Hebreos 4 - Zoque Copainalá New Testament

¹ Chamdzi'yatʌjušej Diojsis ñe'cʌta'm, te'šej ijtumaj tʌcotoyata'm wa'ytyʌ ndʌjcʌytyamu maŋbamʌytyʌ yajsapʌctamu. Pyʌcpa wa'ytyʌ na'tztamu jeque uytya' iwʌjutiwʌ tʌ'ojmota'mbʌ's ja'n maŋu quiʌpa'tu wa'y tyʌjcʌyu.

² Porque ñe'cʌ'stʌ yajmujsu tʌta'm jujcha' yajmujšaju ñe'cʌta'm wina, te' oyeta'mbʌ tiyʌ chamdzi'yatʌjupʌ ñe'cʌta'm. Myatoŋyaju ñe'cʌ'sta'm, pero yajtiyʌ jañʌwʌ'ajya porque jawyʌ'aŋjamya.

³ Pero tʌta'm, jujche'ŋbʌndʌ nwʌ'aŋjamdamba Cristo, muspatʌ ndʌjcʌytyamu maŋbamʌytyʌ yajsapʌjcu. Pero te' Totojaye'ojmo nʌmba: Te'cotoya qui'šca'u'camʌj nʌmu'ʌj: Yajujche'c ja'n maŋu tyʌjcʌyaju maŋbamʌ'yʌs inʌc nyajsapʌquiaju, ñempe Diojsis ñimejcʌyu yʌ' sapʌjcuy yajtujcu'c yʌ' najsacopac.

⁴ Porque itque'tu emʌ chambamʌy te' cu'ya'yojmopʌ jama te' Totojaye's yʌ'šej: Chʌjcu'ca Diojsis mumutiyʌ, sapʌjcu te' cu'ya'yojmopʌ jamo'oyj.

⁵ Chamuše'a tey Totojaye's: Ja'n maŋu tyʌjcʌyaju nyajsapʌquiajpamʌ'yʌs.

⁶ Pero chamdzi'oquia'uwa'nde' Diojsis te' sapʌjcuy. Te'cotoya ijtu maŋbamaj tyʌjcʌyajupʌ wa'y šapʌquiaju. Pero te' wyinatzamdzi'yatʌjupʌ yʌ' eyata'mbʌ tiyʌ jamyusʌ tyʌjcʌya porque jamyato'ŋoyjaya.

⁷ Quiopiŋu Diojsis eyaco aŋsʌŋ wa'y tyʌjcʌyaju pʌnda'm. Y te' aŋsʌŋ yʌtijte'. Porque sone ame'a cʌtʌjcu'c nʌmu Dios te' Davijtis 'yaŋnacapit: Juca išo'pyʌ jamamis matoŋjaytyamba Diojsis chame, Uy yajnuyu'ajtame mista'm ndzocoy.

⁸ Juca inʌc Josue'is chi'yaju pʌnda'm te' sapʌjcuy, jʌsa'ca jaquiopiwʌ inʌc Diojsis eyaco aŋsʌŋ wa'y tyʌjcʌyaju.

⁹ Te'cotoya maŋbamaj tyʌjcʌyaju jujche'ŋ wyʌ'aŋjamyajpapʌ's Dios.

¹⁰ Porque iwʌta'm yajsapʌquiajpa Diojsis, yojsaŋjejyajpa wa'y šapʌquiaju, jujcha' yojsaŋjeju Dios wa'y šapʌjcu.

¹¹ Pyʌcpa jeque wa'ytyʌ ŋgoquendamu cuenta wa'ytyʌ ndʌjcʌytyamu maŋbamʌytyʌ yajsapʌctamu ñe'cʌ's, y uytyʌ maŋu njascojchi'ttamu jascojchi'tyajušej te' jamyato'ŋoyapʌ.

¹² Porque Diojsis chame's šajpa quenguy, y ñʌwʌ'ajpa mumutiyʌ. Y wʌŋba más que ja'n metza'ŋ wi'napʌ espada. Wʌŋba hasta wa'ytyʌ yajnʌctʌ'ytyamu jutzpʌ pʌnda'mdʌyʌ'. Y te'šejtijtʌ nyajcoquendaŋgue'tpa cuenta juca oye o ja'n 'yoye nʌtʌ aŋsunupʌ tiyʌ, y tiyʌta'mdʌ nʌ ŋguipsaŋgospo'ʌyu ndzoco'yojmo.

¹³ Diojsis chʌjcu mumutiyʌ, y ñe'cʌ's quienba y myuspa mumutiyʌ. Ñe'cʌ's quienba mumutiyʌ y mumu'iwʌ mumujutʌ, y ñe' wyi'naŋdʌjqui maŋbatʌ ndza'maŋguejtamu nwin.

Jesuste' te' mʌja'ŋbʌ sacerdote

¹⁴ Maŋu tzajpojmo Diosaŋʌ tʌta'm mʌja'ŋbʌ sacerdote-cowi'na. Te'wʌte' te' Diojsis 'Yune, tʌ Ngomi Jesús. Te'cotoya pyʌcpa wa'ytyʌ tumʌtzocoy nwʌ'aŋjamjojcʌtʌctamu ñe'cʌ.

¹⁵ To'ya'ŋʌpyatʌ tʌyʌ' mʌja'ŋbʌ sacerdote-cowi'na's, porque mochita'mbʌtʌyʌ' y oc'išajpatʌ. Ñe'cʌ te'šejtij 'yoc'išajyajque'tu mumutiyʌcʌsi, pero jaquiowapa'tʌ.

¹⁶ Te'cotoya pyʌcpa wa'ytyʌ jana na'chcuy oto'ŋʌytyamu Dios. Y ñe'cʌ'stʌ maŋba tzi'tamu yajya'moquiuy. Y te' ñe' yajya'moquiupyittʌ maŋba to'ya'ŋʌytyamu y cotzoŋdamu nʌše'ŋdʌ sundamu.