Hebreos 5 - Zoque Copainalá New Testament

¹ Quiopiŋyajpa inʌc mumu mʌja'ŋbʌ sacerdote pʌ'nojmoc. Te'wʌ inʌc quiojtyajpa wa'y chamdʌjcʌyaju pʌnda'm Diojsis wyi'naŋdʌjqui. Y te' mʌja'ŋbʌ sacerdote's ñʌ'aŋguejayajpa inʌc te' pʌ'nista'm chi'oquiuy y yajca'pa inʌc te' copʌnda'm chambašej Diojsis, 'yaŋgui'mušej ñe'cʌ's wa'y te'šej quioyojyaju pʌ'nista'm quiowa.

² Te' mʌja'ŋbʌ sacerdote's muspa inʌc tyo'ya'ŋʌyu te' ja'n inʌc ñʌctʌ'ipʌ's y te' nʌ quiowapa'tyajupʌ inʌc, porque te'šejtijque' ñe'cʌ mochiwʌ pʌndijte'que' y cowatzʌquipʌ.

³ Te'wʌcotoya chi'oquia'pa inʌc tzi'oquiuy wa'y quioyoju ñe' quiowa y te'šejtijque' pʌ'nista'mñe'.

⁴ Ni'iwʌpʌ pʌ'nis ja'n inʌc quiote wyin mʌja'ŋbʌ sacerdote'ajcu'yojmo. Diojsiste' inʌc quiotpa y yajmʌja'ŋajpa, jujcha' quiojtu Aarón.

⁵ Te'šejtijque' Cristo's jamye'tzʌ myʌja'ŋajcʌ' ni jaquiotʌ ñe' wyin mʌja'ŋbʌ sacerdote'ajcu'yojmo, sino que Diojsiste' quiojtu. Ñe'cʌ's ñʌjaquie'tu: Mijte' te' ʌs Une, Išo'yʌs nyajquejpa que mijte' te' ʌs Une.

⁶ Chamgue'tpašej emʌ yʌ' Totojaye's: Mijte' te' mʌja'ŋbʌ sacerdote itjojcʌtʌcpapʌ, Jujcha' Melquisedec mʌja'ŋbʌ sacerdotete'.

⁷ Yʌmyaj ijtu'c Cristo najsacopajcʌsi jʌyu'c weju'c inʌc wyejwindzoŋba Dios te' muspapʌ's inʌc yajcotzojcu wa'y jana quia'u. Diojsis quiʌmato'ŋʌyu porque tyumʌtzocoy inʌc quiʌna'tzʌpya Dios.

⁸ Ñempe inʌc Diojsis 'Yune mato'ŋoyu mumutiyʌcʌsi ñempe toyapʌjcu.

⁹ Y te'šej yajqueju que cota'nupʌ pʌnde' inʌc. Te'cotoya muspa chi'u ja'n yayepʌ quenguy mumu jujche'ŋ myato'ŋoyjayajpapʌ's ñe'cʌ.

¹⁰ Te'šej jeque ñe'cʌte' te' mʌja'ŋbʌ sacerdote quiojtupʌ Diojsis, jujcha' Melquisedec mʌja'ŋbʌ sacerdotete'.

Yajmustambatya'ndʌ tiyʌcʌsitʌ tocopya

¹¹ Yʌ'šejta'mbʌ tiyʌcʌsi sone tiyʌta'm ijtu wa'ytyʌ ndzamu, pero ja'ndʌ musi mawʌ tza'maŋwaju, porque ŋguio'nuyuta'm mij y ja'nmis nʌctʌ'ytyame oye.

¹² Sone ame'a chʌcpa mij nwyʌ'aŋja'moytyamu. Pyʌcpawa'nde' inʌc wa'mis mis aŋmaytyamu Diojsis chame, pero yʌtij ijtumaj pyena wa'mij ne'cʌ 'yaŋmayatʌjtamu jujcha' nʌmaj 'yaŋmacho'tzupʌ. Tzʌctamʌ cuenta jujcha' une ja'nmaj musipʌ's quiu'tu paquipʌ cu'tcuy, nʌmaj chu'tzupʌ.

¹³ Porque te' nʌmaj chu'tzupʌ une's, ja'nmaj musi ñʌctʌ'yu tiyʌte' te' oyepʌ y ja'n 'yoyepʌ aŋma'yoquiuy.

¹⁴ Pero te' pʌnbujtyajupʌ'sa quiu'tyajpa paquipʌ cu'tcuy. Te'ta'mbʌ's 'yaŋmayajwa'a wa'y quioqueñaju cuenta tiyʌ oye y tiyʌ ja'n 'yoye.