui'tzcu'yajyaju pʌ'nista'm.

⁷ Jujche'ŋ naca quecpa tuj soca'pa te' nas. Pijche'ca wo'mba cu'tcuytya'mbʌ tiyʌ wa'y quiu'tyaju ñiyojsʌyajpapʌ's. Te'wʌ Diojsis yajya'moquiuy.

⁸ Pero te' nas wo'mbamʌy apit-ta'nʌ, y canaŋ-apit ja'nde' 'yoyepʌ. Te'wʌ maŋbapa'nde' jyajcʌyjayaju tyocoquiuy, y maŋba pyoŋbʌ'u Diojsis.

Te' nʌtʌ njo'ctamupʌ tiyʌ's pyaquitzi'japya tʌta'm ndzocoy

⁹ Atzita'm, sundamba'ʌsmij, y ñempe'ʌsmij yʌ'šej ndzamjaytyamba nijamba'ʌs que ijtu más oyeta'mbʌ tiyʌ mijcotoyata'm que ja'n te'šejta'mbʌ, y que maŋbamij ŋguiotzojcoctuctamu.

¹⁰ Porque Dios ja'n pʌnšej yatzitzocopyʌ wa'y jyambʌ'u jujche'ŋamis nyosjaytyamu ñe'cʌ porque sundambamis. Ja'n jyambʌ'i jujche'ŋamis ŋgotzoŋyaju wyʌ'aŋjamyajpapʌ's ñe'cʌ, y nʌmajmis ŋgotzoŋdamu.

¹¹ Pero sunbatʌs wa'mis te'šejtijque' muma'ŋgʌ'y tumʌtzocoy nite'tzʌytyamu Dios hasta que mbʌjcʌchoŋdambamis nʌmis njo'ctamupʌ tiyʌ. Tzʌctamʌ te'šej hasta co'yajcu'yojmo.

¹² Ja'ndʌs suni wa'mis ndzi'tamu lugar nwin wa'mij njyaragandʌŋdamu. Sunbatʌs wa'mis ŋguengʌspʌctamu paciencia'ʌyajupʌ wʌ'aŋja'moyecʌsi, porque te'šejta'mbʌ pʌ'nis pyʌjcʌchoŋyajpa Diojsis chamdzi'oquia'upʌ tiyʌ.

¹³ Chamdzi'u Diojsis te' Abrahán sone tiyʌta'm. Y como ja'ndiyʌ inʌc iwʌ's ñʌy chambʌcjapya más mʌja'ŋbʌ pʌn que ja'n ñe'cʌ, ñe' wyin chambʌjcu.

¹⁴ Y ñʌjayu: Jene maŋba'ʌsmij nicomasa'nʌyu, y maŋba'ʌs nyajwʌwa'jayu mis ŋgʌwo'mata'm.

¹⁵ Y pacienciapit jyo'cu Abraha'ŋis hasta que pyʌjcʌchoŋu te' Diojsis chamdzi'ušej.

¹⁶ Iwʌjutiwʌ's ñʌy chambʌcjayajpa'c pʌ'nista'm, más mʌja'ŋbʌ pʌ'nis ñʌy chambʌcjayajpa. Y wa'y yaju te' quipotoŋguy chambʌcjayajpa mʌja'ŋbʌ pʌ'nis ñʌy wa'y wyiyuŋše'aju chame.

¹⁷ Te'cotoya Diojsis chambʌjcu ñe' ñʌy wa'y wyiyuŋše'aju ñe'cʌ's nʌ chamdzi'oquia'upʌ tiyʌ. Šunba inʌc wa'y wi'ŋnayupʌ tzocopyit myujšaju te' maŋba pyʌjcʌchoŋyajupʌ's te' chamdzi'yajupʌ tiyʌ que Diojsiste' y ja'n quiacpʌ'i chame, y maŋbapʌte' chʌjcu.

¹⁸ Te'šej jequeyʌ' metzapʌ tiyʌte' Diojsis ja'n quiacpʌ'i, y Diojsis ja'ndʌ musi sutzjaytyamu. Yʌ'šejtʌ paquitzi'tamba wa'ytyʌ tumʌtzocoy nite'tzʌytyamu ñe'cʌ, y nijamdambatʌ que maŋbatʌ mbʌjcʌchoŋdamu te' ñe'cʌ'stʌ tzamdzi'tamupʌ tiyʌ.

¹⁹ Yʌ' nʌtʌ njo'ctamupʌ tiyʌ's pyaquitzi'japya tʌta'm ndzocoy y nʌtʌjcʌpyatʌ ijtumʌy Dios.

²⁰ Tey tʌjcʌyu Jesús tʌcotoyata'm wina ya'aŋwajupʌ's tʌjcʌquiuy tʌcotoya. Porque mʌja'ŋbʌ sacerdote'aju ja'n yayepʌ jujcha' Melquisedec.